Qasımın andı"

 

Milli qəhrəman Qasım Rzayevə həsr olunmuş film təqdim edildi

 

Dünən Hökumət Evində Avrasiya Beynəlxalq Araşdırmalar İnstitutu İctimai Birliyi "Azərbayanın Milli Qəhrəmanları" silsiləsindən milli qəhrəman Qasım Rzayevin həyatı döyüş yoluna həsr olunmuş "Qasımın andı" adlı filmi təqdim edib.

Filmdə Qasım Rzayevin taleyindən, erməni işğalçılarına qarşı döyüşlərdə göstərdiyi qəhrəmanlıqdan bəhs olunur.

Bununla yanaşı, ekran əsərində 1991-1992-ci illərdə Qasım Rzayevin yaşadığı kənd ətrafında yaranmış hərbi vəziyyət, erməni terrorçularının törətdikləri vəhşiliklər də lentə alınıb.

Filmdə milli qəhrəman Qasım Rzayevin ailə üzvləri, erməni qəsbkarları ilə döyüşlərdə onunla çiyin-çiyinə vuruşan döyüş yoldaşlarının xatirələri öz əksini tapıb.

Filmin ssenari müəllifi Büllur Cavadqızı, rejissoru Etibar Məmmədov, baş məsləhətçisi millət vəkili Qənirə Paşayevadır.

Təqdimat mərasimində çıxış edən Qənirə Paşayeva filmin qəhrəmanı qarşısında baş əydiyini bildirib. Onun sözlərinə görə, Qasım Rzayev göstərdiyi bu qəhrəmanlıqla Tovuzun Əlibəyli kəndinin adını tarixə yazıb.

"Xoşbəxt o insandır ki, hər kəsin halallığını alsın. Bu xoşbəxtlik də Qasıma qismət oldu. Torpaqlarımızı işğaldan azad etmək üçün Qasım qədər potensial qəhrəmanlarımız olmalıdır. Mən çox istərdim gənclərimiz Qasım Rzayevdən ibrət dərsi götürsünlər. Onlar şou-biznesin bayağı qəhrəmanlarına deyil, bu qəhrəmanlara oxşamalıdırlar, - deyə Q.Paşayeva bildirib.

Ombudsman Elmira Süleymanova da Azərbaycan xalqının Qasım kimi qəhrəmanlara borclu olduğunu deyib: "Halal olsun belə oğula ki, torpaq uğrunda canını qurban verib. Qasım Rzayev şəxsiyyət zirvəsini fəth edib".

Deputat Həvva Məmmədova, Gülər Əhmədova, Rövşən Rzayev isə filmi ərsəyə gətirən kollektivə təşəkkür ediblər.

 

 

A.İSMAYILOĞLU

 

Ekspress.- 2010.- 11 iyun.- S. 14.