Əhməd Şəfəqin "Eşq və vətən"i Bakıda təqdim edildi

Məşhur türk yazıçısı, bastəkar Əhməd Şəfəqin Azərbaycan-Türkiyə qardaslığının nümunəsi olan "Aşk və vətən" albomunun dünən Bakıda təqdimat mərasimi keçirilib.

Təqdimatda Azəri-Türk Qadınlar Birliyinin sədri Tənzilə Rüstəmxanlı, Yazıçılar Birliyinin katibi Rəşad Məcid, telejurnalist Sevil Nuriyeva, müğənnilər-xalq artisti Brilliant Dadaşova, Əməkdar artistlər Nisə Qasımova, Tünzalə Ağayeva və başqaları iştirak edib.

Əhməd Şəfəq bildirib ki, bu onun sayca 9-cu albomudur:

"Albomumun adı da doqquzdur- "Aşk və vətən". Çünki 9 rəqəmi mənim ücün çox vacibdir. Mənim musiqi sənətimin bu rəqəmlə çox bağlılığı var. Bu rəqəm türklər üçün də önəmlidir.

Albomda 14 mahnı toplanıb. Bütün albomlarında olduğu kimi, burada da həm vətənə qarşı olan sevgim, həm də sevgiyə olan düşüncələrim öz əksini tapıb. İfa etdiyim musiqilər türk millətini parçalayan şəxslərə qarşı mübariz olan xalqımızın bütövlüyünü təcəssüm etdirir.

Mən də Dədə Qorqudun 21-ci əsrdəki təmsilçisi olaraq bütün bunlara diqqət edirəm. Bütün şeirlərimdə, yazılarımda və romanlarımda bütövləndirmək kimi bir məqsədim var".

Albomun Türkiyədə işıq üzü gördüyünü bildirən Ə.Şəfəq qeyd edib ki, ilk təqdimat Bakıda olur "Bu 6 ildə Azərbaycana tez-tez səfər etmişəm. Burda konsertlər də vermişəm. Türkiyə-Azərbaycan münasibətlərini nəzərə alaraq təqdimat üçün Bakını seçdim. Biz nəinki mədəni əlaqələr, eləcədə qan qohumluğu ilə birləşirik. Bundan sonrakı sənətimdə ilk olaraq Azərbaycana uyğun işlər edəcəm. Mədəniyyət və incəsənət sahəsində bir çox yeniliklər etmək istəyirəm. Bu diskimin təqdimatını 1 ay sonra İstanbulda da təşkil edəcəyik. Albomun içərisindəki mahnıların musiqisi və sözləri demək olar ki, mənə aiddir. Hətta bu albomun içərisində azərbaycanlı Sona Vəliyevanın bəstələdiyi "Qaragilə" mahnısını da ifa etmişəm. Çünki bu mahnı çox xoşuma gəlib".

Sonda bəstəkar onu da bildirib ki, gələn ilin mart ayında Heydər Əliyev Sarayında konserti təşkil olunacaq: "İlk konsertim 2007-ci ildə həmin sarayda keçirilib".

Tədbirdə çıxış edən Sona Vəliyeva bildirib ki, bu mahnı Bakının Təbrizdən, Təbrizin Bakıdan ayrı düşməsinə bir ağıdır: "Mənim yazdığım "Qaragilə" xalq mahnısı "Qaragilə"yə bir cavabdır. "Qaragilə"də də böyük həsrət və nisgil var. Bir millətin yüz illər boyu davam edən və hələ də sonu görünməyən vüsalı müşkül olan yurd həsrətinin ağrısı var".

Yeri gəlmişkən, Azərbaycan Yazıçılar Birliyinin katibi Rəşad Məcidin dünən türkiyəli yazara Birliyin fəxri üzvü vəsiqəsini təqdim edib. Bununla da Ə.Şəfəq AYB-nin 121-ci fəxri üzv olub.

AYXAN

Ekspress.- 2010.- 6 oktyabr.- S. 14.