Mir Cəfərin məhkəməsi necə
hazırlanmışdır
(əvvəli
ötən şənbə saylarımızda)
Məmmədəmin Şəkinskinin təşəbbüsü
ilə 1965-ci ildə tikilmiş Azərbaycan
Respublikası Milli Arxiv
İdarəsinin binası.
Azərbaycanda ötən
əsrin ən qalmaqallı və indiyədək ətrafında
söz-söhbətlərin dolaşdığı məhkəmələrdən
biri Mir Cəfər Bağırovun məşhur məhkəməsi
olmuşdur. Tanınmış yazıçı-tədqiqatçı
Teyyub Qurban bu məhkəmə, onun necə və kimlərin
sifarişi ilə hazırlanmasını arxiv materialları əsasında
araşdırıb.
MÜƏLLİFDƏN.
Fikrimizcə, digər peşə bayramları kimi, Azərbaycanda
arxiv işçilərinin də bayram günü
keçirilsə, yaxşı olardı. Hər il avqustun 31-də
arxiv işçilərinin əməyi qiymətləndirilə,
onlara mükafatlar, fəxri adlar, orden və medallar verilə
bilər.
Qocaman və
ağbirçək arxiv işçilərinə fərdi təqaüdlərin
kəsilməsinə, maaş və pensiyalarının
artırılmasına da ehtiyac var. Vaxtilə Məmmədəmin
Şəkinski bir təklif vermişdi: Azərbaycanın "Əməkdar
arxiv işçisi" fəxri adı təsis edilməlidir.
Hər mərkəzi arxivin internet səhifəsi açılmalı,
"Azərbaycan arxivi" jurnalının nəşri bərpa
olunmalı və s. Qayıdaq altmışıncı illərin
arxiv materiallarının araşdırılmasına.
1960-cı il iyun ayının 21-də Azərbaycan SSR Nazirlər
Soveti sədrinin müavini Əli Kərimovun adına
aşağıdakı rəsmi məktub daxil olmuşdur:
"Azərbaycan SSR
nazirlər Soveti yanında arxiv idarəsi respublika nazirliklərində,
mərkəzi idarə və müəssisələrdə
arxiv işinin qeyri-qənaətbəxş vəziyyətdə
olduğunu nəzərə alaraq, Sizdən xahiş edir ki, bu
il iyun ayının axırlarında nazirliklərin, dövlət
idarələrinin, mətbuat və arxiv orqanları nümayəndələrinin
geniş müşavirəsi keçirilsin. Müşavirənin
aşağıdakı gündəliyi müzakirəyə
çıxarılır:
"Respublikaların
nazirliklərində və dövlət idarələrində
Arxiv sənədlərinin
mühafizəsi və istifadə edilməsində ciddi
nöqsanlar haqqında".
Müşavirənin
gündəliyini, iştirakçıların
siyahısını məktuba əlavə edirəm.
Azərbaycan SSR Nazirlər
Soveti Yanında Arxiv İdarəsinin rəisi M.Şəkinski."
Əli Kərimov
M.Şəkinskinin məktubuna təkcə bir düzəliş
etmişdir:
Müşavirə
iyunun sonunda yox, iyulun 15-də keçirilsin.
Həmin gün səhər
saat on tamamda respublikanın bütün nazir müavinləri,
habelə Dövlət Plan Komitəsi sədrinin müavini,
Sovet Nəzarət Komissiyası sədrinin müavini, Ali və
Orta İxtisas Komitəsinin sədri, Tikinti və Arxitektura
Komitəsinin sədri, Taxıl Məmulatları Baş
İdarə rəisi, Azərbaycan geologiya idarəsinin rəisi,
Mərkəzi statistika idarəsinin rəisi, respublika prokuroru,
xarici ölkələrlə mədəni əlaqə cəmiyyətinin
sədri, Bakı şəhər icraiyyə komitəsinin, Azərittifaqın,
Gəmiçilik idarəsinin, Ali Məhkəməsinin sədr
müavinləri və başqaları - əlli beş nəfər
hökumət binasının iclas zalında
toplaşmışdı. Müşavirəni giriş
sözü ilə Əli Kərimov yoldaş
açmışdır.
ƏLİ KƏRİMOV
- Respublikanın nazirliklərində, dövlət idarələrində
və müəssisələrində arxiv işinin
yaxşılaşdırılması tədbirlərinə aid
bugünki müşavirəmiz Azərbaycan hökuməti tərəfindən
çağırılmışdır. Məsələ
bundadır ki, son zamanlarda respublikada arxiv işinin
yaxşılaşdırılması ilə əlaqədar Azərbaycan
Kommunist Partiyası Mərkəzi Komitəsi, Azərbaycan
hökuməti, Azərbaycan SSR Ali Soveti Rəyasət Heyəti
və Bakı Şəhər Komitəsinin müvafiq qərarlarına
baxmayaraq, bir çox nazirlik və dövlət idarələri
bu məsələyə lazımi diqqət yetirmirlər.
Respublikanın direktiv orqanlarının qərarlarına niyə
nazirlik və dövlət orqanlarının rəhbərləri
laqeydcəsinə yanaşırlar? Müşavirəmiz bu
suala cavab verməlidir. Bunu da müşavirə
iştirakçılarının nəzərinə
çatdırıram ki, xeyli vaxtdır ki, Azərbaycan SSR
Daxili İşlər Nazirliyi nəzdindəki arxiv idarəsi
hökumətin qərarı ilə respublikada Nazirlər Soveti
yanında Arxiv İdarəsinə çevrilmiş və Məmmədəmin
Şəkinski yoldaş onun rəisi vəzifəsində fəaliyyət
göstərməkdədir. Məruzə üçün
sözü ona verirəm.
M.ŞƏKİNSKİ
- Yoldaşlar, respublikamız tarixində ilk dəfədir ki,
nazirlik və dövlət idarələrində arxiv işinin
vəziyyətinə dair məsələ Nazirlər Soveti tərəfindən
çağırılmış müşavirədə
müzakirə olunur. Bu, təsadüfi deyildir. Çünki
arxiv ideoloji işin çox mühüm sahəsidir. Arxivlərimizdə
xalqımızın on doqquzuncu əsrdən başlayaraq bu
günədək davam edən çox zəngin təcrübəsi,
elmi nailiyyətləri və mənəvi tarixi hifz
olunmuşdur. Bununla belə, təəssüflə qeyd etməliyəm
ki, respublika nazirliklərinin əksəriyyətində,
dövlət idarələrində, müəssisələrdə,
təşkilatlarda arxiv işinə münasibət
yarıtmazdır. Respublika Arxiv İdarəsi əməkdaşlarının
müəyyən etdikləri faktlara diqqətinizi cəlb etmək
istəyirəm.
Azərbaycan neft sənayesində
ləğv edilmiş 200 müəssisə və idarənin
bütün arxiv sənədləri izsiz-soraqsız yoxa
çıxmışdır. 1920-1921-ci illərdə Azərbaycan
Neft Komitəsinin materiallarının cüzi bir hissəsi
saxlanılmış, qalanları məhv edilmişdir. Azərneftin
bəzi zavodlarında arxiv materiallarına
özbaşınalıq bu gün də davam etməkdədir.
Məsələn, müəyyən etmişik ki, Stalin
adına zavodda 10 kisəyə yığılmış qiymətli
arxiv sənədi zavoddan çıxarılaraq
yandırılmışdır.
Kənd təsərrüfatı
nazirliyində nazirliyin tabeliyindəki bir sıra idarə və
bölmələrin materialları məhv edilmişdir. Nazirliyin
arxivi rütubətli zirzəmidə yerləşdirilmişdir.
Sənədlər qarmaqarışıq vəziyyətdə
bir tərəfə atılmış, hörümçək
toru basmış, qovluqlarda ziyanverici həşəratlar yuva
salmışlar. Nazirliyin başçıları, ilk növbədə
nazir Poladov yoldaş təcili tədbirlər görməlidirlər.
Bunu da qeyd etməliyəm ki, Poladov yoldaş indiyədək
bir dəfə də olsun kabintindən aşağıya enərək
zirzəmidəki arxivə baş çəkməmişdir.
Kənd təsərrüfatı
nazirliyində qiymətli arxiv sənədlərinin xilas
olunmasına Arxiv İdarəsinin əməkdaşları iki
ay vaxt sərf etmişlər. 700 arxiv qovluğu dövlət
arxivində saxlanılmaq üçün tərtib
edilmişdir. Lakin hələ də 1946-cı ildən
sonrakı dövrə aid sənədlər nazirliyin
şöbələrində yığılıb
qalmaqdadır.
Azərbaycan SSR Maarif
Nazirliyinin Arxivi olduqca pis haldadır. Baş arxiv idarəsinin əməkdaşları
üç ay ərzində burada Azərbaycanın maarif və
mədəniyyətinin tarixini özündə əks etdirən
qiymətli materiallar aşkara çıxarmışlar. Zirzəmidə
palçıq içərisində qalmış sənədlərdə
1920-1945-ci illəri əhatə edən arxiv sənədləri
idi. Biz öz qüvvəmizlə və öz nəqliyyat vasitəmizlə
zəngin sərvəti zirzəmidən çıxararaq
maşınlara yüklədik və Mərkəzi Dövlət
Arxivinə gətirdik. Arxiv İdarəsinin elmi işçiləri
nazirliyin arxiv materiallarının qaydaya salınmasına 98
iş günü sərf etdilər. 40 min müəllim
ordusuna rəhbərlik edən bir nazirliyin arxivinin bu
dözülməz vəziyyətinə son qoyulmalıdır.
Belə hesab edirəm ki, öz elmi işində arxiv sənədlərinə
dəfələrlə istinad etmiş nazirimiz, professor Mehdizadə
yoldaş, nəhayət, hərəkətə gələcəkdir.
Respublikanın səhiyyə
nazirliyində də vəziyyət qanedici deyildir. İdarəmizinin
əməkdaşları burada 86 iş günü ərzində
2.500 sənədi saxlanılmaq üçün dövlət
arxivinə gətirmişlər. Acınacaqlısı budur ki,
1920-ci ildən 1935-ci ilə aid bütün arxiv materialları
tamamilə itirilmişdir. Azərbaycanın səhiyyə
tarixinə bundan ağır zərbə olarmı?
Düzdür, nazir müavini Cavadov yoldaş bu il iyun
ayının 15-də arxivin qaydaya salınması barədə
əmr imzalamışdır. Lakin bir ay keçməsinə
baxmayaraq, əməli iş görülməmişdir.
Azərbaycan SSR Ədliyə
Nazirliyi ləğv olunduqdan sonra arxivi respublikanın Ali Məhkəməsinə
verilmişdir. Gözləmək olardı ki, Ali Məhkəmə
keçmiş nazirliyin arxivini qaydaya salacaqdır. Ali Məhkəmə
isə heç öz arxivini də sahmana
salmamışdır. Məlum olduğu kimi, bir neçə
müttəfiq respublikada Ali Məhkəmənin birləşmiş
arxivi yaradılmış, bütün xalq məhkəmələrinin
arxiv sənədləri bir yerdə cəmləşdirilmişdir.
Bizdə isə Bakı şəhər xalq məhkəmələrinin
və rayon məhkəmələrinin arxiv sənədlərinin
bir mərkəzdə birləşdirilməsi məsələsini
Əkbərov və Musayev yoldaşlar
süründürürlər.
Neft sənayesinin
respublikamız üçün nə qədər
böyük əhəmiyyət kəsb etdiyini müşavirə
iştirakçılarına izah etməyə lüzum yoxdur. Azərbaycan
Neft-Kimya zavodları İdarəsinin arxivi 1934-cü ildə
yaradılmışdır. Bu, böyük arxivdir. Lakin idarə
rəisinin müavini Qareviçevin təqsiri üzündən
1934-1944-cü illəri əhatə edən sənədlərin
qeydiyyatı indiyədək başa
çatdırılmamışdır. Qureviçevin
özbaşınalığı həddini
aşmışdır. Belə ki, bizim köməkliyimizi qəbul
etməməsi bir yana, əməkdaşlarımızı
kobudcasına qarşılamışdır. Azərbaycanın
neft sənayesinin sənədli tarixini belə bir rəis
müavininə tapşırmaq olarmı? Arxiv İdarəsi əməkdaşlarının
müəyyən etdikləri bir neçə faktı nəzərinizə
çatdırıram. Şmidt adına maşınqayırma
zavodunda 1920-ci ildən 1930-cu ilədək dövrdəki arxiv
sənədləri yoxa çıxmışdır. Bu barədə
işçilərimizə zavodun direktoru müavini Ter-Avakov
görün nə söyləmişdir: "Zavodumuzun arxivi
yoxdur. Haraya istəyirsiniz, gedin şikayət edin!" Belələri
üçün arxiv gərəksiz kağız
tullantısıdır.
Bir neçə kəlmə
də ali məktəblərimizin arxivləri barədə.
Məşədibəy
Əzizbəyov adına Azərbaycan Sənaye İnstitutu bu il
qırx illiyini bayram etməyə hazırlaşır. Ancaq
arxivində 1920-ci ildən 1925-ci ilədək sənədlər
yoxdur. Nə üçün? Qalan materiallar isə institutun zirzəmisinə
atılmışdır. Vaxtilə AZ.Sİ-də oxumuş Əbdürrəhim
bəy Haqverdiyevin diplom işi də kağız qalaqları
arasındadır. AZ.Sİ-nin direktoru Saleh Qocayev
respublikamızın ən güclü, mədəni şəxsiyyətlərindən
biridir, AZ.Sİ-nin arxivi isə ən pis haldadır...
(ardı var)
Teyyub Qurban
Ekspress.- 2011.-
3-5 sentyabr.- S. 15.