Alanyada soyqırım sərgisi

Türkiyənin Alanya şəhərinin Atatürk meydanında 31 mart-Azərbaycanlıların Soyqırımı günü ilə əlaqədar "Ermənilərin Azərbaycanda törətdikləri soyqırımları fotolarda" adlı fotosərgi açılıb. Tədbir Azərbaycan Parlament Jurnalistləri Birliyi (PCB) və Azərbaycan Dövlət Teleqraf Agentliyinin (AzərTAc) təşəbbüsü, Türkiyə Qəzetçilər Federasiyası (TQF) və Alanya Qəzetçilər Cəmiyyətinin (AQC) təşkilatçılığı ilə təşkil olunub.

Fotosərgidə ermənilərin 1918-ci ildə Azərbaycanın müxtəlif regionlarında törətdikləri kütləvi qətliamları, 1990-cı ildə baş vermiş 20 Yanvar hadisəsini, XX əsrin ən dəhşətli faciəsi olan Xocalı soyqırımını, habelə 1988-1994-cü illərdə erməni silahlı birləşmələrinin zəbt etdikləri Azərbaycan torpaqlarında törədilən digər dəhşətləri, eləcə də Azərbaycanın işğal altındakı tarixi-mədəni abidələrinin aqibətini özündə əks etdirən fotolar nümayiş etdirilir. Alanya Qəzetçilər Cəmiyyətinin sədri Məhmət Əli Dim, PJB-nin sədri Elşad Eyvazlı, AzərTAc-ın bölmə müdiri, PJB sədrinin müavini Xətai Əzizov sərginin əhəmiyyətindən danışıb, ermənilərin zaman-zaman türklərə və azərbaycanlılara qarşı irəli sürdükləri əsassız ərazi iddiaları, erməni vəhşilikləri barədə ətraflı məlumat veriblər. Sərgi bir həftə davam edəcək.

Qeyd edək ki, belə bır tədbir bu gün Ankarada Zəfər Çarşısı sərgi salonunda da keçiriləcək.

Aqil ASLAN

Ekspress.- 2010.- 31 mart.- S. 5.