Şeyxin İran missiyası

Paşazadə: "Düşmənlərin ölkələrimiz arasında nifaq toxumu səpməsinə icazə verməyəcəyik"

Qafqaz Müsəlmanları İdarəsinin (QMİ) sədri şeyxülislam Allahşükür Paşazadənin rəhbərliyi ilə mayın 18-dən Tehranda səfərdə olan Azərbaycan nümayəndə heyəti İranın ali dini rəhbəri ayətullah Seyid Əli Xamneyi ilə görüşüb.

Görüşdə iki ölkə arasında münasibətlərin hərtərəfli inkişaf etdiyi bildirilib. Paşazadə vurğulayıb ki, Azərbaycanda bütün dinlərin nümayəndələrinə azad ibadət imkanı yaradılıb, yeni məscidlər tikilir, tarixi məscidlər, ziyarətgahlar təmir edilir. O, bir neçə gün əvvəl prezident İlham Əliyevin iştirakı ilə Şamaxıda böyük məscid-kompleksinin açıldığını, bundan əvvəl isə Sumqayıt və Qəbələdə məscidlərin açılışı olduğunu xatırladıb.

Prezident İlham Əliyevə salamlarını çatdırılmasını xahiş edən Seyid Əli Xamneyi Azərbaycanda aparılan quruculuq işlərindən və inkişafdan xəbərdar olduğunu da bildirib. İranın dini lideri ölkəsinin Azərbaycanın ərazi bütövlüyünü tanıdığını və hörmətlə yanaşdığını bir daha qeyd edib.

Görüşdə iştirak edən Azərbaycan Ağsaqqallar Şurasının sədri, Milli Məclisin deputatı Fəttah Heydərov da Azərbaycan-İran münasibətlərinin inkişafının əhəmiyyəti barədə danışıb.

Mayın 19-da şeyxülislamın başçılıq etdiyi Azərbaycan-İran Parlamentlərarası Dostluq Qrupunun üzvləri İran Ali Milli Təhlükəsizlik Şurasının katibi Səid Cəlili ilə görüşüb. Qeyd edək ki, Səid Cəlili iyunun 14-də İranda keçiriləcək prezident seçkisinin əsas favoritlərindən biri sayılır.

Səid Cəlili görüş zamanı bildirib ki, İranla Azərbaycan arasındakı əlaqələr dərin və köklüdür: "İran Azərbaycanın müstəqilliyini, sabitliyini və inkişafını öz sabitliyi və inkişafı hesab edir. İran keçmişdə olduğu kimi, indi və gələcəkdə də Azərbaycana əlindən gələn hər cür yardımı göstərəcək".

Onun sözlərinə görə, Azərbaycandakı dini və islami potensiallar bu ölkənin təhlükəsizliyi, inkişafı və bütövlüyünü qorumaq üçün əsasdır: "Bu potensiallardan faydalanmaqla problemləri həll etmək lazımdır".

İran rəsmisi deyib ki, dünyanın supergücləri terrorizm və demokratiyanı bəhanə edərək ixtilaf və qeyri-sabitlik yaratmağa çalışırlar: "Bölgə ölkələri potensiallarından faydalanmaqla həmin supergüclərin planlarını boşa çıxarmalıdır".

Allahşükür Paşazadə isə öz növbəsində vurğulayıb ki, Azərbaycanla İran arasındakı əlaqələr qardaşlıq münasibətlərinə və tarixi bağlara söykənir: "Azərbaycan düşmənlərin iki ölkə arasına nifaq toxumu səpməsinə icazə verməyəcək".

Tehrana səfəri çərçivəsində Paşazadənin rəhbərlik etdiyi nümayəndə heyəti İran parlamentinin sədri Əli Laricani ilə də görüşüb. APA-nın "İRİB NEWS"a istinadən məlumatına görə, Laricani bildirib ki, İran-Azərbaycan arasındakı münasibətlər qonşuluq əlaqələrindən daha üstündür: "Dini, məzhəbi və tarixi bağlılıq iki xalqın qardaşlıq və yaxınlığının ən önəmli təməlidir. İran rəhbərləri ölkələrimiz arasında əməkdaşlığın inkişaf etdirilməsinin tərəfdarıdır. Bu gün ölkələrimiz arasında ən mühüm əlaqələrdən biri iqtisadi əməkdaşlıqdır. İran və Azərbaycanın bütün potensiallarından dostluq əlaqələrinin genişlənməsi üçün faydalanmalıyıq. Azərbaycan Respublikasında dini maarifləndirmənin genişlənməsi bu ölkənin inkişafına və çiçəklənməsinə səbəb ola bilər. Eyni zamanda stabilliyə və güclənməsinə gətirib çıxaracaq. Xalqın dini bünövrəsi nə qədər güclü olsa, Azərbaycan Respublikasının mənafeyini o qədər çox yaxşı qoruyar".

İran parlamentinin sədri Azərbaycan Respublikasında dini sahədə maariflənmənin genişlənməsinə çalışdığı üçün Allahşükür Paşazadəyə təşəkkür edib.

Şeyxülislam Paşazadə isə öz növbəsində vurğulayıb ki, iki ölkə arasındakı əlaqələr dərin dostluq, qardaşlıq və məzhəbi bağlılıq əsasında qurulub: "Azərbaycan xalqı heç zaman İranın çətin günlərdəki dəstəyini unutmayacaq. Azərbaycan müstəqillik qazandıqdan sonra dini maariflənmə sahəsində xeyli işlər görülüb".

Qeyd edək ki, şeyxülislamın başçılıq etdiyi Azərbaycan missiyasının Tehrana səfəri AMEA Ədəbiyyat İnstitutunun əməkdaşı Xalidə Xalid və sürücüsü Şamxal Hüseynovun İranda 20 günə yaxın bir müddətdə həbsdə saxlanılması fonunda baş verib. Elə missiyanın bir məqsədi də Azərbaycan vətəndaşlarının həbsdən azad edilməsi ilə bağlı olub. Şeyxin İrana səfərinin ikinci günü Xalidə Xalid və Şamxal Hüseynov azadlığa buraxılıb. Bu baxımdan şeyxin missiyasını uğurlu saymaq olar.

Əhmədinecat: "Heç bir qüvvə onu ürəyimdən çıxara bilməz"

"Azərbaycan xalqı mənim qəlbimdədir, heç bir qüvvə onu ürəyimdən çıxara bilməz".

Bu sözləri Tehranda səfərdə olan Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə ilə görüşü zamanı İran prezidenti Mahmud Əhmədinecat deyib.

AzərTAc xəbər verir ki, Azərbaycan-İran parlamentlərarası dostluq qrupu üzvlərinin təmsil olunduğu nümayəndə heyətinin də iştirak etdiyi görüşdə Azərbaycan-İran münasibətlərinə dair fikir mübadiləsi aparılıb. İran dövlətinin başçısına prezident İlham Əliyevin səmimi salamlarını çatdıran Paşazadə mehriban qarşılanmaya və yüksək qonaqpərvərliyə görə minnətdarlığını bildirib.

Əhmədinecat onun da hərarətli və səmimi salamlarını Azərbaycan dövlətinin başçısına çatdırmasını Paşazadədən xahiş edib. İran prezidenti bildirib ki, dinamik inkişafda olan Azərbaycan-İran münasibətləri tarixi köklərə söykənir və ölkələrimiz bir-birinə qırılmaz tellərlə sıx bağlıdır.

Qənirə MƏMMƏDLİ

Ekspress.- 2013.- 21 may.- S. 13.