Bir millət üç dövlət

Azərbaycan media təmsilçilərinin Quzey Kıbrısa səfəri maraqlı görüşlərlə yadda qaldı

Xəbər verdiyimiz kimi Azərbaycan media təmsilçiləri 10-16 noyabr 2010-cu il tarixlərində Quzey Kıbrıs Türk Cümhuriyyətində (QKTC) səfərdə olublar. Səfər Azərbaycan Mətbuat Şurasının Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə yardımı ilə reallaşdırdığı "Beynəlxalq media təcrübəsinin öyrənilməsi və tətbiqi" layihəsi çərçivəsində həyata keçirilirdi. Səfərdə əsas məqsəd beynəlxalq aləmdə və ətraf region dövlətlərində mövcud olan media təcrübəsinin öyrənilməsi, söz və mətbuat azadlığının inkişafı yönündə təcrübə mübadiləsinin aparılması olsa da, Azərbaycan media təmsilçiləri qardaş ölkənin müstəqilliyinin elan edilməsinin 27-ci ildönümünə həsr edilmiş tədbirlərə də qatılıb, QKTC-nin rəsmi qurumları ilə görüşlər keçiriblər. Həmçinin, QKTC-də ali təhsil müəssisələrində təhsil alan tələbələrlə görüşlərin təşkili də səfərin maraqlı hissələrindən olub.

Səfərdə olan nümayəndə heyətinin tərkibi KİVDF-nin icraçı direktoru Vüqar Səfərli, MŞ sədrinin müavini Müşfiq Ələsgərli, "Ekspress" qəzetinin təsisçisi Müşfiq Səfiyev, "Yeni Azərbaycan" qəzetinin baş redaktoru Hikmət Babaoğlu, "İki sahil" qəzetinin baş redaktoru Vüqar Rəhimzadə, "Azərbaycan" qəzetinin baş redaktor müqavini Zeynal Zeynalov, "Olaylar"İA-nın rəhbəri Yunus Oğuz, "Trend" İA-nın baş redaktoru İlqar Hüseynov, "Bakı xəbər" qəzetinin baş redaktoru Aydın Quliyev, "Paritet" qəzetinin baş redaktoru Cəmaləddin Quliyev, "Türküstan" qəzetinin baş redaktoru Aqil Camal, "Bizim yol" qəzetinin baş redaktoru Bahəddin Həziyev, "Səs" qəzetinin baş redaktoru Bəhruz Quliyev, "Oxu məni" qəzetinin baş redaktoru Emin Axundovdan ibarət idi.

Rauf Denktaşla görüş

Azərbaycan media təmsilçiləri səfərin ilk gününü Quzey Kıbrıs Türk Cümhuriyyətinin qurucusu və ilk prezidenti Rauf Denktaşla görüşlə başladı.

R.Denktaşın ofisində keçirilən görüşdə öncə Azərbaycan nümayəndə heyətinin səfərinin məqsədi haqda məlumat verildi. KİVDF-nin icraçı direktoru V.Səfərli R.Denktaşın bütün Türk dünyasında olduğu kimi Azərbaycanda da sevilən tarixi şəxsiyyət olduğunu söylədi. Bildirdi ki, məhz milli liderlər hər zaman xalqını istiqlaliyyətə qovuşdurur və bu istiqlaliyyəti qoruyub saxlamağı bacarır: "Quzey Kıbrıs Türk Cümhuriyyətinin artıq 27 yaşa gəlib çatması isə bilavasitə Rauf Denktaşın adı ilə bağlıdır".

R.Denktaş isə Azərbaycan KİV təmsilçilərinin QKTC-yə böyük heyətlə səfər etməsini Cümhuriyyətin qurulmasının 27-ci il dönümü ərəfəsində Kıbrıs türklərinə ən gözəl bayram hədiyyəsi kimi qiymətləndirdi. Kıbrıs adasının mövcud problemləri ətrafında fikirlərini bölüşən Denktaş qeyd etdi ki, Ermənistan-Azərbaycan münaqişəsinə münasibətdə olduğu kimi, beynəlxalq dairələr Kıbrıs probleminə münasibətdə də ikili standartlar sərgiləyirlər: "Bu gün adanın türk tərəfinin sərt embarqolar altında saxlanılması, qarşı rum tərəfinə isə hər cür dəstək verilməsi, onun Avropa Birliyinə üzv qəbul edilməsi bizim qarşılaşdığımız böyük ədalətsizlikdir". R.Denktaş Quzey Kıbrısın beynəlxalq təcriddən qurtarması üçün Türk dövlətlərinin dəstəyinə böyük ehtiyac olduğunu vurğuladı. O, ümumilli lider Heydər Əliyevin "Azərbaycan və Türkiyə bir millət, iki dövlətdir" ifadəsini səsləndirərək "Bu təkrarsız tezisi artıq bir millət, üç dövlət kimi ifadə etməyin vaxtıdır" dedi.

Görüşün sonunda V.Səfərli Azərbaycan nümayəndə heyəti adından R.Denktaşa nəfis şəkildə toxunmuş ipək xalça hədiyyə etdi.

Prezident Dərviş Eroğlu ilə görüş

KİV təmsilçilərinin növbəti görüşü Quzey Kıbrıs Türk Cümhuriyyətinin prezidenti Dərviş Eroğlu ilə oldu. QKTC prezidenti böyük heyətlə Kıbrısa gələn Azərbaycan media təmsilçiləri ilə görüşməkdən məmnun olduğunu söylədi. O, QKTC-nin beynəlxalq aləm tərəfindən hələ də tanınmamasını Kıbrıs türklərinə qarşı beynəlxalq səviyyədə həyata keçirilən haqsız siyasət adlandırdı. Bu ədalətsiz siyasətin aradan qaldırılması yönündə Türkiyə dövləti kimi Azərbaycana da böyük inamla baxdıqlarını bildirdi.

KİVDF-nin icraçı direktoru V.Səfərli Azərbaycan dövlətinin və cəmiyyətinin Quzey Kıbrıs türklərinə hər zaman diqqətlə yanaşdığını prezident D.Eroğlunun nəzərinə çatdırdı: "Azərbaycan mümkün olduğu çərçivədə Quzey Kıbrısa dəstəyini ifadə etməyə çalışır. Təsadüfi deyil ki, Türkiyədən sonra QKTC-yə yalnız Azərbaycandan təyyarə reysi təşkil olunub. Bu gün bizim böyük bir heyətlə QKTC-nin Cümhuriyyət bayramına qatılmağımız bu dəstəyin bir nümunəsidir. Arzu edirik ki, Quzey Kıbrıs tezliklə dünya birliyi tərəfindən tanınsın və bizim əlaqələrimiz üzərində olan bütün əngəllər aradan qalxsın".

Görüşün sonunda V.Səfərli nümayəndə heyəti adından D.Eroğluna "Azərbaycan xalçası" hədiyyə etdi.

Nazirlərlə görüşlər

QKTC-nin ayrı-ayrı dövlət idarələrinin rəhbərləri də Azərbaycan KİV nümayəndələrinin ölkəyə səfərinə diqqətlə yanaşırdılar. Səfər müddətində media təmsilçilərimiz QKTC-nin xarici işlər naziri Hüseyn Özgürgün, Mülki Müdafiə Təşkilatının sədri Levent Akyıldız, Turizm Planlama Dairəsi müdiri Turqut Muslu, XİN İnformasiya Dairəsi müdiri Sermed Eminlə görüşdülər. Hər bir görüşdə iki qardaş xalq arasında əlaqələrin hazırkı vəziyyəti dəyərləndirildi, münasibətlərin inkişaf etdirilməsi ilə bağlı təkliflər səsləndirildi.

Görüşlərdə dövlət rəsmilərinə Azərbaycan nümayəndə heyəti adından xatirə hədiyyələri təqdim olundu. Eyni zamanda, dövlət rəsmilərinin adından Azərbaycan nümayəndə heyətinin şərəfinə ziyafətlər təşkil edildi.

QKTC-nin aparıcı KİV-lərində görüş

Azərbaycan media təmsilçilərinin əsas görüş məntəqələrindən biri də QKTC-nin KİV redaksiyaları oldu. Məlumat üçün bildirək ki, QKTC-də ölkə miqyaslı 13 KİV redaksiyası fəaliyyətdədir ki, bunların da arasında iritirajlılığı və geniş auditoriyalı KİV qurumları olaraq "Bayraq" Teleradio Qurumu (QKTC-nin dövlət teleradiosu), "Kıbrıs" Televiziyası (KTV) və "Kıbrıs" qəzeti daha çox tanınırlar. "Kıbrıs" qəzeti 15 min tirajla çıxır. Ölkənin ümumi əhalisinin sayı baxımından (QKTC-nin 300 minə yaxın əhalisi var) dünya çapı ilə müqayisədə iritirajlı olmasalar da, Kıbrısda media quruluşları ən son texnoloji yeniliklərin tətbiq edilməsi ilə diqqət çəkir. Adı çəkilən hər 3 redaksiyaya baş çəkən Azərbaycan media təmsilçiləri bu texnologiyalarla tanış olmaqla yanaşı, iki ölkənin media quruluşları arasında münasibətlərin qurulması yönündə də müzakirələr aparıdılar.

Hər 3 KİV redaksiyasına Azərbaycan nümayəndə heyəti adından xatirə hədiyyələri təqdim edildi.

Azərbaycanlı tələbələrlə görüş

QKTC-nin ali məktəblərini jurnalistika üzrə tədris prosesi ilə tanışlıq üçün ziyarət edən Azərbaycan KİV təmsilçiləri burada tədris prosesində istifadə edilən əyani vəsaitlərlə, xüsusi olaraq tələbə telestudiyaları ilə tanışlıqdan məmnun qaldılar. Kıbrıs ali məktəblərinin jurnalistika fakültələri həm də ölkə əhalisinə canlı xəbər çatdırılması prosesində birbaşa iştirak edirlər.

Azərbaycan nümayəndə heyətinin QKTC ali məktəblərində qarşılaşdığı ikinci maraqlı fakt isə burada təhsil alan azərbaycanlı tələbələrlə bağlı oldu. Demək olar ki, Kıbrısın hər bir ali məktəbində həmvətənlərimiz təhsil alır. Həmçinin, Azərbaycanlı tələbələr bu universitetlərin həm təşkilatlanma, həm də elmi səriştəsi ilə seçilən ən aktiv tələbələridirlər.

Azərbaycan KİV təmsilçiləri QKTC-nin Yakın Doğu Universitetidə, Uluslararası Kıbrıs Universitetində, Doğu Akdeniz Universitetində rəhbərliklə görüşlərdən başqa buradakı azərbaycanlı tələbələrlə də ayrıca görüş keçirdilər.

QKTC-nin Cümhuriyyət bayramında iştirak

Azərbaycan media təmsilçilərinin QKTC-yə səfəri Kıbrıs Türk Cümhuriyyətinin elan olunmasının 27-ci ildönümünə təsadüf edirdi. Nümayəndə heyəti rəsmi qonaq kimi bu məqsədlə təşkil edilmiş dövlət tədbirlərinə qatılmışdılar.

Belə ki, media nümayənlərimiz noyabrın 15-də əvvəlcə QKTC-nin paytaxtı Lefkoşada Cümhuriyyət Günü ilə bağlı keçirilən hərbi paradda iştirak etdilər. Sonra Girnə şəhərində Türk Şahinlərinin hava göstərilərini seyr etdilər.

Daha sonra isə QKTC prezidentinin Cümhuriyyət günü münasibətilə Girnə şəhərində "Merkuri" otelində verdiyi rəsmi qəbula qatıldılar.

Aqil CAMAL

Ekspress.- 2010.- 19 noyabr.- S.12-13.