Gənclərin İKT bilikləri artır

Bakıda Mobil Texnologiyaları üzrə Dünya Gənclər Forumu keçirildi

İnformasiya və kommunikasiya texnologiyalarının inkişaf etdirilməsi

Bakıda Mobil Texnologiyaları üzrə Dünya Gənclər Forumu keçirilib. İki gün davam edən tədbirdə Gənclər və İdman nazirinin müavini İntiqam Babayev, İnformasiya və Kommunikasiya Texnologiyaları nazirinin müavini İltimas Məmmədov, "KnowledgeFox Gmbh" şirkətinin təsisçisi Peter A.Bruk, Xəzər İnvestisiya Mərkəzinin prezidenti Elşən Musayev, Dünya Bankının infoDev proqramının nümayəndəsi Haydi Humala, 20-dən çox ölkənin nümayəndəsi və gənclər iştirak ediblər.

Gənclər və İdman nazirinin müavini İntiqam Babayevin sözlərinə görə, gənclər bu gün müasir texnologiyaya daha çox yanaşmalıdır. Nazir müavini bildirib ki, gənclər bu texnologiyadan daha səmərəli və öz biliklərinin artırılması üçün istifadə etməlidir. "Bildiyiniz kimi cənab prezident bu ili "İKT ili" elan edib. "İKT ili" üçün bu tədbirin əhəmiyyətli olduğunu düşünürəm. Bu gün elə gənclər yetişir ki, onlar nəinki Azərbaycanda, dünyanın bütün ölkələrində öz sözlərini deyəcəklər" deyən İ.Babayev bundan başqa, bu il ərzində Azərbaycanda çoxlu tədbirlərin keçiriləcəyini vurğulayıb. Dediyinə görə, burda hədəf gəncləri yeni texnologiya ilə daha ətraflı tanış etməkdir.

Bu il Azərbaycanın ilk milli peykinin orbitə qalxdığını da xatırladan Babayev hesab edir ki, Azərbaycan gəncləri bu sahə üzrə daha da çox uğurlar əldə etməlidirlər.

Rabitə və informasiya texnologiyaları nazirinin müavini İltimas Məmmədov 2013-cü ilin ölkədə "İKT ili" elan olunduğunu xatırladaraq, bu il ərzində sözügedən sahədə bir sıra yeniliklərin gözlənildiyini deyib. Son illər ərzində bütün dünyada, o cümlədən Azərbaycanda mobil rabitə sahəsinin sürətlə inkişaf etdiyini bildirən nazir müavini onu da deyib ki, mobil rabitə xidmətlərindən istifadə edənlərin sayı da dəfələrlə artıb. Bu il Azərbaycanda mobil telefonların işlədilməsinin 20 ilinin tamam olduğunu deyən Məmmədovun sözlərinə görə, bu illər ərzində mobil telefonlar daha çox inkişaf edib: "İndi bu dəyişmə prosesi davam edir. Mobil telefonların inkişafı çox sürətlə gedir. Bu baxımdan gənclərimizin bu sahə üzrə daha ətraflı bilik öyrənməsi ölkəmizə öz səmərəsini verəcək".

İ.Məmmədov ölkədə bu sahənin inkişafı üçün dövlət tərəfindən lazımi şərait yaradıldığını və dəstək verildiyini vurğulayıb. Onun sözlərinə görə, artıq Azərbaycanda fəaliyyət göstərən mobil rabitə operatorları 3G və 4G xidmətlərinin göstərilməsinə başlayıb.

Nazir müavini Bakıda keçirilən bu forumu yüksək qiymətləndirərək bildirib ki, bu cür forumlar mobil rabitə şəbəkəsində yeni xidmətlərin yaradılmasına imkan yaradır və gənclər tərəfindən bu sahədə yeni ideyaların üzə çıxmasına təkan verir.

Tezliklə mobil telefonlarda nömrələrin daşınmasının işə salınacağını da deyən rabitə və informasiya texnologiyaları nazirinin müavini insanların bu il yeni xidmətlərdən istifadə edəcəklərini bildirib. Dediyinə görə, bununla bağlı işlər artıq yekunlaşıb. "Kiçik bir texniki işlər qalıb ki, onlarda tezliklə həll olunacaq", - deyə İ.Məmmədov vurğulayıb.

Bu il Azərbaycanın ilk dəfə olaraq öz peykini orbitə göndərdiyini deyən İ.Məmmədova görə, bu o deməkdir ki, insanlar bu il yeni xidmətlərdən istifadə edəcəklər. "İnternet və mobil rabitə xidmətində yeniliklər olur və bu davam edəcək".

O, orbitə buraxılan Azərbaycan peykinin normal qaydada işlədiyini deyərək, milli peykimiz artıq azərbaycanlı mütəxəssislərin istifadəsində olduğunu da vurğulayıb: "Peyklə bağlı hər hansı bir yenilik yoxdur. Peyklə bağlı bütün işlər öz qaydasında davam edir".

Tədbirdə iştirak edən Dünya Bankının inkubator və texnoparklar şəbəkəsini yaradan "infoDev" layihəsinin rəhbəri Haydi Humalanın sözlərinə görə, layihə çərçivəsində dünyanın 8 ölkəsində mobil texnologiyalar mərkəzi (Mobile Technology Hub) yaradılıb ki, mərkəzin biri Azərbaycandadır: "Məqsədimiz Azərbaycan gənclərini bu sahəyə cəlb etmək və onlara layihə çərçivəsində dəstək verib, təcrübə mübadiləsi aparmaqdır".

Qeyd edək ki, forumda 20 ölkədən (ABŞ, Finlandiya, Belçika, Almaniya, Avstriya, Rumıniya, Bolqarıstan, Serbiya, Makedoniya, Yunanıstan, Türkiyə, Estoniya, Rusiya, Belarus, Ukrayna, Moldova, Tunis, İordaniya, Hindistan və Sinqapur) İKT sahəsində çalışan 30-a yaxın mütəxəssis iştirak edib. Forumun keçirilməsində məqsəd mobil texnologiyaların son nailiyyətləri ilə tanış olmaq, mobil əlavələrin hazırlanması və istifadə olunması sahəsində beynəlxalq təcrübəni öyrənmək, eyni zamanda gənclərin yeni texnologiyalara marağını artırmaqdır.

Tədbir çərçivəsində "Mobil texnologiyalar sahəsində innovasiyalar və onlara yatırılan sərmayələr", "Mobil texnologiyaları: Gənclərin virtual sahibkarlığı üçün yeni məkan", "Tələbələr üçün texnoloji yeniliklər", "Texnoloji inkişafda "Lego robotlarının" rolu" kimi mövzularda sessiyalar təşkil olunub, "Mobile Monday" şəbəkəsinin təqdimatı keçirilib.

İnformasiya Texnologiyaları Universiteti sentyabrın 15-dən fəaliyyətə başlayacaq

Azərbaycan prezidentinin sərəncamı ilə yaradılan İnformasiya Texnologiyaları Universiteti sentyabrın 15-dən fəaliyyətə başlayacaq. Bu barədə jurnalistlərə Təhsil Nazirliyinin aparat rəhbəri İlham Pirməmmədov məlumat verib.

Onun sözlərinə görə, universitetin Əsasnaməsi və hansı ixtisaslar üzrə kadrların hazırlanacağına dair sənədlər Təhsil Nazirliyinə göndərilib: "Bu yaxınlarda Təhsil Nazirliyi bununla bağlı öz rəyini bildirəcək. Tələbə Qəbulu üzrə Dövlət Komissiyası isə qəbul planına əsasən tələbələrin qəbulunu aparacaq".

Mobil telefonların qeydiyyat sistemi işə salınır

1 may 2013-cü il tarixindən mobil cihazların qeydiyyat sistemi (MCQS) tam işə salınacaq. Sistem Rabitə və İnformasiya Texnologiyaları Nazirliyinin (RİTN) Məlumat Hesablama Mərkəzində Azərbaycan Respublikası Nazirlər Kabinetinin 28 dekabr 2011-ci il tarixli 212 nömrəli qərarı ilə təsdiq edilmiş "Mobil cihazların qeydiyyatının aparılması Qaydası"na uyğun yaradılıb.

Xatırladaq ki, 2013-cü ilin 1 mart tarixindən etibarən Azərbaycanda istifadə olunan mobil cihazların İMEİ nömrələri barədə məlumatlar mobil operatorlar tərəfindən gündəlik olaraq mərkəzi baza sisteminə təqdim olunur. Qeydiyyat sistemi istismara başladığı tarixədək şəbəkədə istifadə edilən bütün mobil cihazların İMEİ nömrələri qeydiyyata alınmış hesab ediləcək və onların şəbəkədə maneəsiz işləməsində heç bir problem yaşanmayacaq.

Qeydiyyat sistemi istismara verildikdən sonra şəxsi istifadə məqsədi ilə ölkə ərazisinə gətirilərək istifadə olunan (respublikamızın mobil operatorlarının SİM kartları vasitəsi ilə) hər bir mobil cihazın İMEİ nömrəsi həmin cihazın şəbəkədən xidmət almağa başladığı tarixdən ən geci 30 (otuz) gün müddətində qeydiyyata alınmalıdır.

Bu qayda respublikamıza gələn xarici qonaqlar, turistlər tərəfindən xarici ölkə operatorunun SİM kartı ilə rouminq xidmətindən istifadə edilən cihazlara şamil olunmur. Yəni onlar xarici ölkə operatorlarının SİM kartları ilə işləyən cihazlardan maneəsiz olaraq istifadə edə bilərlər.

Həmçinin istehlakçılar qurğuların İMEİ nömrələrini bu yaxınlarda istifadəyə verilən www.imei.az saytına daxil olmaqla da yoxlaya bilərlər. Burada onlar həmçinin mobil cihazların qeydiyyat sistemi barədə ətraflı məlumat əldə edə bilərlər.

Sistemin yaradılması "İnformasiya-komminikasiya ili" çərçivəsində həyata keçirilən tədbirlər sırasındadır.

Mobil cihazların qeydiyyatının aparılmasında məqsəd abunəçilərin mobil cihazlarından rahatlıqla istifadə edilməsinə şərait yaradılmasından, mənşəyi bilinməyən, texniki parametrləri standartlara uyğun olmayan, keyfiyyət əmsalları aşağı olan və insan orqanizmi üçün zərərli elektromaqnit şüalanmaları yayan (xalq arasında "pirat" kimi tanınan) mobil cihazların ölkəyə idxalının qarşısının alınmasından, həmçinin istehsalçı şirkətlərin tanınma dərəcəsinin və rəqabət qabiliyyətinin yüksəlməsinin təmin edilməsindən ibarətdir. Eyni zamanda, qeydiyyat sistemi itirilən mobil cihazların şəbəkədə istifadəsini mümkünsüz edir. İtirilən mobil cihaz sahibinin qeydiyyat mərkəzinə müraciəti əsasında həmin cihazdan respublika ərazisində istifadə dayandırılır və oğurlanmış mobil cihaz qısa müddətdə lazımsız əşyaya çevrilir.

Bununla yanaşı, qeydiyyat sistemi qeyri-qanuni yollarla ölkə ərazisinə idxal olunan mobil cihazlardan istifadənin qarşısının alınmasını təmin edir.

Qənirə MƏMMƏDLİ

Ekspress.-2013.-1 may.-S.9.