Tofiq Quliyev anıldı

Fevralın 11-də Muzey Mərkəzində ölməz bəstəkar Tofiq Quliyevin həyat və yaradıcılığını əks etdirən foto-sərgi nümayiş etdirilib. Fotosərgini izləməyə gələnlər arasında xalq artistləri Canəli Əkbərov, Oqtay Zülfüqarov, aktrisa Nuriyyə Əhmədova, kinoşünas Aydın Kazımzadə, Mədəniyyət və Turizm nazirliyinin əməkdaşları, muzey rəhbərləri və media nümayəndələri olub.

Nümayişdən əvvəl tədbiri giriş sözü ilə açan Dövlət Film Fondunun sədri Cəmil Quliyev sərginin iki təşkilat - Azərbaycan Dövlət Film Fondu və Dövlət Foto-Kino Sənədləri Arxivi tərəfindən təşkil olunduğunu bildirib. O, əldə edilən yeni fotoların Gürcüstan vətəndaşları tərəfindən hədiyyə olunduğunu qeyd edib.

Tədbirdə iştirak edən Bəstəkarlar İttifaqının məsul katibi Lalə Hüseynova Tofiq Quliyevin fəaliyyətindən danışaraq onun Azərbaycan musiqisi tarixinə milli estradanın banisi kimi daxil olduğunu vurğulayıb.

Xalq artisti Oqtay Zülfüqarov, kinoşünas Aydın Kazımzadə bəstəkarın gördüyü işlərdən söz açıblar.

Qeyd edək ki, Tofiq Quliyev indiyədək 42 filmə musiqi yazıb, 6 musiqili komediyanın müəllifidir.

Ayxan.

Ekspress.- 2009.- 12 fevral.- S. 14.