Əcnəbi könüllülər Bakıya heyran qalıb

"İlk Avropa Oyunlarının Bakıda keçirilməsi Azərbaycanın beynəlxalq aləmdə tanınmasında böyük rol oynadı"

Etiraf etmək lazımdı ki, Azərbaycanda keçirilən Avropa oyunlarının yüksək səviyyədə keçirilməsində könüllülərin rolu əvəzedilməzdi. Ölkəmiz tarixində ilk dəfə belə bir yarışa ev sahibliyi etdiyindən, bu sahədə bir qisim təcrübəli könüllüyə ehtiyac var idi. Odu ki, oyunlar başlamazdan bir neçə gün öncə daha əvvəl Avropadan 600-ə yaxın könüllü Azərbaycana gəldi.

Oyunlarla bağlı Media Kəndində olarkən, burada çalışan bir neçə əcnəbi könüllü ilə tanış oldum. Onların buradakı fəaliyyətləri və ölkəmiz haqqında təəssüratlarını bölüşmək üçün gün təyin edib, həmin könüllülərlə görüşüb, Həm paytaxtımızı bir az gəzdik, həm də söhbətləşdik.

Yekaterina Yefremova, Dimitri Danilov, Cemma Kavaliyer və Franseska Sposaro ilə apardığımız həmin söhbəti təqdim edirik.

- Özünüz haqda qısa məlumat verərdiniz və bilmək istərdim ki, bu sizin bu cür böyük idman tədbirində ilk işinizdi, yoxsa yox?

Yekaterina Efremova: Mən Rusiyada doğulmuşam. Lakin Çexiyada yaşayıram, tələbəyəm. Daha əvvəllər başqa layihələrdə könüllü kimi iştirak etsəm də, bu cür böyük idman yarışında ilk dəfədi ki yer alıram.

Dimitri Danilov: Tələbəyəm, Moskvada yaşayıram. Daha əvvəl Soçi Olimpiadasında könüllü olaraq çalışmışam. Buna görə də, bura gəlmək mənim üçün çətin olmadı. Üstəlik Azərbaycanda bir çox insanın rus dilini bilməsi mənim üçün əlavə üstünlük idi.

Cemma Kavaliyer: Mənim 24 yaşım var, İtaliyadan gələn könüllülərdənəm. Daha əvvəl Romada mədəniyyətlə bağlı bir tədbirdə könüllü kimi iştirak etmişəm.

Françeska Sposaro: 29 yaşım var, İtaliya paytaxtından bura könüllü olaraq gəlmişəm. Bu mənim ölkə xaricində ilk könüllü fəaliyyətimdi.

- Avropa Oyunlarının açılışı sizdə hansı təəssüratı oyatdı?

Dimitri: Açılış tədbiri həm də mənim gözlərimi açdı. Çünki əvvəllər Azərbaycan haqqında çox az məlumata sahib idim. Açılış inanılmaz oldu. Bakı çox varlı şəhərdi. Çox zəngin mədəniyyətiniz var. Azərbaycan xaricdə neft ölkəsi kimi tanınır. Buna görə də odlar yurdu adlanması çox düzgün seçimdi. Burda olmaqdan məmnunam.

Cemma: Açılışda xoreoqrafiya mükəmməl qurulmuşdu. Azərbaycanın tarixi və mədəniyyəti əla nümayiş olundu. Özünəməxsus rəqslər və tarixinizin nümayişi çox xoşumuza gəldi. Nizami Gəncəvi kimi böyük bir şairinizin olmasını bu açılışda öyrəndim. Onun haqqında araşdırdım. İtaliyada da açılışı canlı izlədilər və insanlar Azərbaycan haqqında çox şey öyrəndi.

- Sizcə, idmançılar, turistlər, jurnalistlər və təşkilatçılar arasında əlaqənin qurulmasında könüllülərin rolu nə dərəcədədi?

Yekaterina: Bizim burda əsas rolumuz ümumi atmosferi yüksək səviyyədə saxlamaqdı. Lakin bəzi hallarda bizim rolumuz az deyildi. Məsələn, əcnəbi könüllülər xarici ölkələrdən gələn və ingiliscə bilməyən bir şəxslə bir jurnalist və ya atlet arasında əlaqə yaratmaqda köməklik edə bilir. Biz gələn turistlərə yolu göstərməkdə və s. yardımçı oluruq.

Françeska: Deməzdim ki, idmançılarla əlaqənin qurulmasında mən çox kömək etdim. Çünki bizə atletlərin olduğu bölgələrə girmək qadağandı. Əsasən, yerli əhali ilə dialoqlarımız olur və biz onlara Avropa barədə çoxlu məlumatlar verdik.

- Bu Azərbaycana ilk gəlişinizdimi? Ölkəmiz haqda təəssüratlarınız necədi?

Yekaterina: Bu mənim Azərbaycana ilk gəlişimdi. Buna görə çox xoşbəxtəm. Bakı hazırda çox məşhur və əsl turizm şəhəridi. Lakin Avropa Oyunları olmasaydı, belə yaxın müddətdə Bakıya səfər edəcəyimi düşünmürdüm. Ona görə də Avropa Oyunlarının Bakıda keçirilməsini yaxşı addım hesab edirəm.

Dimitri: Mən də ilk dəfədi Azərbaycandayam. Maraqlı və sevindirici bir haldı ki, ilk Avropa Oyunları sırf hansısa Avropa ölkəsində yox, Azərbaycanda keçirilir. Rusiyada çoxlu azərbaycanlı əhali yaşayır. Lakin buna baxmayaraq, biz bilmirdik ki, Bakı bu qədər turizm üçün yararlı şəhərdi. Burada öyrəndim ki, siz çox gözəl təşkilatçısız və Bakı əhalisi yüksək intellektə sahib insanlardı.

Cemma: Mən birinci dəfədi Bakıdayam. İlk Avropa oyunlarının Bakıda keçiriləcəyini gözləmirdim. İtaliya və Azərbaycan arasında əlaqə çox genişdi. Hətta biz Bakının mərkəzində bir neçə italyan restoranı da gördük. Bakı müasir şəhər olmasına baxmayaraq, eyni zamanda tarixliyini də qoruyub. Əminəm ki, qısa müddət sonra Bakı bütün dünyada tanınacaq.

Françeska: Mən də ilk dəfədi ki, Bakıdayam. İlk Avropa Oyunlarının Bakıda keçirilməsi Azərbaycanın beynəlxalq aləmdə tanınmasında böyük rol oynadı. Burada olduğum müddətcə, Bakını çox gəzə bilməsəm də, bacardığım qədər çox yerlərə getməyə çalışıram. Yerli əhali ilə danışıram. İnsanlar çox dostcanlıdılar. Onlar hər zaman hazırdı ki, bizə hara getməli olduğumuzu desinlər, köməklik göstərsinlər. İçərişəhər xüsusilə xoşuma gəldi.

- Ölkənizə qayıtdıqdan sonra Azərbaycan haqqında oradakı insanlara nə danışacaqsız? Gələcəkdə turist kimi yenidən Azərbaycana gəlmək istəyərdiniz mi?

Yekaterina: Mən Bakıya gələndə, anam əvvəlcə mənə etiraz etdi ki, bunun mənası nədi? Lakin mən qayıtdıqdan sonra ona Bakı haqda danışacam və bu iradının düzgün olmadığını biləcək. Çexiyada danışacam ki, Bakıda müasir binalar, yeni və gözəl tikililər inşa olunur. Eyni zamanda insanların bizə olan diqqətinə görə şadam. Çünki daim bizə gülərüzlə davranırlar. Mən mütləq bura bir dəfə öz ailəmlə gəlməyi düşünürəm. Çünki Bakının bir daha necə dəyişdiyini görmək istəyirəm.

Dimitri: Mən öz yaxınlarıma Bakıdakı əhalinin səmimi davranışı və Xəzər dənizinin gözəlliyi haqqında danışacam. Çalışacam ki, onların Azərbaycan haqqındakı təəssüratlarını dəyişim. Çünki Bakı əsl gəzməli şəhərdi. Bura çox təhlükəsiz ölkədi. Dostlarıma deyəcəm ki, burada çoxlu mədəni abidələr var. Qarşıdakı 5 il ərzində mütləq Bakıya səfər edəcəm. Və növbəti gəlişimdə indikindən də nəhəng binalar və lüks maşınlar görəcəyimi düşünürəm.

Cemma: Mən ailəmlə hazırda danışıram. Onlar məndən Bakı haqda soruşur və bildirirəm ki, bura çox təhlükəsiz və təmiz şəhərdi. Ailəm açılışa televizordan baxmışdı. Artıq onların da bu ölkəyə marağı yaranıb. Xüsusilə məndən tarixiniz haqda soruşurlar. Yaxın gələcəkdə başqa bir layihə ilə bağlı Azərbaycana gələcəm. Çünki şəhərdəki dəyişiklikləri öz gözlərimlə görmək istəyirəm. Və həmin vaxt mütləq turist kimi ölkənin regionlarına da getməyi düşünürəm. Çünki indi bizim gəzmək üçün elə də çox vaxtımız olmur.

Françeska: Onlara deyəcəm ki, nə vaxt Bakıya getsəz, rahatca gəzə bilərsiz. Çünki şəhərdə təhlükəsizlik ən yüksək səviyyədə təmin olunub. Tarixi yerləri və təbiəti gözəldi. Mən də dostlarımla eyni fikirdəyəm. Bakıdakı dəyişiklikləri görmək istəyirəm. Gecələr bütün işıqlar yananda bu şəhər möhtəşəm görünür. Növbəti səfərim zamanı yenə də İçərişəhərdə olmağı düşünürəm. Çünki bu tarixi yeri gəzməyə doymaq olmur.

AMİN

Ekspress.-2015.- 24 iyun.- S. 18.