Zaman və lideri

"Azərbaycan xalqını əmin etmək istəyirəm ki, mən bundan sonra da ölkəmizin hərtərəfli inkişafı, xalqımızın rifahı üçün əlimdən gələni əsirgəməyəcəyəm, doğma xalqımıza bundan sonra da sədaqətlə xidmət edəcəyəm...". "On il bundan əvvəl birinci dəfə prezident vəzifəsinə seçiləndə söz vermişdim ki, əgər xalq mənə etimad göstərərsə, mən ulu öndər Heydər Əliyev siyasətinə sadiq qalacağam. Şadam ki, on il ərzində qarşıda duran bütün vəzifələr uğurla icra edildi".

Bu sözlər Azərbaycan Respublikasının Prezidenti İlham Əliyevin andiçmə mərasimindəki nitqindəndir. İlham Əliyevin yenidən dövlət başçısı seçilməsi xalqın iradəsini tam şəkildə əks etdirirdi: bu, azərbaycanlıların öz liderinə etimadı, onun son on il ərzində gördüyü işlərə verdiyi yüksək qiymət idi. "Azərbaycan xalqı görülmüş işlərə öz qiymətini, öz səsini verdi. Eyni zamanda, bu səsvermədə gələcəklə bağlı öz fikirlərini, arzularını ifadə etdi", - deyə prezident andiçmə mərasimində bəyan etmişdi.

Bu on ildəsə böyük uğurlara imza atılıb, inanılmaz təşəbbüslər reallığa çevrilib. Ən əsası risklər və təhlükələrlə dolu müasir dünyada Müstəqilliyimiz möhkəmlənib, ölkəmizdə ictimai-siyasi sabitlik qorunub. Bu fonda iqtisadi inkişafımızda sıçrayışlara nail olunub. Siyasi sabitlik və iqtisadi inkişaf dinamikası isə bütün istiqamətlər üzrə islahatlar aparmağa, fantastik sayılan təşəbbüslərin, layihələrin gerçəkliyə çevrilməsinə, Azərbaycanın beynəlxalq arenada söz sahibi olmasına və sonucda ölkəmizin daha da güclənməsinə real zəmin yaradıb.

Məhz bütün bunların, "təşəbbüsləri gerçəkliyə çevirən" liderin sayəsində dünyanın siyasi xəritəsində Azərbaycan dinamik, müasir, öz gücünə arxalanan və kimsədən asılı olmayan azsaylı dövlətlərdən birinə çevrilib.

***

Dekabrın 24-ü dövlət başçımızın ad günüdür, cənab prezidentin 52 yaşı tamam olur.

İlham Heydər oğlu Əliyev 1961-ci il dekabrın 24-də Bakı şəhərində anadan olub. 1967-1977-ci illərdə Bakı şəhərində orta məktəbdə oxuyub. 1977-ci ildə Moskva Dövlət Beynəlxalq Əlaqələr İnstitutuna (MDBƏİ) daxil olub. 1982-ci ildə MDBƏİ-ni bitirən İ.Əliyev həmin institutun aspiranturasına daxil olub, 1985-ci ildə tarix elmləri namizədi dərəcəsini alıb. 1985-1990-cı illərdə MDBƏİ-də müəllim işləyib. 1991-1994-cü illər ərzində özəl biznes sahəsində çalışıb və bir sıra istehsal-kommersiya müəssisələrinə rəhbərlik edib.

1994-cü ildən 2003-cü ilin avqust ayınadək Azərbaycan Respublikası Dövlət Neft Şirkətinin vitse-prezidenti, sonra isə birinci vitse-prezidenti olub. "Heydər Əliyevin neft strategiyası"nın həyata keçirilməsində fəal iştirak edib.

Suveren Azərbaycanın neft siyasətinin geosiyasi aspektlərinə dair bir sıra tədqiqat işlərinin müəllifidir. Siyasi elmlər doktorudur.

O, 1995-ci və 2000-ci illərdə Milli Məclisə üzv seçilib.

1997-ci ildən Azərbaycan Milli Olimpiya Komitəsinin prezidenti olan İlham Əliyev Olimpiya hərəkatının inkişafındakı xidmətlərə görə Beynəlxalq Olimpiya Komitəsinin ali ordeni ilə təltif edilib. 1999-cu ildə YAP sədrinin müavini, 2005-ci ildəsə partiyanın sədri seçilib. 2001-2003-cü illlərdə AŞPA-da Milli Məclisin nümayəndə heyətinin rəhbəri olan İ.Əliyev 2003-cü ilin yanvarında AŞPA sədrinin müavini seçilib. 2003-cü ilin avqustunda baş nazir olan İ.Əliyev həmin il oktyabrın 15-də keçirilən prezident seçkisində qalib gəlib. Prezident seçkilərində seçicilərin 76%-dən çoxu İlham Əliyevin lehinə səs verib və o, 2003-cü il oktyabrın 31-də vəzifəsinin icrasına başlayıb.

2004-cü ilin aprelində AŞPA-nın fəaliyyətində fəal iştirakına və Avropa ideallarına sədaqətinə görə AŞPA-nın fəxri üzvü diplomu və AŞPA medalı ilə təltif edilib.

2008-ci il oktyabrın 15-də keçirilən seçkilərdə seçicilərin 88,73% səsini qazanan İlham Əliyev ikinci dəfə Azərbaycan Respublikasının Prezidenti seçilib və 2008-ci il oktyabrın 24-də vəzifəsinin icrasına başlayıb.

2013-cü il oktyabrın 9-da keçirilən seçkilərdə tam və şəksiz qələbə qazanan İlham Əliyev üçüncü dəfə Azərbaycan Respublikasının prezidenti seçilib və oktyabrın 19-dan vəzifəsinin icrasına başlayıb.

Azərbaycan, rus, ingilis, fransız və türk dillərini mükəmməl bilir.

Evlidir. Üç övladı, iki nəvəsi var.

***

İlham Əliyev siyasətinin başlıca xətti milli maraqlarımızın qorunması, lideri olduğu ölkənin beynəlxalq arenada nüfuzunun artması və Vətənin siyasi-iqtisadi-mədəni planda daha da çiçəklənməsidir.

O, yeni əsrin, prioritetləri qəfil və sərt şəkildə dəyişməyə meylli dünyanın çağırışlarına cavab verməyə qadir liderdir.

XXI əsr başlayandan dünya sosial-siyasi təlatümlər, sarsıntılar, böhranlar, çəkişmələr və cürbəcür risklərdən keçir, planetimizin nizam və simasının necə şəkillənəcəyi hələ də bəlli deyil. Qlobal çaxnaşmalar və supergüclərin qaranlıq oyunları fonunda riskli coğrafiyada yerləşən bir ölkədə milli dəyər və maraqların keşiyində durmaqla daxili və xarici siyasət yürütmək, mövqe nümayiş etdirmək ikiqat çətin missiyadır. Üstəlik, Azərbaycan lideri yalnız gərgin situasiyalardan çıxış yolu, daxili və xarici problemlərə açar tapmaqla yetərlənmir, novasiyalara həssas olan, irəlini - Azərbaycanın perspektivlərini düşünən bir rəhbər kimi İlham Əliyev Vətən və Xalq naminə olan missiyası ilə qlobal miqyasda bir dövlət kimi Azərbaycanın üfüqlərini daha da genişləndirir. Zira regional və qlobal məkanda sözünü eşitdirməsən, söz sahibi olmasan, prezidentin dediyi kimi hücum diplomatiyasına əl atmasan, ölkə hüdudlarında qalmaqla milli maraqları müdafiə etmək, Azərbaycan gerçəklərini dünyaya çatdırmaq mümkün deyil. Məhz risk və təhdidlərlə dolu beynəlxalq arenada Azərbaycan liderinin çəkinməz və davamli siyasətinin nəticəsidir ki, Azərbaycan beynəlxalq arenada müstəqil siyasət aparır, prezidentin sözləri ilə desək "biz heç kimdən asılı deyilik, öz hesabımıza yaşayırıq, Azərbaycan xalqının yaratdığı maddi imkanlar, dəyərlər hesabına yaşayırıq".

Biz indi kimsədən pay ummuruq, əksinə Azərbaycanın neft-qazından pay uman, investisiya gözləyən ölkələr var.

Dövlət müstəqilliyimizin memarı Heydər Əliyev idisə,

ötən əsrin 90-cı illərindəki xaosdan ölkəmizi ulu öndər xilas edib inkişaf yoluna çıxırmışdısa, bu təməl üzərində Azərbaycanın bir dövlət kimi təhlükəsizliyinin daha da möhkəmlənməsi, iqtisadi sıçrayışı, dünyadakı nüfuzu və mahiyyətcə qlobal sayıla biləcək misilsiz və nəhəng regional layihələrin həyata keçirilməsi İlham Əliyevin adı ilə bağlıdır.

Azərbaycan lideri daim ölkəsinin və xalqının ümiqlərini böyüdür, plankanı yuxarı qaldırır, hər uğurdan sonra yeni yüksək hədəf müəyyən edir: yeni zirvələrə yürüş və fəth - bu, dövlət başçısının fəaliyyət prinsipidir. Kimsəyə sirr deyil ki, cənab prezident hədəfə çatmaqda, milli maraqlar naminə layihə və ideyaları gerçəkləşdirmək yolunda prinsipial siyasət yürüdür, heç bir əngəl tanımır.

Son on ildə biz dəfələrlə gerçəkləşməsi inanılmaz görünən layihə və təşəbbüslərin baş tutmasına, siyasət, diplomatiya, iqtisadiyyyat, mədəniyyət və idman sahəsində əldə edilən uğurlara dəfələrlə şahid olmuşuq. Azərbaycan BMT Təhlükəsizlik Şurasının üzvü olmaqla böyük diplomatik zəfərə imza atıb. "Eurovision" mahnı yarışına ev sahibliyi etməklə dünyanın diqqətini özünə cəlb edib. Türkiyə ilə TransAnadolu qaz kəməri (TANAP) kimi bütün dünyaya səs salan, hətta transmilli neft-qaz şirkətlərinə qəfil sürpriz olan layihəni və Azərbaycan qazını Avropa bazarlarına çıxaracaq TransAdriatik qaz kəmərini (TAP) gerçəkləşdirmək ərəfəsindəyik.

Bu il dekabrın 17-də Bakıda daha bir tarixi hadisəyə imza atıldı - "Şahdəniz" layihəsinin ikinci mərhələsi üzrə yekun investisiya qərarı imzalandı. Bu layihə gələcəkdə ölkəmizin müstəqil inkişafına daha bir töhfə olacaq, həm də Avropanın enerji təhlükəsizliyinin təmin edilməsində rol alacağıq.

2015-ci ildəsə məhz Bakıda Birinci Avropa Olimpiya Oyunları keçiriləcək. İlham Əliyev artıq bəyan edib ki, bu Oyunların hansı standartlara cavab verəcəyini Azərbaycan müəyyən edəcək: "Biz istəyirik ki, bu oyunları ən yüksək səviyyədə, Yay Olimpiya Oyunları səviyyəsində keçirək və buna imkan var".

Azərbaycanın hazırda gəlib çatdığı səviyyə, artan iqtisadi potensialı, düşməndən qat-qat üstün olan hərbi gücü göz önündədir. Nəhəng layihələr, siyasi, iqtisadi, eləcə də cəmiyyət həyatındakı uğurlar, xarici siyasət kursu, milli təhlükəsizliklə, neft-qazla bağlı strategiya, ictimai-siyasi sabitlik, dinamik iqtisadi inkişaf, əhalinin sosial rifahının artması, yoxsulluğun azaldılması, sahibkarlığın inkişafı, milli-mənəvi dəyərlərimizə qayğı və s. sahələrdə atılan addımlar Azərbaycanı regionun liderinə çevirib.

Zamanın saatı və bölgədə gedən siyasi proseslər Azərbaycanın xeyrinə işləyir. Ermənistanın qeyri-konstruktiv, vasitəçi superdövlətlərin ikili oyunlarına rəğmən, Azərbaycan Dağlıq Qarabağ danışıqlarında prinsipial mövqeyini davam etdirir. Prezidentin mövqeyi qətidir: Ermənistan-Azərbaycan Dağlıq Qarabağ münaqişəsi Azərbaycanın ərazi bütövlüyü çərçivəsində öz həllini tapmalıdır.

Ermənistan isə bütün regional layihələrdən təcrid edilib, havadarlarının dilənçi payı olmasa, bu erməni dövləti gec-tez iflas edəcək.

Bu faktdır ki, Cənubi Qafqazda heç bir regional layihə Azərbaycan və onun liderinin fikri öyrənilmədən, onunla məsləhətləşmədən reallaşdırılmır. Artıq bütün dünya, Qərb liderləri mürəkkəb bir regionda balanslaşdırılmış və uğurlu xarici siyasət yürüdən Azərbaycanın etibarlı tərəfdaş olduğunu etiraf edirlər.

Bu günün Azərbaycanı zamanın çağırışlarına cavab verə-verə yeni-yeni hədəflərə doğru irəliləyir. "Ekspress" qəzetinin kollektivi cənab Prezidenti ad günü münasibətilə təbrik edir, ona cansağlığı, uzun ömür və böyük missiyasını yerinə yetirməkdə - Azərbaycanı daha zəngin ölkəyə, qüdrətli dövlətə çevirmək yolundakı ali fəaliyyətində böyük uğurlar arzulayır.

A.Xəlil

Ekspress.-2013.- 24 dekabr.- S.3.