Xalidə Quliyeva "Səkkizinci göy"də Aktrisamız İranda filmə çəkilib

Azərbaycanlı aktrisa Xalidə Quliyeva İran kinematoqrafçılarının lentə aldıqları "Səkkizinci göy" bədii filmində baş rola çəkilib. Aktrisadan aldığımız məlumatda bildirilir ki, filmdə onun tərəf müqabili İranın tanınmış aktyoru Məhəmməd Kasibidir. Filmdə onun övladları rolunda isə Azərbaycandan Qurban Məsimov və Zülfiyyə Alhüseynova çəkilib.

Filmin ssenari müəllifi və rejissoru Həsən ağa Nəcafi, prodüseri Camal Şürja, operatoru Məhəmməd Taqi Paksima, səs rejissoru Məhəmməd Muxtaridir.

Aktrisanın sözlərinə görə, filmin çəkilişləri 26 gün davam edib. Filmin mövzusu övladları ziyarət üçün İrana gedən azərbaycanlı qadının başına gələn hadisələrdən bəhs edir. Orada təsadüfi bir hadisə nəticəsində oğlu xəstəxanaya düşür. Bütün hadisələr bundan sonra başlayır, filmin süjet xətti açılır. Ekran əsərinin ideyası budur ki, insanlar bir-birinə yaxınlaşsa, dayaq dursa, dərdlər, problemlər də çözülər.

Filmin premyerası yaxın vaxtlarda Tehranda keçiriləcək, Azərbaycan tamaşaçılarına isə Heydər Əliyev Sarayında təqdim olunacaq.

AYXAN

Ekspress.- 2010.- 24 sentyabr.- S. 14.