Kitab
- könül dostu
Əvvəlcə kitablardan,
onların könlümüzə bəxş elədiyi mənəvi
dinclikdən, həyəcandan, təlatümdən,
düşünmək həvəsindən və bir də yeni
nə isə öyrənmək istəyindən
danışmaq istədim. Kitabla bağlı qəlbimdə o qədər
söz yarandı ki, onları inci kimi sapa düzmək gərək,
Mənimsə vaxtım az... Yorğun, yuxusuz...
Son günlər bir həqiqəti yenidən dərk elədim ki, ən çətin anda, qəlbində bir fırtına çağlayanda, kimsəyə əlin çatmayanda maraqlı bir kitab sənin ən yaxın, vəfalı dostuna çevrilə bilər. Onunla «səyahət»ə çıxarkən bir də baxırsan, unutmusan mənasız, könül bulandıran dedi-qodu, məişət söhbətlərini. Bircə onu bilirsən ki, «qəhrəman»ınla yol gedirsən, dərədən-təpədən keçib gah sevinir, gah kədərlənir, gah da düşünürsən. Düşünürsən ki, dünya belədi, misraları həmişə könlümdə olan Məmməd Arazın söylədiyi kimi «dünya heç kəsin». Beləcə Allahın qədərincə müəyyən zaman kəsiyində qonağı olduğumuz dünyanın mənalı-mənasız yüklərindən qurtularsan, bir az kənara çəkilərsən, mənəvi cəhətdən zəngin insan olarsan kitab oxuduqca.
Şairin romanı necədi?
...Deyəsən unutmuşam ki, konkret kitab haqqında yazmalıyam. Özü də oxucuların şair kimi tanıdığı Fikrət Qocanın nəsr kitabı barədə. Düzü, «Taleyin ağır taleyi» adlı kitabı əlimə alanda düşündüm ki, görəsən, şairin romanı necədi. Başladım oxumağa, gördüm şairin dili yüyrəkdi, oxunaqlıdı, adamı özünə çəkir, kitabı əlindən yerə qoymaq istəmirsən. Və bir də Taleyin ağır taleyi gecənin bir aləmində məni elə ağlatdı ki, heç yadımdan çıxmaz. Bu da əsərin baş qəhrəmanının keçirdiyi sarsıntıların məncə, ən təsirli məqamı - kulminasiya həddi idi. Taleyi dəli eləmişdilər. Bu da bir insan taleyi, yeniyetmə, cavan bir pöhrə. Onu içindən sındırmağa, ürəyini yaralamağa həmişə hazır olan qəddar adamlar, aravuran qonşular, saxta hörmətinə, keçici vəzifəsinə aldanan rüşvətxorlar. Sonra həyat göstərir ki, bu güvəndiyin dağlar bir gün səni başından elə atar ki, yaşamağa bir ümidin belə qalmaz. Və sən bir saman çöpü belə tapmayanda Taleyin atası kimi özünü öldürməyə çalışarsan və Həsənağa da beləcə özünü asmışdı...
...“Taleyin
ağır taleyi” romanı sovet dövrünün, cəmiyyətinin
insanın mənəvi dünyasına vurduğu zərbələrdən
bəhs edir. Hər
şeyin planla olduğu bir zamanda insan həyatı da plana
salınır. Planlı şəkildə kimi istəsən ləkələmək,
həbsxanaya salmaq və məhv eləmək olar.
Bəs
hekayələri?
Fikrət Qocanın əsərlərində
Böyük Vətən müharibəsinin törətdiyi
müsibətlər konkret həmvətənlərimizin
timsalında incə bir yozumla öz əksini tapır. İstər
«Qoca söyüd də yıxıldı», istərsə də
«Bir gecə» hekayəsində müharibənin insanın
könül dünyasına vurduğu sağalmaz yaralardan bəhs
edilir. Şairin «Şehsaba» adlı novellası isə
xüsusilə yadımda qaldı. Belə ki, gənc
olmasına baxmayaraq həyatın min bir dərd köynəyindən
keçmiş xanımın ailə qurmaq arzusu və bunun
uğrunda onun daxili mübarizəsindən söhbət
açılır.
...Şehsaba qatarda ona baxan gözlərdə
gələcək evinə düşən
işığı görür. Sevinir, arzuları
qanadlanır. Qatardan düşəndə isə bir anda
bütün ümidləri boşa çıxır. Demə,
bayaqdan ona zillənmiş gözlər nəinki onu, dünya
işığını belə görmür.
“- Ay adam, düşməyə kömək et!, - deyə oğlan müraciət etdi.
Şehsaba titrəyə-titrəyə
onun qoluna girdi. Perrona tərəf apardı».
«Nağıl gecəsi» hekayəsində
isə müəllif incə bir məqamdan, insani keyfiyyətlərdən
bəhs edir. Yəni insana insani münasibətdən gedir
söhbət. Əks halda nə başqası nə də
özün xoşbəxt ola bilirsən. Sevimli şair
Çingiz Əlioğlu müsahibəsində deyirdi ki,
xoşbəxt olmaq üçün o qədər də
çox şey lazım deyil. Və bir də onu bilirəm ki,
həmişə narahat, gərgin, əsəbi olan, bənövşəni
tapdayıb ona şeir yazan, şəhid övladının qəlbini
sındırıb Qarabağa mədhiyyələr deyən,
pafosla çığırıb-bağıran adamlar xoşbəxt
olmurlar. Çünki onlar sevilmirlər. Başqalarını
sevməyən adamı kim sevər ki?...
«Taleyin ağır taleyi» kitabı
«Nurlan» nəşriyyatında 2009-cu ildə çapdan
çıxsa da, mən onu yeni oxudum. Yəqin məni
uşaqlara görə bağışlamaq olar. Bir də əsərdə
söhbət gedən mövzular bu gün də aktual olaraq
bizi düşündürürsə, deməli, söz yenə
də təptəzədir. Baxın, nə kitab, nə də
kitabxanalar köhnəlir. Odur ki, hər zaman oxumağa dəyər.
Mina Rəşid
Mədəniyyət.-2011.- 8 aprel.-
S.15.