Səfurə finala çıxdı

Dünən Norveçin paytaxtı Oslonun "Telenor Arena" mərkəzində "Eurovision-2010" mahnı müsabiqəsinin II yarımfinalı keçirildi və yarışda Azərbaycanı təmsil edən Səfurə Əlizadə öz "Drip drop" ("Damcı") mahnısı ilə finala çıxdı.

İTV ilə canlı yayımlanan yarışa 17 ölkə - Azərbaycan, Türkiyə, Ukrayna, Danimarka, İsrail, Litva, İsveç, İsveçrə, Gürcüstan, Bolqarıstan, Xorvatiya, Kipr, İrlandiya, Niderland, Rumıniya, Ermənistan və Sloveniya qatılmışdı.

II yarımfinal I ilə müqayisədə daha maraqlı çıxdı. Məsələ yalnız Səfurədə deyildi, müsabiqənin əsas favoritləri də dünənki yarışmaya qalmışdı. Səfurə 7-ci çıxış etdi. Yeri gəlmişkən, ondan əvvəl İsveç pop-unun yeni ulduzu Anna Berqedal səhnəyə çıxmışdı.

Səfurə Əlizadə və Anna Berqedal ikinci yarımfinalın məşqi zamanı "Radisson Plaza"da görüşmüşdülər. Anna görüş zamanı Səfurəyə demişdi ki, "Drip-drop"u çox bəyənir.

Qeyd edək ki, "Drip-Drop"u isveçli bəstəkar bəstələyib. "Mən İsveçin "Por İdol" müsabiqəsində iştirak edən zaman Anders Baqqe ilə işləmişəm, o həqiqətən də professionaldır",- Anna deyib.

Səfurə da borclu qalmamış, demişdi ki, oxuduğu emosional mahnı Annanın daxili dünyasından xəbər verir: "Mənə gitarın müşayiəti xüsusi zövq verib". Amma Anna xanım finala çıxa bilmədi...

Və növbə gəlib çatdı "7-ci nömrə"yə: Səfurə gözəl ifası ilə öz mahnısını qəlblərə "Damcı"latdırdı...

Türklərin alovlu "MaNga" qrupu səhnəyə 17-ci çıxdı və bununla da "Telenor Arena"da çıxışlar bitdi, gərgin gözləmə anları başladı.

Və nəhayət, 10 finalçının adı elan edildi. İlk olaraq Gürcüstan təmsilçisinin adı çəkildi, ardınca Ukrayna gəldi.

Üçüncü Türkiyənin "MaNga"sı oldu. Daha sonra İsrail, İrlandiya, Kipr...

Finala 4 vakant yer qalmışdı ki... Səfurənin adı (7-ci) çəkildi.

Son üç yer Rumıniya (8), Ermənistan (9) və Danimarka (10) təmsilçilərinə qismət oldu...

Xatırladaq ki, müsabiqənin ilk 10 finalçısı iki gün əvvəl bəlli olub: Moldova, Rusiya, Albaniya, Yunanıstan, Portuqaliya, Bosniya, Serbiya, Belçika, Belarus və İslandiya.

Qeyd edək ki, Fransa, Almaniya, İspaniya, Böyük Britaniya və "Eurovision-2009"un qalibi Norveç mayın 29-da keçiriləcək final mərhələsində birbaşa iştirak etmək hüququna malikdir.

Yeri gəlmişkən, "Eurovision -2009"-da üçüncülük qazanan Aysel Teymurzadə, habelə xalq artisti Brilliant Dadaşova, əməkdar artist İlqar Muradov, "Natiq" ritm qrupu, gənc müğənnilər Azad Şabanov, Ülviyyə Rəhimova, "Milk& Kisses" qrupunun üzvləri Dilarə və Fəridə "Telenor Arena"da təmsilçimizə dəstək veriblər.

Ekspress.- 2010.- 28-31 may.- S. 29.