Ofeliya Aslan dünyasını dəyişdi

Aktrisa ilə vida mərasimi bu gün evində keçiriləcək

Azərbaycanın görkəmli aktrisası Ofeliya Aslan (Əfqanlı) dünən günorta saatlarında vəfat edib. Bu barədə APA-ya aktrisanın oğlu Hacı Eldar Aslan məlumat verib. Onun sözlərinə görə, 71 yaşlı aktrisa 2 ilə yaxındır, xəstəymiş. Son günlər isə vəziyyəti lap ağırlaşıb. Aktrisa ürək tutmasından vəfat edib.

Ofeliya Aslanla vida mərasimi bu gün aktrisanın çalışdığı teatrın yanında- Azərbaycan prospekti, 13 ünvanında yerləşən evində olacaq.

"Anamla vida mərasimi öz evimizdə olacaq. Çalışdığı teatrın rəhbərliyinə müraciət etsək də, müsbət nəticə olmadı", -bu sözləri də "lent.az"a açıqlamasında O.Aslanın oğlu Hacı Eldar bildirib.

Onun sözlərinə görə, anasının vida mərasiminin keçirilməsi ilə bağlı teatrın direktoru Əliqismət Lalayevə müraciət edib: "Direktora bu barədə müraciət etdim. Ancaq müsbət cavab almadım. Direktor dedi ki, "bizə icazə verilmir". Ona görə də cənazə evdən götürüləcək".

Hacı Eldar onu da bildirib ki, Ofeliya Aslan Yasamal qəbiristanlığında dəfn olunacaq: "Bakı şəhər İcra Hakimiyyətinə müraciət etdik. Onlar da Yasamal qəbiristanlığında yer ayırdılar".

Ofeliya Aslan 27 yanvar 1939-cu ildə Bakıda görkəmli aktyor Rza Əfqanlının ailəsində doğulub. 1963-cü ildə M.A.Əliyev adına Azərbaycan Dövlət İncəsənət İnstitutunun musiqili komediya aktyoru fakültəsini bitirib. 1963-cü ildən Musiqili Komediya Teatrında əvvəl xor artisti, sonra isə aktrisa işləyib. Uzun müddət fasilədən sonra 1997-ci ildən yenidən teatra qayıdıb.

O.Aslanın ilk rolu "Durna" komediyasında Lalə obrazı olub. Bundan sonra aktrisa get-gedə püxtələşərək "Beşmanatlıq gəlin"də Gülnaz, "Arşın mal alan"da Telli, "Hicran"da Çarleston, "Axırı yaxşı olar"da Dilbər, "Bankir adaxlı"da Səmayə və s. rolları ifa edərək tamaşaçıların rəğbətini qazanıb. O.Aslan keçmiş SSRİ-nin müxtəlif şəhərlərində qastrol səfərlərində olub. Moskvanın Operetta Teatrında tamaşaya qoyulmuş R.Hacıyevin "Ana, mən evlənirəm" əsərində Bibixanım rolunda çıxış edib. Aktrisaya heç bir fəxri ad verilməyib.

O.Aslan Azərbaycanın korifey sənətkarı Siyavuş Aslanın keçmiş həyat yoldaşı olub.

AYXAN

Ekspress.- 2010.- 18 may.- S. 10.