Qaradağlı qətliamından 19 il ötdü

Ermənistan Silahlı Qüvvələrinin Xocavənd rayonunun Qaradağlı kəndini işğal etməsindən 19 il ötdü. "Dağlıq Qarabağın Azərbaycanlı İcması" İctimai Birliyi ildönümlə bağlı dünən tədbir keçirib.

Xocavənd Rayon İcra Hakimiyyətinin başçısı Eyvaz Hüseynov bildirib ki, 1992-ci il fevralın 17-də Qaradağlı kəndi qeyri-bərabər döyüşdə ermənilər tərəfindən işğal edilib. İşğal zamanı 91 azərbaycanlı qətlə yetirilib, 118-i əsir götürülüb. Əsirlərdən 50 nəfəri Xankəndi və Əsgəranda 2 aydan artıq saxlanılıb. Əsirlərdən 68-i öldürülüb, 50 nəfəri isə böyük çətinliklərlə əsirlikdən xilas edilib (APA).

Erməni işğalı nəticəsində Qaradağlı kəndində 200 yaşayış evi, 1 mədəniyyət evi, orta məktəb, xəstəxana və digər obyektlərin dağıdıldığını deyən E.Hüseynov, bu vəhşiliklərin beynəlxalq terrorçu, ASALA-nın rəhbərlərindən olan Monte Melkonyan tərəfindən həyata keçirildiyini vurğulayıb (Ermənilərin milli qəhrəman adı verdikləri M.Melkonyan 1993-cü ilin iyununda Azərbaycan əsgərləri tərəfindən layiqli cəzasını alıb).

Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov isə Qaradağlı faciəsinin Xocalı faciəsi öncəsi xəbərdarlıq olduğunu söyləyib və bu hadisənin qarşısının alınmamasına görə o vaxtkı siyasi rəhbərliyi günahlandırıb: "Bu vəhşilikdən nəticə çıxararaq ermənilərin nəyə hazırlaşdığını bilmək olardı. Təəssüf ki, Azərbaycanın o vaxtkı rəhbərliyi, hüquq-mühafizə orqanları, siyasətçiləri bu faciədən nəticə çıxara bilmədilər və Xocalı faciəsi baş verdi".

Xatırladaq ki, erməni hərbi birləşmələri Rusiya Silahlı Qüvvələrinin Xankəndidə dislokasiya olunan 366-cı motoatıcı alayının hərbi texnikasının və canlı qüvvəsinin dəstəyi ilə 1992-ci il fevralın 15-dən başlayaraq, azərbaycanlılar yaşayan Qaradağlı kəndinə hücum edib. İki gün çəkən ağır döyüşdən sonra mühasirəni yaran ermənilər fevralın 17-də kəndi işğal ediblər.

Ekspress.-2011.- 18 fevral.- S.4.