Avropa Şurasında TÜRKSOY sərgisi

Avropa Şurası Parlament Assambleyasının (AŞ PA) payız sessiyası çərçivəsində Avropa Şurasının əsas binasında Türk Mədəniyyət və Sənət Təşkilatı -TÜRKSOY-un rəsm sərgisinin açılışı olub. APA-nın Strasburq müxbirinin məlumatına görə, sərginin açılışında AŞ PA sessiyasına dəvət edilmiş Türkiyə prezidenti Abdulla Gülün xanımı Hayrunnisə Gül, Azərbaycanın AŞ PA-dakı nümayəndə heyətinin üzvləri, Avropa Şurasının yüksəksəviyyəli məmurları və digər dəvətli qonaqlar iştirak edib. AŞ PA sədri Mövlud Çavuşoğlu, TÜRKSOY-un sədri Dusen Kaseinov və Azərbaycanın AŞ yanındakı daimi nümayəndəliyinin rəhbəri Arif Məmmədov tədbirdə çıxış ediblər.

M.Çavuşoğlu çıxışında türk dünyasının müxtəlif bölgələrindən gələn bu çox dəyərli əsərlərin nümayiş etdirildiyi və türk dünyasının mədəniyyətini təbliğ edən bu sərgini açmaqdan şərəf duyduğunu deyib.

O, sərginin mədəniyyətlərarası dialoq, qarşılıqlı anlaşma, mədəni müxtəlifliyə hörmət və onu tanıtmaq baxımından çox önəmli olduğunu bildirib.

TÜRKSOY-un sədri D.Kaseinov qurumun 1993-cü ildə Azərbaycan, Qazaxıstan, Qırğızıstan, Özbəkistan, Türkmənistan və Türkiyənin mədəniyyət nazirlərinin görüşündə təsis olunduğunu iştirakçıların diqqətinə çatdırıb. Sonradan Rusiyadan altı bölgə və Moldovanın Qaqauziya bölgəsi də TÜRKSOY-a müşahidəçi kimi qoşulub: 'TÜRKSOY UNESCO ilə eyni məqsəd və xarakterə malikdir. TÜRKSOY-un əsas məqsədlərindən biri türkdilli xalqlar arasında ümumi mədəni irsin saxlanılması və inkişafıdır. Hazırkı sərgidə 1998-ci ildən bu yana 13 dəfə nümayiş etdirilmiş TÜRKSOY ölkələri rəssamlarının əl işləri nümayiş olunur. Bu ilin əvvəlində TÜRKSOY Paris və Strasburqda Novruz bayramı şənlikləri təşkil edib. Çox şadıq ki, yeni bir mədəni tədbirlə bağlı buraya yığışmışıq. Mən rəssamlara, eləcə də Azərbaycan və Türkiyənin Avropa Şurası yanında daimi nümayəndəliklərinə göstərdikləri yardıma görə dərin təşəkkürümü bildirirəm".

Azərbaycanın Avropa Şurasındakı daimi nümayəndəsi Arif Məmmədov isə bu böyük ailənin bir hissəsi kimi Azərbaycanın türk irsinə böyük əhəmiyyət verdiyini və eyni zamanda, Avropa dəyərləri və ideyalarını könüllü şəkildə qəbul etdiyini söyləyib: "Məhz bu səbəbdəndir ki, biz mədəniyyətlər və dinlər, Şimal və Cənub, Şərq və Qərb arasında dialoqa xüsusi diqqət yetiririk. 2008-ci ilin dekabrında Avropa Şurası mədəniyyət nazirlərinin Bakı konfransında əsası qoyulmuş "İncəsənət xadimləri dialoq naminə" layihəsini başlayarkən biz rəssamların mədəniyyətlərarası dialoqun "mənasız səslər toplusu"na bənzər bir proses deyil, mükəmməl bir orkestr kimi həyata keçirilməsində aparıcı qüvvə olduğuna inanmışdıq. Hazırda əldə etdiklərimizə və qarşıda bizi daha çox işin gözlədiyinə diqqət yetirdikdə, zəhmətimizin hədər getmədiyini görürük".

Azərbaycanın TÜRKSOY-dakı təmsilçisi Elçin Qafarlının sözlərinə görə, bu sərginin təşkil edilməsində məqsəd "Mədəniyyətlərarası dialoq ili" çərçivəsində türk mədəniyyətini dünyaya tanıtmaqdan ibarətdir.

Qeyd edək ki, oktyabrın 8-də də davam edəcək sərgidə Azərbaycan, Türkiyə, Qırğızıstan, Qazaxıstan, Özbəkistan, Türkmənistan və Rusiya Federasiyasına daxil olan Tatarıstan, Başqırdıstan, Tuva, Altay, Saxa, Yakutiya, Xakasiya, Moldovanın Qaqauz Yeri, Ukraynanın Krım Muxtar Vilayəti, Bolqarıstan və digər ölkələrdən olan rəssamların seçilmiş əsərləri nümayiş etdirilir.

Ekspress.- 2010.-8 oktyabr.- S. 14.