"Eurovision" Skandinaviyada qaldı

Növbəti "Eurovision" həyəcanı başa çatdı. Mayın 18-də İsveçin Malmö şəhərində "Malmö Arena"da "Eurovision -2013" Mahnı Müsabiqəsinin final şousu baş tutdu və qalib məlum oldu.

Finalda iştirak edən 26 ölkə təmsilçisinin hər biri bacarığını nümayiş etdirdi. Müsabiqənin qalibi isə proqnozlara uyğun olaraq, Danimarka təmsilçisi Emmeli de Forest oldu. Onun ifası 281 balla qiymətləndirildi.

Emmeli de Forestin oxuduğu "Only teardrops" mahnısına 4 milyonadək tamaşaçının səs verdiyi məlum olub.

19 yaşlı Emmeli de Forest məşhur şotlandiyalı prodüserlə dünya turuna çıxıb. Müğənninin səhnə quruluşundakı özəlliklərindən biri də onun ayaq geyiminin olmamasıydı. O, Danimarkanın musiqi yarışmalarından sonra populyarlıq qazanıb. İlk mahnısını 2005-ci ildə təqdim edən ifaçı bir müddət televiziyada aparıcı işləyib. Emmelinin Danimarkanı Avropanın ən nüfuzlu mahnı müsabiqəsində təmsil etmək arzusu isə bu il reallaşıb. Danimarkanın milli seçim turunda iştirak edən müğənni ən yüksək göstərici ilə müsabiqənin qalibi elan olunub.

Qeyd edək ki, bu, Danimarkanın "Eurovision" müsabiqəsində üçüncü qələbəsidir. Beləliklə də, "Eurovision" İsveçdən uzağa getmədi və iki il dalbadal Skandinaviya yarımadasında keçiriləcək.

Azərbaycanın 21 yaşlı təmsilçisi Fərid Məmmədov isə "Eurovision -2013" Mahnı Müsabiqəsində "Hold me" mahnısı ilə 2-ci yeri tutdu. Azərbaycan 234 səs topladı.

İlk üçlüyü isə 214 balla Zlata Oqneviçlə təmsil olunan Ukrayna qapatdı.

Norveç builki müsabiqədə 4-cü, Rusiya isə 5-ci oldu.

Qeyd edək ki, Azərbaycana yüksək xallar bu ölkələrdən gəldi: İsrail (12), Avstriya (12), Macarıstan (12), Bolqarıstan (12), Rusiya (12), Malta (12), Litva (12), Yunanıstan (12), Gürcüstan (12), Monteneqro (12), Rumıniya (10), Belarus (10) və Ukrayna (10).

Moldovadan, Fransadan və Kiprdən isə Azərbaycana 8 bal verilib.

Azərbaycan isə 8 balı Maltaya, 10 balı Gürcüstana, 12 balı isə Ukraynaya verib.

"Eurovision -2013" Mahnı Müsabiqəsinin final şousundan dərhal sonra mətbuat konfransı keçirildi. Mətbuat konfransında əsas diqqətlər, təbii ki, Danimarka təmsilçisi Emmelie De Foresə yönəlmişdi. Şou iştirakçıları və mətbuat nümayəndələri ilk öncə Danimarka təmsilçisini təbrik etdilər. Daha sonra danimarkalı qalib ilk təəssüratını bölüşdü: "Əlbəttə ki, bu, çox həyəcanlı və stress dolu idi. Lakin tamaşaçıların alqışları mənə enerji verirdi. Onlar mənim mahnımı bəyəndilər və səs verdilər. İlk öncə kəpənəyin üzərinə əks olunmuş Danimarka bayrağını gördüm, daha sonra komandamın sevincini, amma, hələ də anlamırdım ki, mən qalib gəlmişəm".

Fərid də final başa çatandan sonra ona yardım edən hər kəsə, xüsusilə də ailəsinə minnətdarlıq edib: "Babam həmişə deyirdi ki, yalnız zəhmət, əzm və çalışqanlıq uğur qazandıra bilər. Səsvermənin nəticələri elan ediləndə, onun sözləri beynimdə əks-səda kimi səsləndi".

"Eurovision -2013" Mahnı Müsabiqəsinə qatılmış 39 ölkə arasında Azərbaycan öz təmsilçisini sonda -yalnız martın ortalarında bəyan etdi. Həmin vaxtadək peşəkar bukmekerlər müsabiqənin favoritlərini artıq seçmişdilər. Malmödəki ilk məşqə qədər Fərid "Eurovision -2013"-ün yaxşı tanınmayan iştirakçısı idi. Cəmiyyət və mass-media Fonass Yevangelinosun yaratdığı gözəl və dərin mənası olan səhnə quruluşunu görəndən sonra Fəridin qələbə şansları sürətlə artdı. Dünyaca məşhur "William Hill Online Betting" bukmeker kontorunun "stavka"larında o, 13-cü yerdən ilk üçlüyə qalxmışdı.

Fəridin səhnə çıxışı adi elementlərin sintezi idi. İki rəqqas, kub formasında şüşə konstruksiya və 20 metrlik şleyfi olan uzun paltar istedadlı müğənni ilə onun emosional mahnısı üçün möhtəşəm şou yaratdı. İdmançı bədən quruluşu isə Fəridə müsabiqənin finalı başlanmazdan əvvəl "Eurovision Next Male" Top Model yarışında qələbə qazandırmışdı.

"Eurovision -2013"-ün finalına bir neçə dəqiqə qalmış isə Fərid Məmmədov "Müsabiqənin ən yaxşı artisti" nominasiyasında nüfuzlu "Marcel Bezencon" mükafatına layiq bilindi. "Eurovision" müsabiqəsinin banisinin adını daşıyan sözügedən mükafat 39 ölkəni təmsil edən şərhçilərin seçimi ilə verilir.

Asəf Zeynallı adına Musiqi Kollecini bitirən Fərid Məmmədov pop formatında musiqilərin, həmçinin, soul, ballada janrlarında mahnıların mahir ifaçısıdır.

Fərid "Böyük səhnə" müsabiqəsindən sonra daha da məşhurlaşmışdı. Təmsilçimiz bir sıra mötəbər yarışmalarda ölkəmizi layiqincə təmsil etmiş, mükafatlara layiq görülmüşdü.

Xatırladaq ki, Azərbaycan "Eurovision" Mahnı Müsabiqəsində 2008-ci ildə debüt edib və o vaxtdan bəri müsabiqənin finalında yüksək nəticələr göstərir. 2009-cu ildə ölkəmiz 3-cü yeri, 2010-cu ildə 5-ci yeri tutdu. 2011-ci ildə isə El və Niki dueti "Eurovision"da qalib gəldilər.

Ötən il Səbinə Babayeva "When the Music Dies" balladası ilə 4-cü yeri tutdu.

Məlumat üçün bildirək ki, Fərid Məmmədov artıq vətənə qayıdıb.

"ANS Press"in verdiyi xəbərə görə, Azərbaycanı ikinci yerə çıxaran təmsilçimiz hava limanında o qədər də təntənəli qarşılanmayıb və media nümayəndələrinin qarşılanma mərasimində iştirak etmədiyi bildirilir.

Yeri gəlmişkən, müsabiqədə varlığı belə nəzərə çarpmayan üzdəniraq qonşularımız artıq mətbuatda Azərbaycana qarşı qarayaxma kampaniyasına başlayıb. Erməni mətbuatının iddiasına görə, guya Azərbaycan müxtəlif ölkələrdə səslərin pulla alınmasına cəhd göstərib. Lakin haylara tutarlı cavab isə elə özlərindən gəlib. Belə ki, Fərid Məmmədovun çıxışı tamaşaçılara o dərəcədə xoş gəlib ki, hətta ermənilər belə ona səs veriblər. Məsələn, Melina Arzumanyan adlı erməni qızı "Twitter" səhifəsində azərbaycanlı təmsilçinin özünü və mahnısını çox bəyəndiyini və ona səs verdiyini yazıb: "Ermənilər məni bağışlasınlar. Mən öz səsimi Azərbaycana verdim. Gözəl mahnı, gözəl ifaçı!"

Moskvada yaşayan Melina Ermənistan təmsilçisini bəyənmədiyini bu sözlərlə ifadə edib: "Ermənistan göndərməyə başqa adam tapmadı? Dəhşət!"

Ekspress.- 2013.- 21 may.- S. 23.