Texnoparklar güzəştlərdən istifadəyə başlayır

Dövlət başçısının Vergi Məcəlləsində dəyişiklikləri nəzərdə tutan qanunu təsdiqləməsindən sonra sənaye və texnologiya parklarında vergitutma ilə bağlı dəyişikliklər qüvvəyə minib.

Vergi Məcəlləsində edilən dəyişikliklərə əsasən, sənaye və texnologiyalar parklarında sahibkarlıq fəaliyyəti göstərən fiziki şəxslərin gəlirlərinin 7 il müddətinə gəlir vergisindən, parkların idarəedici təşkilatının və operatorunun mənfəətinin parkın infrastrukturunun tikintisinə və saxlanılmasına yönəldilən hissəsi müddət qoyulmadan mənfəət vergisindən, parkların rezidenti olan hüquqi şəxslərin bu fəaliyyətdən əldə etdikləri gəlirləri 7 il müddətinə mənfəət vergisindən, sənaye və texnologiyalar parklarının infrastrukturunun, istehsal sahələrinin yaradılması və tikintisi məqsədilə idarəedici təşkilat və operator tərəfindən idxal edilən texnikaların, texnoloji avadanlıqların və qurğuların idxalının müddət qoyulmadan ƏDV-dən, parkların rezidenti olan şəxslər tərəfindən qeyd olunan məqsədlər üçün gətirilən texnika, texnoloji avadanlıq və qurğuların idxalının 7 il müddətinə ƏDV-dən azad edilir.

Eyni zamanda, parkların idarəedici təşkilatı və operatoru, parkların rezidenti olan hüquqi və fiziki şəxslər parklardakı əmlaka və istifadə etdikləri torpaqlara görə əmlak və torpaq vergilərindən 7 il müddətinə, parkların idarəedici təşkilatı və operatoru parklardakı əmlaka və istifadə etdikləri torpaqlara görə əmlak və torpaq vergilərindən müddət qoyulmadan azad olunur.

Belə parklarda vergi güzəştlərindən faydalanmaq üçün iş və xidmət 7 il ərzində təqdim olunmalıdır. Özündən əvvəlki şirkətlərin başladığı işi davam etdirəcək şirkətlərə vergi güzəştləri həmin müddətin qalan hissəsi ərzində veriləcəkdir. Sənaye və texnologiyalar parkında vergi güzəştləri hər başlanılan yeni layihə üzrə isə ayrıca tam müddətə veriləcək.

Sənaye, yaxud texnologiyalar parklarında (texnoparklar) fəaliyyət göstərəcək hüquqi və fiziki şəxslər vergi güzəştlərinin tətbiq olunduğu dövrdə sənaye, yaxud texnologiyalar parklarından kənarda fəaliyyət göstərdikdə həmin fəaliyyətlə bağlı gəlirlərin və xərclərin uçotunu ayrıca aparmalıdır.

Bu zaman sənaye, yaxud texnologiyalar parklarının rezidenti bu parklardan kənarda göstərdiyi fəaliyyətə görə əldə etdiyi gəlirlərdən vergiləri Vergi Məcəlləsi ilə müəyyən edilmiş ümumi qaydada ödəyəcəklər.

Qeyd edək ki, Azərbaycan dövləti sənaye və texnologiyalar parklarına vergi güzəştləri tətbiq etməklə əslində bu sahədə fəaliyyət göstərəcək sahibkarlıq subyektlərinə maliyyə və iqtisadi dəstək göstərmiş olacaq. Azərbaycan Respublikası Vergilər Nazirliyinin Vergi siyasəti və strateji araşdırmalar Baş İdarəsinin rəisi Akif Musayevin şərhinə görə, sənaye və texnologiyalar parklarının yaradılması sahəsində xarici ölkələrin təcrübəsi göstərir ki, dünya iqtisadiyyatında qloballaşma proseslərinin sürətləndiyi və bazara çıxışla bağlı rəqabət mübarizəsinin gücləndiyi bir şəraitdə bu sahədə fəaliyyət göstərən sahibkarlıq subyektlərinə dövlət dəstəyinin verilməsi ölkə iqtisadiyyatının dayanıqlı inkişafını təmin edən müsbət amillərdən biridir. Sənaye və texnologiya parkları inkişaf etmiş ölkələrdə, o cümlədən ABŞ-da, Yaponiyada və Çində geniş şəkildə yayılmışdır və həmin ölkələrin iqtisadiyyatında əhəmiyyətli rol oynayır.

A.Musayevin fikrincə, sənaye və texnologiya parklarının iqtisadi inkişafdakı müsbət rolu barədə beynəlxalq təcrübə nəzərə alınmaqla, Azərbaycanda da bu sahənin inkişaf etdirilməsi dövlətin həyata keçirdiyi iqtisadi siyasətin tərkib hissələrindən birinə çevrilib. İdarə rəisi qeyd edib ki, Azərbaycan prezidenti tərəfindən imzalanan "Azərbaycan 2020: gələcəyə baxış" İnkişaf Konsepsiyasının istiqamətlərindən biri də innovativ sahibkarlığın inkişaf etdirilməsini, elmtutumlu məhsulların və texnologiyaların işlənilməsi və tətbiqi üçün texnoparkların və innovasiya zonalarının yaradılmasını nəzərdə tutur.

Azərbaycanda artıq Bakı şəhərində Balaxanı Sənaye Parkı, Sumqayıt şəhərində Kimya Sənaye Parkı və Sumqayıt Yüksək Texnologiyalar Parkı yaradılıb.

Vasif

Ekspress.-2013.-25 aprel.-S7.