Pərdələri qaldırın, işıqları yandırın!

Bu gün milli teatrın 138-ci mövsümü açılır

Bu il 138-ci teatr mövsümünün açılış mərasiminin Sumqayıtda keçirilməsi nəzərdə tutulub. Açılış mərasimi bu gün Sumqayıt Dövlət Musiqili Dram Teatrının qarşısındakı meydanda olacaq. Teatrın qarşısında Azərbaycan teatrlarının yaradıcı kollektivlərinin ifasında tamaşalardan səhnəciklər göstəriləcək.

Teatr mövsümün açılışı ilə əlaqədar Teatr Muzeyi və M.F.Axundov adına Milli Kitabxana Azərbaycan teatrına həsr olunmuş sərgi nümayiş etdirəcək.

Bəli, yeni mövüsüm başlayır. Bəs görəsən, teatrlarımız yeni mövsümə necə hazırlaşıblar? Bu suala aydınlıq gətirmək üçün bir sıra aparıcı teatrlarla əlaqə saxladıq.

Azərbaycan teatrlarının flaqmanı olan Akademik Milli Dram Teatrı binasında aparılan əsaslı təmir işləri başa çatmadığından, 138-ci mövsümü bir az gec, 2011-ci il martın 27-də -Beynəlxalq Teatr Günündə açacaq. O vaxta qədər teatrda 4-5 yeni tamaşa səhnələşdiriləcək. Artıq "Qarabağnamə" adlı yeni tamaşanın məşqlərinə başlanılıb. Teatrın rejissoru Mərahim Fərzəlibəyovun quruluş verdiyi bu tamaşa İlyas Əfəndiyevin "Hökmdar və qızı" əsəri əsasında hazırlanır. Teatrın açılışı üçün nəzərdə tutulan digər tamaşalar isə Şeksprin "Hamlet" və Mirzə Fətəli Axundovun "Vəziri-xani-Lənkəran" əsərləri əsasında hazırlanacaq.

Digər tamaşaların məşqləri isə oktyabrın 1-dən start götürəcək.

Teatrın direktoru İsrafil İsrafilovun sözlərinə görə, hazırda əsasən texniki işlər həyata keçirilir: "Avadanlıqlar yerləşdirilir, telefon xətləri çəkilir, liftin işi tənzimlənir. Bundan başqa, binanın ətrafı abadlaşdırılır. Əsas işin 95 faizi artıq həyata keçirilib".

Direktorun sözlərinə görə, teatrın açılışı yaxın aylarda baş tutacaq. Noyabrın əvvəlində dünyanın məşhur teatrşünaslarının iştirakı ilə baş tutacaq ikigünlük Beynəlxalq Teatr Konfransı məhz teatrın yeni binasında keçiriləcək.

Həmin ay Çexov adına Beynəlxalq Teatr Festivalının "İpək yolu" mərhələsi də baş tutacaq.

İ.İsrafilov onu da bildirdi ki, sentyabrın 17-də ölkə rəhbərliyinin təmir işlərilə tanış olmaq məqsədilə Akademik Milli Dram Teatrına baş çəkəcəyi də gözlənilir.

Direktordan onu da öyrəndik ki, teatra rəhbər təyin olunandan sonra dünən yaradıcı heyətlə ilk iclasını keçirib. İclasda teatrın gələcəyinə, repertuar siyasəti, təmirdən sonra binaya köçmə məsələsinə, aparılacaq islahatlara toxunulub.

Azərbaycan Dövlət Gənc Tamaşaçılar Teatrı bu gün 83-cü mövsümünə start verir. Teatrın direktoru, əməkdar artist Mübariz Həmidovun sözlərinə görə, yeni mövsümdə rəhbərlik etdiyi teatrda 4 yeni tamaşa hazırlanacaq. Bunlar "Romeo və Cülyetta", Tamara Vəliyevanın "Mənim ağ göyərçinim", Əli Əmirlinin "Sən məni sevirsən" və xalq yazıçısı Elçinin "Buzovna kəndinin əhvalatları" tamaşalarıdır.

Səməd Vurğun adına Rus Dram Teatrı 90-cı yubiley mövsümünü "Lənkəran xanının vəziri" tamaşası ilə açacaq. Teatrdan aldığımız məlumatda bildirilir ki, bu mövsüm bütün premyeralar, tədbirlər və festivallar yubileyə həsr olunacaq. Mədəniyyət ocağı yubiley çərçivəsində teatrsevərlərin qarşısına 4 premyera ilə çıxacaq. Premyeralardan birincisi Rusiyadan dəvət olunan- Sankt-Peterburq şəhərinin Aleksandrinsk Teatrının rejissoru İsgəndər Sakayevin hazırladığı "Yay gecələrində yuxu" tamaşasıdır. Tamaşanın premyerası oktyabrın 9-da olacaq.

Boris Lukinskovun quruluş verəcəyi tamaşa isə "Həqiqət yaxşıdır, xoşbəxtlik gözəldir" adlanır.

Bu mövsüm premyeralarının içində teatrın baş rejissoru Aleksandr Şarovskinin quruluşunda "Ailəyə aid olmayan portret" tamaşası da var.

Balaca tamaşaçılarını da unutmayan kollektiv uşaqlar üçün Yeni İl nağılı hazırlayır.

Bundan başqa, teatrın kollektivi Ukraynanın Yalta şəhərində keçiriləcək "Teatr. Çexov. Yalta" adlı III Beynəlxalq Teatr Festivalında iştirak edəcək. Sentyabrın 11-dən 18-dək keçiriləcək festivalda teatrın yaradıcı kollektivi M.Zadornovun "Ər almaq istəyirəm" tamaşası ilə çıxış edəcək.

Azərbaycan Dövlət Akademik Opera və Balet Teatrının 102-ci mövsümünün açılışında -sentyabrın 19-da Üzeyir Hacıbəylinin 125 illiyi münasibətilə "Koroğlu" operası nümayiş etdiriləcək. Teatrın mətbuat katibi Şükufə Ağamirzəyevadan aldığımız məlumatda bildirilir ki, həmin ərəfədə Akademik Opera və Balet Teatrının rəsmi internet saytının açılışı da gözlənilir.

Yeri gəlmişkən, Üzeyir Hacıbəylinin 125 illiyi münasibətilə bəstəkarın "Koroğlu" operası Astana və Qırğızıstan opera teatrlarının repertuarına daxil edilib.

Bunun əvəzində Azərbaycan Dövlət Opera və Balet Teatrında qazax operasının səhnələşdirilməsi barədə razılığa gəlinib.

Ş.Ağamirzəyevadan aldığımız məlumatda, həmçinin, o da qeyd olunur ki, Opera və Balet Teatrının balet truppası Qara Qarayevin "Yeddi gözəl" baletini Rusiyaya aparacaq. Moskva Böyük Teatrı ilə Opera və Balet Teatrı arasında bağlanan sazişə əsasən 2011-ci ilin fevral ayında teatrın balet truppası Rusiya paytaxtına qastrol səfəri edəcək.

Opera və Balet Teatrının yaradıcı heyəti İranda keçiriləcək Azərbaycan Mədəniyyəti Günlərində də iştirak edəcək. Teatrın solistləri, xalq artisləri Mənsum İbrahimov, Aygün Bayramova, Nəzakət Teymurova, əməkdar artist Təyyar Bayramov və başqaları sentyabrın sonlarında Tehrana gedəcək.

Opera və Balet teatrının tez-tez qastrol səfərlərinə gedən solisti, xalq artisti Azər Zeynalov və vokalçı Fəridə Məmmədova isə Ü.Hacıbəylinin 125 illiyi ilə əlaqədar sentyabrda Avstriyanın paytaxtı Vyanaya yola düşəcək.

Azərbaycan Dövlət Musiqili Komediya Teatrı 101-ci mövsümünü sentyabrın 19-da açacaq. Teatrdan verilən məlumata görə, sentyabrın 18-i -Milli Musiqi Günü və dahi Üzeyir Hacıbəyovun doğum günü münasibətilə isə "Arşın mal alan" tamaşası nümayiş olunacaq. Tamaşanın rejissoru Elvin Mirzəyevdir. Rollarda Anar Şuşalı, Nərgiz Kərimova, Əzizağa Əzizov, Xanım Qafarova, Əkbər Əlizadə və başqaları oynayır.

Qeyd edək ki, Musiqili Komediya Teatrında "Arşın mal alan"a ilk dəfə Şəmsi Bədəlbəyli quruluş verib. Elvin Mirzəyev isə 2008-ci ildə yeni quruluşda səhnələşdirib.

Teatrın mətbuat xidmətinin rəhbəri Ağca Muxtarovadan aldığımız məlumatda bildirilir ki, "Muzkomediya"da bu mövsüm bir sıra yeni tamaşalar hazırlanacaq. Belə ki, xalq artisti Arif Məlikovun "Ləpələr" operettası 45 ildən sonra yenidən oynanılacaq. Artıq tamaşanın məşqlərinə başlanılıb. Tamaşanın ilin sonunadək təhvil verilməsi planlaşdırılır. Teatrın ilin sonunadək nəzərdə tutulan digər layihələrindən biri Saqarelinin "Xanuma" pyesinin iki dildə -azərbaycan və rus dillərində tamaşaya qoyulmasıdır. Bu məqsədlə Gürcüstanın tanınmış rejissoru Qoça Kapanadze Bakıya dəvət olunub. Artıq məşqlərinə başlanılan tamaşada baş rolları xalq artistləri Afaq Bəşirqızı, İlham Namiq Kamal, əməkdar artistlər Elçin Həmidov, İzabella Şvets, Əkbər Əlizadə və başqaları ifa edirlər.

Dahi Azərbaycan bəstəkarı Üzeyir Hacıbəylinin "Ər və arvad" əsəri əsasında səhnələşdirilən tamaşa artıq hazırdır. Bu tamaşa da bəstəkarın 125 illik yubileyi ərəfəsində teatrsevərlərə təqdim olunacaq.

Bundan başqa, Nikolay Qoqolun anadan olmasının 200 illiyi münasibətilə ədibin məşhur "Evlənmə" əsəri Azərbaycan Dövlət Musiqili Komediya Teatrında tamaşaya qoyulacaq. Artıq tamaşanın məşqlərinə başlanılıb. Baş rolları xalq artistləri Yaşar Nuri, Məleykə Əsədova və Şükufə Yusubovanın ifa etdiyi tamaşanın quruluşçu rejissoru əməkdar incəsənət xadimi Bəhram Osmanov, musiqi rəhbəri və dirijoru əməkdar incəsənət xadimi Yalçın Adıgözəlov, quruluşçu rəssamı Nabat Səmədova, xormeysteri Vaqif Məstanov, baletmeysterləri isə Zakir və Leyla Ağayevlərdir.

Abdulla Şaiq adına Dövlət Kukla Teatrı növbəti mövsümü Mədəniyyət və Turizm Nazirliyinin sifarişi ilə hazırlanan Üzeyir Hacıbəylinin "O olmasın, bu olsun" komediyasının premyerası ilə açıq elan edəcək. Tamaşada istifadə olunacaq xüsusi marionetlər Sankt-Peterburqdan gətirilib.

Teatrın direktoru Rəşad Əhmədzadədən aldığımız məlumata görə, bir neçə kukla mütəxəssisini teatra işə dəvət edib.

Mütəxəssislər artıq sentyabrın ilk günlərindən teatrda işə başlayıblar: "Onlar əvvəl də bu teatrda işləyiblər. Azərbaycanda kukla sənətinin azsaylı bilicilərindən sayılırlar".

Direktor onu da dedi ki, oktyabrda Gürcüstan rejissorlarından biri Kukla Teatrında yeni tamaşa səhnələşdirəcək. Bu ölkə ilə qarşılıqlı təcrübə mübadiləsinin də aparılması planlaşdırılır.

Gəncə Dövlət Kukla Teatrı sentyabrın 15-də növbəti teatr mövsümünün açılışında balaca pərəstişkarlarını yeni tamaşa ilə sevindirəcək. Teatrın direktoru Bayram Fətəliyev bildirib ki, kollektiv yeni mövsümü Nizami Gəncəvinin "Xeyir və Şər" əsərinin motivləri əsasında hazırlanmış tamaşa ilə açacaq.

Bundan başqa, balaca tamaşaçılar bu mövsümdə "Göyçək Fatma" və gəncəli şairə Aləmzər Əlizadənin uşaqlar üçün yazdığı şeirlər əsasında səhnələşdirilmiş yeni tamaşalara da baxa biləcəklər.

Sentyabrın 18-də yeni mövsümü Migel de Servantesin "Don Kixot" romanının motivləri əsasında hazırlanan "Psix" tamaşası ilə açmağa hazırlaşan Dövlət Yuğ Teatrında yeni iki tamaşanın məşqlərinə başlanılıb. Teatrdan verilən məlumata görə, tamaşalardan biri "Diogenin çəlləyi" adlanır. Tamaşanın ideya müəllifi və quruluşçu rejissoru əməkdar incəsənət xadimi Vaqif İbrahimoğludur.

Teatrda məşqlərinə başlanılan ikinci tamaşa Saleh Səbatın "Uşaq və biz" əsəri əsasında hazırlanır. Bu tamaşanın da quruluşçu rejissoru Vaqif İbrahimoğludur.

İLTİFAT

Ekspress.- 2010.- 15 sentyabr.- S.10;14.