Əlil və şəhid ailələrinin evlə təminatında yenilik

Qaçqın və məcburi köçkünlərin, əhalinin sosial cəhətdən qayğıya ehtiyacı olan təbəqələrinin problemlərinin həlli ilə bağlı həyata keçirilən tədbirlərin işıqlandırılması

"Bakı, Sumqayıt, Gəncə, Mingəçevir və Xırdalan şəhərlərində yaşayan Qarabağ müharibəsi əlilləri və şəhid ailələrinin evlə təmin olunması üçün hazırda inşası başa çatmış binalardan satınalmalarla mənzil alınması nəzərdə tutulur". Bu barədə Əmək və Əhalinin Sosial Müdafiəsi nazir Səlim Müslümov deyib.

Nazirin sözlərinə görə, nazirlik tərəfindən aparılan araşdırmalar zamanı məlum olub ki, sözügedən şəhərlərdə 1860 nəfərin evlə təmin olunmasına ehtiyac var. Respublikanın digər şəhər və rayonlarında isə ümumilikdə 3800 nəfər ev növbəsi gözləyir. Bunun üçün həmin şəhər və rayon icra hakimiyyətlərinin əlil və şəhid ailələrinə torpaq sahəsi ayırması üçün mütəmadi müzakirələr aparılır (APA). Torpaq sahəsi ayrıldıqdan sonra bu şəxslərə fərdi evlər tikilə bilər.

Yeri gəlmişkən, dünən Əmək və Əhalinin Sosial Müdafiəsi Nazirliyinin (ƏƏSMN) sifarişi ilə Ağdam rayonunda inşa olunmuş 6 mərtəbəli 54 mənzilli yaşayış evi Azərbaycanın ərazi bütövlüyü, müstəqilliyi və Konstitusiya quruluşunun müdafiəsi uğrunda döyüşlərdə əlil olmuş vətəndaşların istifadəsinə verilib. Bu barədə isə qəzetimizə ƏƏSMN-nin mətbuat xidmətindən bildirilib.

Yeni mənzillə təmin olunan əlil və şəhid ailələrini bu münasibətlə təbrik edərək xoş arzularını ifadə edən əmək və əhalinin sosial müdafiəsi naziri Səlim Müslümov əlilliyi olan şəxslərin, müharibə veteranları və əlillərinin, şəhid ailələrinin rifah halının yüksəldilməsinin Azərbaycan Prezidenti cənab İlham Əliyevin diqqət mərkəzində olduğunu vurğulayıb. S.Müslümov bildirib ki, ötən ay dövlət başçısının imzaladığı, fərman və sərəncamlarla əsasən 86 452 nəfər şəxsin müavinəti və təqaüdü əhəmiyyətli dərəcədə artırılıb və bu artımların maliyyələşdirilməsinə aylıq olaraq 2,1 mln. manat vəsait sərf olunacaq. İlin sonuna kimi qeyd olunan artımlara 19,0 mln. manat vəsait sərf ediləcək.

Nazir bildirib ki, bu qayğının davamı kimi, Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olanların və şəhid ailələrinin sosial müdafiəsini yaxşılaşdırmaq məqsədilə qanunvericiliyə edilən dəyişikliklərlə belə şəxslərin ödənişli təhsil alan uşaqları 2014/2015-ci tədris ilindən etibarən ödənişli təhsil haqqından azad ediliblər. Bu kateqoriyadan olan şəxslərin övladlarının təhsil haqları dövlət büdcəsi hesabına ödəniləcək.

S.Müslümov bununla yanaşı, ölkəmizin ərazi bütövlüyünün, müstəqilliyinin və konstitusiya quruluşunun müdafiəsi və 20 Yanvar hadisələri zamanı əlil olmuş şəxslərin minik avtomobilləri ilə təmin olunması istiqamətində tədbirlərin görüldüyünü bildirib. Belə ki, Azərbaycan prezidentinin 23 dekabr 2013-cü il tarixli sərəncamının yüksək səviyyədə icrası olaraq, son üç həftə ərzində bu ilin əvvəlinədək növbədə dayanan Qarabağ müharibəsi və 20 Yanvar əlillərindən artıq 300 nəfəri avtomobillə təmin edilib, digər növbədə olanların isə avtomobilə təminatının gələn ayın sonunadək başa çatdırılacaq. Eyni zamanda, növbədə olan Böyük Vətən müharibəsi və Çernobıl əlillərinin, habelə hərbi xidmət vəzifəsini yerinə yetirərkən əlil olanların da yaxın dövrdə xüsusi avtonəqliyyatla tam təminatı üçün müvafiq tədbirlər həyata keçiriləcək.

S.Müslümov vurğulayıb ki, indiyədək artıq 5 minə yaxın əlil və şəhid ailəsi dövlət hesabına mənzillə təmin olunub. Ağdam rayonu ilə yanaşı, cari ildə Bərdə, Goranboy, Tərtər, Beyləqan, İmişli, Şamaxı rayonlarında da yeni çoxmənzilli yaşayış evləri nazirliyin saytında ictimaiyyətə aşıqlanan növbəlilik əsasında əlil və şəhid ailələrinin istifadəsinə veriləcək. "Respublika hökumətinin 2014-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında möhtərəm Prezidentimiz bəyan etmişdir ki, müharibə veteranları, müharibə əlilləri, şəhid ailələri üçün daha da yaxşı şərait yaradılacaqdır" deyə bildirən Səlim Müslümov bu sahədə ölkə rəhbəri tərəfindən müəyyən edilən vəzifələrin yüksək səviyyədə yerinə yetiriləcəyini vurğulayıb.

Əlil və şəhid ailələri dövlət hesabına mənzillə təmin olunmalarını həyatlarının ən sevincli hadisələrindən biri kimi dəyərləndirərək, onlara belə böyük sevinc bəxş etdiyinə və daim hərtərəfli qayğı göstərdiyinə görə prezident İlham Əliyevə minnətdarlıqlarını bildiriblər.

Əmək və əhalinin sosial müdafiəsi naziri Səlim Müslümov dünən Nazirliyin Ağdam rayon Əhalinin sosial müdafiəsi mərkəzinin inzibati binasında bu rayonun və Ağcabədi, Laçın, Bərdə rayonlarının sakinlərini də qəbul edib. ƏƏSMN-dən verilən məlumata görə, ümumilikdə 80 nəfərə yaxın vətəndaş fərdi qaydada qəbul olunaraq müraciətləri nazirliyin aidiyyəti struktur bölmələrinin məsul şəxslərinin iştirakı ilə araşdırılıb. Müraciətlərdə imtiyazlı şəxslərin mənzil və minik avtomobilləri, sanator-kurort yollayışları, reabilitasiya vasitələri, bərpa-müalicə xidməti ilə təmin olunması məsələləri üstünlük təşkil edib. Əvvəlki dövrlərdən fərqli olaraq, ünvanlı dövlət sosial yardımı, əlillik təyinatı ilə bağlı müraciətlər kəskin şəkildə azalıb.

Səlim Müslümov müraciətlərinə uyğun olaraq ayrı-ayrı imtiyazlı şəxslərin bərpa-müalicə xidməti, reabilitasiya avadanlıqları, sanator-kurort yollayışları ilə təmin olunması barədə tapşırıqlar verib. Əmək və əhalinin sosial müdafiəsi naziri vətəndaşların diqqətinə çatdırıb ki, hazırda bu və ya digər sosial təminat növündən istifadə etmək üçün tələb olunan sənədlərin siyahıları nazirliyin rəsmi saytında təqdim olunur. Həmin sənədləri təqdim edən şəxslərin müraciətləri üzrə sosial təminatında heç bir problem yoxdur. Qəbul zamanı aidiyyatı struktur bölmələrinin məsul şəxslərinə bir sıra vətəndaşların ünvanlı dövlət sosial yardımı almaq hüququnun olub-olmamasının araşdırılaraq müvafiq qərar qəbul olunması, eləcə də əlillik qrupu almaq üçün müraciət edən şəxslərin əlillik vəziyyətinin müəyyən olunması tapşırılıb. Tapşırıqlarda vətəndaşların müraciətlərinə səhlənkar yanaşan əməkdaşlarla bağlı inzibati tədbirlərin görülməsi də əksini tapıb.

Nazir minik avtomobili ilə təmin olunmaq üçün müraciət edən şəxslərə prezident İlham Əliyevin 23 dekabr 2013-cü il tarixli sərəncamına əsasən, 2014-cü ilin əvvəlinədək növbədə olan vətəndaşların cari il ərzində avtomobillə tam təmin olunması üçün konkret işlərin görüldüyünü, təkcə bu ay ərzində həmin insanlardan artıq 300 nəfərinə avtomobil verildiyini bildirib: "Növbədə olan daha 375 nəfər əlilliyi olan şəxsə də yaxın aylarda minik avtomobilləri veriləcək. Biz indi müvafiq işləri görürük ki, növbədə olan Böyük Vətən müharibəsi və digər kateqoriyadan olan əlilləri də qısa müddətdə avtomobillə təmin edək".

S.Müslümov əlil və şəhid ailələri üçün bir sıra bölgələrdə olduğu kimi, Ağdam və Bərdə rayonlarında da yeni çoxmənzilli yaşayış binalarının inşa olunduğunu deyib: "Artıq Ağdam rayonunda 6 mərtəbəli 54 mənzilli yaşayış binasındakı mənzillər növbəlilik üzrə əlil və şəhid ailələrinə təqdim olundu. Digər binalardakı mənzillər də Nazirliyin rəsmi internet saytında təqdim olunan mənzil növbəliliyi siyahısı əsasında paylanacaq. Sonrakı mərhələdə isə biz şəhər yerlərində mövcud olan mənzil fondlarından əlil və şəhid ailələri üçün mənzillər alınıb verilməsi qaydasını tətbiq etməyi qərara almışıq. Belə yanaşma əlilliyi olan şəxslərin cəmiyyətə inteqrasiyası üçün də məqsədyönlü olacaq".

Qəbul zamanı Əmək və Əhalinin Sosial Müdafiəsi Nazirliyinin fəaliyyət dairəsinə aid olmayan məsələlər aidiyyatı qurumlara çatdırılmaq üçün qeydiyyata alınıb. Ağcabədi, Bərdə və Laçın rayonlarından qəbula yazılmış vətəndaşların həmin rayonların ƏSMM-lərinin inzibati binalarının qarşısından xüsusi ayrılmış nəqliyyatla Ağdam rayonuna aparılıb gətirilmələri təmin olunub.

Əlil uşaqların müavinəti artırılmayacaq

"Hazırda Azərbaycan prezidentinin göstərişinə əsasən 18 yaşından yuxarı əlillərin müalicə üçün müavinətinin artırılması nəzərdə tutulur". Bunu Əmək və Əhalinin Sosial Müdafiəsi naziri Səlim Müslümov deyib.

Nazir bildirib ki, sözügedən yaş həddində olan əlillərin aldığı vəsaitin yaşayış minimumunun üzərinə çıxarılması istiqamətində iş aparılır. Prezident tərəfindən əlillərə təqaüd müəyyən edildiyini deyən S.Müslümov hazırda əlillərin 67 manat müalicə pulu, üstəgəl 60 manat Prezident təqaüdü, müavinət aldığını açıqlayıb.

S.Müslümovun sözlərinə görə, əlil uşaqlar ailələrin sərəncamında olduğu üçün onların müavinətlərinin artırılması nəzərdə tutulmur (APA). Amma bunun gələcəkdə müzakirə edilməsi də istisna deyil: "Növbəti illərdə müalicə, dərmanların alınması ilə bağlı qiymətləri nəzərə alaraq əlil uşaqlara verilən müalicə pulunun artırılması mümkün ola bilər. Ancaq hazırda onların müavinətlərinin 18 yaşına çatmış şəxslər kimi yaşayış minimumunun üzərinə çıxarılması nəzərdə tutulmayıb".

Səhifəni hazırladı Qənirə MƏMMƏDLİ

Ekspress.-2014.- 26-28 aprel.- S.10.