Bakı- İslam Mədəniyyətinin Paytaxtı -2009"

Bu gün açılan tədbirə nazirlər, nazir müavinləri, şəhər merləri qatılacaq

Bu gün paytaxtda "Bakı-İslam Mədəniyyətinin Paytaxtı-2009" mədəniyyət ilinin təntənəli açılış mərasimi keçiriləcək. Bununla bağlı dünən M.F.Axundov adına Milli Kitabxanada keçirilən mətbuat konfransında Mədəniyyət və Turizm naziri Əbülfəs Qarayev geniş açıqlama verib.

İSESCO-ya üzv dövlətlərin mədəniyyət nazirlərinin Liviyanın Tripoli şəhərində keçirilən 5-ci konfransında Bakının 2009-cu ildə İslam Mədəniyyətinin paytaxtı elan olunmasından sonra bu tədbirə ciddi hazırlıqların getdiyini deyən nazir qeyd etdi ki, açılışa bir sıra Avropa və islam ölkələrindən şəhər merləri, dörd ölkənin nazir və nazir müavinləri, eyni zamanda, mədəniyyət nazirləri dəvət edilib. Tədbirdə İSESCO-nun baş direktoru da iştirak edəcək.

Nazirin sözlərinə görə, tədbirə bu gün səhər Şəhidlər Xiyabanının və Heydər Əliyevin Fəxri Xiyabaındakı məzarının ziyarəti ilə başlanılacaq. Daha sonra Heydər Əliyev Sarayında açılışa həsr olunan qala-konsert olacaq. İki gün davam edəcək silsilə tədbirlərin siyahısında "Bakı-İslam Mədəniyyətinin Paytaxtı -2009" vebsaytının və "Qədim Bakı" kitabının təqdimatı da var. Nazirin sözlərinə görə, il ərzində 100-dən çox beynəlxalq miqyaslı tədbirlərin keçirilməsi planlaşdırılır: "Bu il həmçinin islam ölkələri mədəniyyət nazirlərinin VI konfransı olacaq. Azərbaycan tərəfi ənənəsinə sadiq qalaraq "Bakı prosesi" çərçivəsində həmin konfransa bir sıra Avropa dövlətlərini də dəvət etməyi planlaşdırır. Keçiriləcək tədbirlər Azərbaycan mədəniyyətinin beynəlxalq səviyyədə təbliğinə xidmət etməklə yanaşı, müxtəlif mədəniyyət və sivilizasiyaların qovşağında unikal coğrafi mövqeyi, dözümlülük və icmalararası sülh ənənələri, mədəni və etnik rəngarənglik şəraitində yaşayan Azərbaycanın sivilizasiyalar arasında körpü rolunu oynamasını bir daha təsdiqləyəcək. Artıq "Bakı-İslam Mədəniyyətinin Paytaxtı-2009"-la bağlı hazırlanan reklam çarxları CNN və "Əl Cəzirə"də nümayiş olunur".

İl ərzində maraqlı tədbirlərin keçiriləcəyini vurğulayan Ə.Qarayev bu həftənin sonuna kimi bütün muzey və qoruqlarda "açıq qapı" elan olunduğunu da diqqətə çatdırdı. Bu il həmçinin 5 islam ölkəsində Azərbaycan mədəniyyət günlərinin keçirilməsi də planlaşdırılır. Ə.Qarayevin sözlərinə görə, artıq mədəniyyət günləri ilə bağlı tədbirlər planı hazırlanır. Bununla yanaşı, il ərzində Azərbaycanda doqquz ölkənin mədəniyyət günlərinin keçirilməsi ilə də bağlı artıq qərar qəbul edilib. Nazir bildirdi ki, bu kimi tədbirlərin Bakıda təşkili Azərbaycan mədəniyyətinin inkişafı ilə yanaşı, turizmin inkişafına da müsbət təsir göstərəcək. Ə.Qarayev qeyd etdi ki, bu ilin payız aylarında ilk dəfə olaraq Böyük Britaniyanın məşhur Viktoriya və Albert Muzeyində saxlanılan islam mədəniyyətinə aid nümunələr Azərbaycan Dövlət İncəsənət Muzeyinin yeni binasında səgirlənəcək. Sərgi "İslam üst geyimləri Viktoriya və Albert Muzeyində" adı altında təşkil olunacaq.

Mətbuat konfransında mədəniyyət ocaqlarında aparılan əsaslı təmir işlərinə də toxunan Ə.Qarayev bildirdi ki, Dövlət İncəsənət Muzeyinin binasında aparılan əsaslı təmir işləri bu ilin martında başa çatdırılacaq. Nazirin sözlərinə görə, muzeydə saxlanılan sənət nümunələrinin daha keyfiyyətli qalması üçün xüsusi anbar hazırlnır: "Bu anbar Finlandiyadan gətirilən xüsusi materiallar əsasında quraşdırılır. Anbar hazır olandan sonra Azərbaycanın sənət nümunələrinin saxlanılması işi daha da yüksək səviyyədə aparılacaq". Nazir qeyd etdi ki, hazırda İncəsənət Muzeyində maraqlı və yeni ekspozisiya hazırlanır. Bununla yanaşı, Dövlət Xalça Muzeyinin binasının tikintisi işi də uğurla davam etdirilir.

Dövlət Xalça Muzeyinin binasının 2010-cu ildə təhvil verilməsi nəzərdə tutulur. Ə.Qarayevin bildirdiyinə görə, hazırda dünyada gedən maliyyə böhranı Azərbaycanın mədəniyyət sahəsinə heç bir mənfi təsir göstərməyəcək: "Bu maliyyə böhranı hazırda təmirdə olan mədəniyyət ocaqlarında təmir işlərinin aparılmasına təsir göstərmir və belə bir halın olacağını güman etmirik. Ancaq maliyyə böhranının builki layihələrə hansısa bir təsirini istisna edə bilmərəm. Hələ ki, belə bir şey qeydə alınmayıb. Bunu gələcək göstərəcək".

Ayxan

Ekspress.- 2009.- 18 fevral.- S. 11.