"On il
teatrı çiynimdə daşımışam"
Nübar Novruzova: "Mənim
hazırlaşdırdıqlarım da artıq "xalq
artisti" alıblar..."
Əməkdar artist Nübar Novruzova uzun illərdir ki, Gənc
Tamaşaçılar Teatrında çalışır. Həyatını
ömürlük teatra bağlayan Nübar xanım hələ
tələbə ikən Nuşiçin "Nazirin
xanımı" əsəri əsasında
hazırlanmış tamaşadakı Anka rolu ilə
şöhrət qazanıb.
Canını teatrın yolunda fəda
edən, sağlamlığını itirən aktrisa
özünün dediyi kimi, on il teatrı
çiynində daşıyıb. O, İlyas Əfəndiyevin
"Sən həmişə mənimləsən"ində
Nargilə, Şekspirin "Kleopatra"sında Kleopatra, Nazim
Hikmətin "Şöhrət və unudulan adam"ında
professorun qızı, "Duel" televiziya tamaşasında
Nazlı, eləcə də digər əsərlərdə və
filmlərdə yaddaqalan, tamaşaçıların sevgisini
qazanan obrazlar yaradıb.
Aktrisa əməkdaşımızla
söhbət zamanı teatrdakı xidmətlərindən və
gələcək rollarından, arzularından
danışıb...
-
Səhv etmiramsə, mənzilinizdə yanğın olmuşdu,
mübahisəli məsələlər vardı. Problemi həll etdiniz?
- "Kapital invest" tikinti
şirkətinin Əzim Əzimzadənin Ev
Muzeyinin yerində tikdiyi hündürmərtəbəli binada
yanğın oldu. Evim o bina ilə
divar-divaradır. Yanğın zamanı binadan düşən
taxtalar bizim evin üstünə töküldü, evə od düşdü. Dedilər, ev
yanır durma gəl... Gəldim gördüm,
doğrudan da yanır. Fövqəladə
Hallar Hazirliyinin əməkdaşlarının sayəsində
evimiz yanıb kül olmadı. Sağ olsunlar, bizi bu bəladan
qurtardılar. Ziyan odur ki, evimin dam
örtüyü yanıb. Yağış
yağanda, damır. Ümumiyyətlə, orda ev tikən zaman evimi dağıdıb qəza vəziyyətinə
salıblar. Heç kəs də düzəltmir.
Cəmi iki otaqdı, bir eyvandı. Çox şey arzusunda deyiləm. Arzum odur ki, gözəl evim-eşiyim olsun,
övladım orda rahat nəfəs alsın. Bir qızım var, adı da Fatimeyi-Zəhra. Mən "Kapital invest" şirkəti ilə
mübarizə aparıram. Onlar mənə
böyük bir məktub veriblər ki, mənzilimi təmir edəcəklər.
Mənə təsir edən odur ki, bu boyda
imkanlı şirkətsən, gələcəyin,
övladın üçün kapital yaradırsansa, mənim
övladımın həyatını niyə puç edirsən?
Mənim övladım o zaman liseyə imtahan
verirdi. Ağır bir dövrdə yer
qazırdılar, Əzimzadənin muzeyini sökürdülər.
Evdəki stol, divan o yan-bu yana gedib-gəlirdi.
Gəldilər, dil tökdülər, dedilər
ki, "evinizi alacağıq, sizi burdan köçürəcəyik.
Lazım olacaq, evinizi təmir edəcəyik".
Heç nə eləmədilər. Neçə ay apar-gətir oldu. Axırda
notariusla bir kağız verdilər ki, evi təmir edəcəklər.
İşi məhkəməyə vermişik.
Nəsimi Rayon Məhkəməsi xeyrimizə qərar
çıxarıb. Müəyyən
şeylərlə razılaşmadığıma görə
apellyasiya şikayəti vermişəm. Bir dəfə
övladım mənə belə bir söz dedi: "Mən məktəbi
oxuyub, qurtarıb gedirəm. Burda bir rahat gün
görmədim, ana. (Ağlayır).
- Qızınızı hansı sənətin
sahibi görmək istərdiniz?
- Özü-özünə nə
yol seçirsə, qoy elə də olsun. Əvvəl
deyirdi ki, həkim olacağam. İndi deyir
ki, hüquşünas olacağam. Mənim
dövrümdə aktrisalığa çox pis
baxırdılar. O vaxt Fəttah Heydərov (millət vəkili,
Naxçıvan MR-nın keçmiş mədəniyyət
naziri -red.) bizim mədəniyyət naziri idi. Atamı
yola gətirdi. Sənədlərimi
göndərişlə İncəsənət İnstitutuna
yolladı. Allah onun canını sağ eləsin.
Onun sayəsində mən gəldim oxudum. Atam qoymurdu gələm, Bakıda oxuyam. Narazıydı, istəyirdi musiqi müəllimi olum.
Mən Naxçıvana gedəndə, qohumlar
teatrda işləməyə imkan vermirdilər, onda adamı
daş-qalaq edərdilər orda. Özü də
Naxçıvandan ilk ali təhsilli aktrisa
mən olmuşam. Mənim arxamca Yasəmən gəldi.
Amma bu gün çox qəribədir ki,
neçə-neçə insan mənə
yaxınlaşır ki, "nə olar, mənim
qızımı İncəsənət Universitetinə
hazırlaşdır". Həyat dəyişib...
Bu gün anam, övladım
olmasaydı, heç ev haqqında
düşünməzdim. Dərviş
düşüncələri ilə həmin o
uçulmuş-dağılmış evdə
yaşayardım. Ondan da bir ləzzət
ala bilərdim. Sultan Süleyman demişkən,
"bu dünyaya əliaçıq gəldim, əliaçıq
da gedirəm". Mən bir ovuc torpaq, ev
istəyirəm övladıma qoyub gedəm. Bu gün
övladımı düşünüb ev
üstündə vuruşur, çarpışıram ki, ona
bir gün ağlayım...
Bilirsiniz, xoşbəxtlik
ani bir şeydi. Heç bir insan tam xoşbəxtəm
deyə bilməz axı. Kim deyirsə,
"mən xoşbəxtəm" mümkün olası
şey deyil. "Xoşbəxtəm"
sözünü mən qəbul edə bilmirəm. Mənim fikrimdə, düşüncəmədə,
leksikonumda belə bir şey yoxdu. Amma
gözəl ailəm var. Tanrıdan da diləyim odur ki, sevdiklərimin
heç birini əlimdən almasın. Qoy
hamısı sağ olsun, hamısı gözəl
yaşasın.
Bunları oxuyan
insanlar düşünər ki, sən nədən
özünü xoşbəxt sayırsan? Maddiyyat
heç də xoşbəxtlik demək deyil. Ola bilər cah-cəlal içində yaşayasan,
amma mənəvi kasadçılığın olsun. Ruhun azad olmasın. Ruhən
gözəl olmayasan. Mən isə mənən
zənginəm, ruhum azaddır, ruhən gözələm.
Buna görə də özümü xoşbəxt
sayıram. Gedirəm hardasa beş dəqiqə
əylənirəm, danışıram, gülürəm, bir
gözəl tamaşanı müvəffəqiyyətlə təhvil
verirəm. Alqışlanıram, sevilirəm.
Ordan çıxıb evimə gələndə isə stol ayağımın altından qaçanda,
göydən başıma torpaq töküləndə
özümü necə xoşbəxt saya bilərəm? Ancaq
yeni rol oynayanda, qızım yaxşı qiymət alanda, o an
özümü xoşbəxt hiss edirəm...
Mənə dedilər
ki, niyə evlə bağlı müraciərt eləmirsən.
Onlara belə dedim:
Məmim bu şəhərdə kimim var axı?
Hər qapı
döyməyə əlim gəlməyir.
Üzümü taleyə tutub gedirəm,
Tale də həmişə
üzə gülməyir.
-
Deyirsiniz ki, iki ildə qocaldınız... Bu
yaşda qorxursunuz qocalıqdan?
- Əlbəttə,
qorxuram. Qorxuram ki, bir pis xəstəlik
başımın üstünü ala. Onunla
mübarizə etməyə gücüm, imkanım
çatmaya. Tanrıdan çox istəyirəm
ki, məni xəstəliyə salmasın, rahat ölüm.
Gecə-gündüz namaz qılıram və
dua edirəm. Mən ancaq insanlara
yaxşılıq eləyirəm. Bəzən
kiminləsə nə üstündə vuruşuramsa, onun
cavabını verirəmsə, onu da haqqına edirəm.
Bəzən insanı qoyun yerinə qoyurlar.
Onda da məcburam onlarla vuruşam. Sənət yoldaşlarımla demək olar ki,
vuruşmuram, hər şeyə göz yumuram. Mən Firəngiz
Şərifova, Xuraman Hacıyeva, Solmaz Qurbanova, Gülşən
Qurbanova, Şahmar Ələkbərov, Yusif Vəliyev,
Lütfü Məmmədbəyov, Əlabbas Qədirov, Kamal
Xudaverdiyevlə işləmişəm...
Mən o rollara
görə sənət yoldaşlarımla vuruşmalıyam?
Mənim indi o yaşım deyil. Sadəcə, göz yumuram.
- Sizdən sonra sənətə gələn
insanlar xalq artisti adı aldılar, siz isə hələ əməkdar
atistsiniz...
- Mənə ağır gələn
odur ki, hazırlaşdırdığım insanlar da artıq
xalq artisti adını alıblar. Mən
1990-cı ildə əməkdar artist adını
almışam, amma xalq artisti adını vermirlər. Neyləyim ki, məndən sonra sənətə gələn
insanların hamısına "xalq artisti" veriblər, mənə
yox. Onların oynadığı rollar mənim
oynadığım rollardan üstündür?
Artıq 57
yaşım olacaq. Bir azdan da teatrı tərk
edəcəyəm. Başqaları kimi deyəcəklər
xoş getdin... Bəs mənim bu boyda zəhmətim hara gedib?.. Sənətdə məndən güclü
olmayanlar ad alsın, mən almayım?.. Mənim
kimi ehtiyacı olan insanlara nədənsə ev
də verməyiblər...
Mən Nazim Hikmətin
"Şöhrət və unudulan adam"
əsərinin tamaşasında da oynamışam. Bu əsər bir ailənin faciəsidi. Kamal
Xudaverdiyev orda nə gözəl oynayır... Mən həmişə
onun sözünü özümə götürürəm:
"Unudulmuşam qızım, unudulmuşam. Kitab
rəfimdə tozun altında bir kitabım qalmışdı.
Onu da kitabxanaçı unutmuşdu. Qızım, unudulmuşam". Bəli,
unudublar məni. Mənim illər uzunu bu Gənc
Tamaşaçılar Teatrında elədiyim işlərə
pərdə asıblar. Bir gəncin, bir insan
ömrünün üstünə ağ
örtük asmağa, atmağa sizin haqqınız yoxdur. Mən bu haqsızlığa içimdə
dözmürəm, ancaq nə edim? Ayaqlarım
qabar olub, öd kisəm götürülüb. Çünki rayonlarda o buzlu, o nəmişli səhnələrdə
yerlərə uzanmışam. Mənim
bütün bədənimdə dəfələrlə əməliyyatlar
olub. Bunlar hamısı teatrla
bağlıdır. Teatr 10 il
binasız qalıb. On il teatrı
çiynimdə daşımışam. Xuramanlar,
gülşən qurbanovalar, azərlər, yasinlər,
ağaxanlar, lətifələr, sonalar mənim kimi teatrın
planını verib, teatrı saxlayıblar. Mənim haqqımı bəs nə təhər unuda
bilirsiniz?
"Şöhrət və unudulan
adam"dan öncə 1980-ci ildə
"Bir ailədə" oynamışam. Onda gənc
idim. O qədər gözəl rol idi... Səməndər
Rzayev o roldan sonra gəlib məni qucaqladı. Dedi ki,
"hiss elədim ki, səhnəyə yeni bir nəfəs gəlib..."
1981-ci ildə isə
Leninqradda keçirilən foto-gözəllik müsabiqəsinin
qalibi oldum, diplom aldım. Həmin ildə
ilin ən yaxşı aktrisası olmuşdum. Diplom almışdım. Komsomol
"putyovka"sı ilə xaricə istirahətə göndərdilər...
Tamaşadakı o şıltaq
qız obrazı bir növ mesajdı ailələrə:
qız dünyaya gələndə, anası rəhmətə
gedir. Ata qızı yaşında bir qızla
evlənir. Və bütün fikrini o
qıza verir. Öz qızı diqqətdən
kənarda qalır. Qız atadan o nəvazişi
görə bilmir. Və qızın o
yaşıdı ki, atadan nəvazişi görmədiyinə
görə o yaşda insanlara meylli olur. Gedir
yaşlı bir insana rast gəlir. Yaxşı
ki, yaxşı insana rast gəlir. Sonra
başa düşəndə atasının düşüncələrini,
ona deyir ki, "ata, mən də belə bir vəziyyətdəyəm".
Sevgi, məhəbbət hissini qoyuram
qırağa. Bu o mesajdı ki, yəni,
qızlarınızla, oğlanlarınızla o yaş
dövründə çox ciddi məşğul olun...
Bu gün də mənim teatrda
çox gözəl rollarım var. "Romeo və
Cülyetta"da dayə, "Aydın"da Böyük
xanım, "Xırs quldurbasan"da Zalxa,
"İtalyansayağı xoşbəxtlik"də Markolfa,
Elçin Əfəndiyevin "Buzovna kəndi"ndə
Xeyransa...
Mənim görkəmli
Qırğız yazıçısı Mar Bayciyevin
"Duel" televiziya tamaşasında sevdiyim Nazlı
obrazım var...
Yalançı adamlara onu demək
istəyirəm ki, yalandan sözü verirsiniz, amma sabah o biri yalanın başqa yalanı əvəz
eləyir. Və bilə-bilə həyatınızı
yalanla davam edirsiniz. Birisini yıxmaq
üçün nə qədər yalanlar uydurursunuz. Amma bilin ki, bu yalanları uydura-uydura yuxarıya
doğru getmirsiniz. Bataqlığa doğru
gedirsiniz. Çünki hər şeyi
gözəl bilən Tanrıdı. Tanrı
sizi elə bataqlığa aparar ki, heç ruhunuz da inciməz.
İnsan bəzən yığdığı,
qazandığı hər bir şeyi bir anın içində
məhv eləyə bilər. Mənim Tanrıdan
başqa bir kimsədən qorxum yoxdu...
Bizim vaxtımızda sənətə
gələndə düşünmürdük ki, haçansa
ad, ev alacağıq. Biz ancaq
sənəti sevib gəlirdik. Hətta məşhur
olmaq haqqında da düşünmürdük. Sənətin özünü sevmişdik. Amma
indi çox adam sənətə gəlib
deyir ki, gələn kimi bu başdan məşhur olum...
- Bu yaşda hansı arzularla
yaşayırsınız?
- Mənə tez-tez sual verirlər
ki, arzuladığın ən böyük şey nədi? Bir valideyn kimi, ən böyük arzum
övladımın sağlığıdı. Sonra Vətənə,
dövlətə layiqli bir övlad yetişdirmək
arzusundayam. Arzu edirəm ki, layiqli bir yer tutsun,
yaxşı bir instituta girsin, özünə yaxşı yol
seçə bilsin, yaxşı sənət qazana bilsin.
O yolun axırınacan gedib çıxa bilsin.
Ən böyük
arzularımdan biri isə bəlkə də heç vaxt yerinə
yetməyəcək. Bildiyiniz kimi, mən
naxçıvanlıyam. Atam
naxçıvanlı, anam Sisyanın Ağüdi kəndindəndi.
Sisyanın o kəndləri -Ağüdi,
Vağüdi, Urud, Comərd, Dəstəgird,
Qızılcıq- mənim bütün
uşaqlığım oralarda keçib. Mən
oralarda at sürmüşəm, çapmışam. O
mağara var e... Bu saat gözümün
önündədi. Bəlkə də hər
gün oranı gözümün önündən
keçirirəm. Oralarda qızlarla bərabər
təmbəkiyə, baldırğana gedirdik. Təmbəki
düzürdük... O günlərin həsrətini çox
çəkirəm. Bəzən deyirlər ki,
insan həyatda uduzanda, keçmişə qayıdır,
keçmişi xatırlayır. Amma mən
düşünmürəm ki, həyatda uduzmuşam. Mən düşünürəm ki, bəlkə də
həyatda qazanan insanlardan bir də elə mən özüməm.
Ən böyük qazancım odur ki, mənim
ruhum sağlamdı, mən sağlam ruhda
böyümüşəm. Mən
sağlamam. Güzgüyə baxanda,
sağıma, soluma baxanda, heç vaxt xəcalət çəkmirəm.
Bu ən əsasıdı. Sonrası
odur ki, məni sevən xalqım var. Evimi dağıtdılar,
pis günə qoydular. Belə bir vəziyyətdə
uşağı böyütdüm. Hərdən
uşağımın yanında xəcalət çəkirdim.
Amma xalqın sevgisi, mənim keçmişimə,
bu günümə qarşı məhəbbətini
övladımın yanında büruzə verəndə, deyirəm
ki, "qızım, görürsən hər şey bununla
bitmir. Xalq necə sevir məni, necə qiymətləndirir".
Bundan böyük nə ola bilər...
əvvəli var
Namiq MƏMMƏDLİ
Ekspress.-2014.-4-8 oktyabr.-
S.20.