İranda Azərbaycan Mədəniyyət Günləri açıldı

Dünən İranın paytaxtı Tehran şəhərində Azərbaycan Mədəniyyət Günlərinin təntənəli açılış mərasimi keçirilib. Bu barədə APA-ya məlumatı İranda səfərdə olan Mədəniyyət və Turizm Nazirliyinin mətbuat katibi İntiqam Hümbətov verib.

Mətbuat katibinin sözlərinə görə, açılış mərasimində İran prezidentinin müşaviri, Mədəniyyət və İslami əlaqələr Təşkilatının sədri Mehdi Müstafəvi, Azərbaycanın mədəniyyət və turizm naziri Əbülfəs Qarayev və İranın İslami irşad və mədəniyyət naziri Seyid Məhəmməd Hüseyni çıxış ediblər.

Çıxışçılar İranda Azərbaycan Mədəniyyət Günlərinin keçirilməsinin əhəmiyyətini, hər iki xalqın oxşar mədəni köklərə və dəyərlərə malik olduğunu, xalqlarımız arasında mədəni irs sahəsində əməkdaşlığın genişləndirilməsi və qorunmasının zəruriliyini vurğulayıblar. Eləcə də Azərbaycanın işğal altında olan ərazilərində mədəni-tarixi abidələrin dağıdılması, Azərbaycanın muğam beşiyi olan Şuşanın işğalda olması təəssüflə diqqətə çatdırılıb.

İ.Hümbətov deyib ki, açılış tədbirində bir sıra ölkələrin diplomatik korpus nümayəndələri, xarici qonaqlar iştirak ediblər.

Rəsmi hissədən sonra baş tutan bədii-ədəbi gecədə Azərbaycan musiqiçiləri xüsusi proqramla çıxış ediblər. Qara Qarayev adına Azərbaycan Dövlət Kamera Orkestri, xalq artisti Mənsum İbrahimov, Anar Şuşalı və başqalarının ifası alqışlarla qarşılanıb. Proqramda "Qarabağ şikəstəsi" də ifa olunub.

İ.Hümbətov açılışda, eyni zamanda, Azərbaycan fotoqraflarının 70-ə yaxın fotosunun və kitabların nümayişinin təşkil olunduğunu da deyib. Sabah isə Azərbaycan Mədəniyyət Günləri Təbriz şəhərində davam etdiriləcək.

İ.Hümbətov onu da bildirib ki, mədəniyyət və turizm naziri Əbülfəs Qarayev dünən İran prezidentinin müşaviri, Mədəniyyət və İslami Əlaqələr Təşkilatının sədri Mehdi Müstafəvi ilə görüşüb. Görüşdə İranda keçirilən Azərbaycan Mədəniyyət Günlərinin əhəmiyyəti, qarşılıqlı mədəniyyət mübadilələrinin rolu xüsusi vurğulanıb. Görüşdə iki ölkə arasında mədəniyyətin müxtəlif - kitab nəşri, kino, nəşriyyat işi sahəsində, incəsənət xadimlərinin qastrollarının və sərgilərin təşkili, əməkdaşlıq məsələləri də müzakirə edilib.

Görüş zamanı İran və Azərbaycanın birgə film istehsalı ilə bağlı razılıq əldə olunub və İranla Azərbaycan arasında 2013-cü ilə qədər mövcud olan mədəni əməkdaşlıq haqqında protokolun icrası ilə əlaqədar xüsusi işçi qrupunun yaradılması barədə razılığa gəlinib, bununla əlaqədar müvafiq tapşırıqlar verilib. Bununla bərabər, danışıqlar nəticəsində İran və Azərbaycan klassiklərinin əsərlərinin həm azərbaycan, həm də fars dilində nəşr olunub yayılması barədə də razılıq əldə olunub.

İ.Hümbətov deyib ki, sentyabrın 26-da Azərbaycan nümayəndə heyətinin İranın islam irşadı və mədəniyyəti naziri Seyid Məhəmməd Hüseyni və İran prezidentinin müavini, Turizm, Mədəni İrs və Əl Sənayesi Təşkilatının sədri Həmid Bəqayi ilə görüşləri olub. Görüşlərdə Azərbaycan dövlət müstəqilliyini bərpa etdikdən sonra İranda ilk dəfə Azərbaycan Mədəniyyət Günlərinin keçirildiyini diqqətə çatdıran Ə.Qarayev qarşılıqlı mədəni tədbirlərin əhəmiyyətindən danışıb.

Mədəniyyət günlərinin Tehran və Təbriz şəhərlərində keçiriləcəyini diqqətə çatdıran nazir növbəti belə mərasimlərin Ərdəbil və İsfahan şəhərlərində də təşkil olunmasını arzu etdiklərini qeyd edib.

H.Bəqayi ilə görüşdə Azərbaycanla İran arasında turizm əlaqələrinin inkişaf perspektivlərindən bəhs edən Ə.Qarayev deyib ki, hər il İrandan Azərbaycana gələn turistlərin sayı əvvəlki illə müqayisədə təxminən 10% artır: "Azərbaycanda turistlərin səmərəli istirahəti üçün beynəlxalq standartlara uyğun şərait yaradılıb".

Ölkələrimiz arasında mədəniyyət və turizm əlaqələrinin genişləndirilməsinin əhəmiyyətindən danışan İran rəsmiləri Azərbaycanla xoş münasibətlər qurulmasına xüsusi əhəmiyyət verildiyini və bu sahədə çox şaxəli əlaqələrin sürətlə inkişaf etdiyini diqqətə çatdırıblar.

Ekspress.- 2010.- 28 sentyabr.- S. 23.