Təbliğat-təşviqat
kampaniyası başladı
Təşviqat qruplarına ayrılan efir
vaxtının qaydaları müəyyənləşdi
Dünən Mərkəzi
Seçki Komissiyasının (MSK) növbəti iclası
keçirildi. İclasda martın 18-nə təyin edilmiş
referendumda ödənişsiz əsaslarla ayrılmış
efir vaxtının bölgüsü cədvəlinin dərc
edilməsi haqqında məsələyə baxıldı.
MSK sədri Məzahir Pənahov
iclasın gündəliyini səsə qoymaq istəyərkən,
komissiya üzvü Akif Qurbanov gündəliyə etiraz etdi. Bildirdi
ki, ödənişsiz efir vaxtı ilə bağlı məsələ
müzakirəyə çıxarılmazdan əvvəl
komissiya üzvlərinə layihə paylanmalı idi:
"İndi cədvəl, layihə yoxdursa, biz nəyə səs
verəcəyik"? M.Pənahovun cavabı isə qısa
oldu: "Elə bunun üçün
yığışmışıq də bura".
Daha sonra efir
vaxtının bölgüsü barədə məlumat verən
MSK sədri bildirdi ki, təşviqat qrupları bu hüquqdan
İctimai Teleradio Şirkətində istifadə edəcəklər.
Onun sözlərinə görə, İTV ilə
razılaşmaya əsasən təşviqat qruplarına həftədə
3 saat vaxt ayrılacaq. Bunun 1 saat yarımı televiziyada, 1 saat
yarımı isə radioda olacaq. Qrupların
çıxışı dəyirmi masa şəklində nəzərdə
tutulub. Dəyirmi masalar həftənin şənbə günləri
saat 18.15-dən 20.00-dək 90 dəqiqə televiziyada, həftənin
3-cü günləri isə 20.15-dən 22.00-dək 90 dəqiqə
radioda təşkil olunacaq. Aparıcının
çıxışının isə ayrılmış 90 dəqiqəyə
aidiyyatı yoxdur. M.Pənahov onu da qeyd etdi ki, efir zamanı
konstitusiyaya edilən əlavə və dəyişikliklərin
(29 maddə üzrə 41 əlavə və düzəliş
var - A.A.) hamısı ayrı-ayrılıqda müzakirəyə
çıxarılmalıdır.
MSK üzvü Almas Qəhrəmanlı
isə məsələyə etiraz etdi. Onun sözlərinə
görə, Püşkatma Komissiyasının iclasında təşviqat
qruplarının arqumentləri nəzərə
alınmayıb: ""Respublikaçılar" və
"Qarabağ və Respublika Uğrunda Hərəkat" təşviqat
qrupları dəyirmi masanın televiziyada saat 18.15-də
başlamasını məqbul saymadılar. Doğrudan da həmin
saat sərfəli vaxt deyil. Lakin İctimai Teleradiao Şirkətinin
direktor müavini iddia etdi ki, əgər saat 21-dən sonra versək,
həmin vaxt digər kanallarda tok-şoular getdiyindən camaat dəyirmi
masaya baxmayacaq".
İTV rəhbərliyinin
arqumentindən təəssüfləndiyini söyləyən
A.Qəhrəmanlı təklif etdi ki, məsələyə
yenidən baxılsın və dəyirmi masaya ictimaiyyətin
baxmağı üçün əlverişli vaxt təyin
olunsun.
Pənahov isə Qəhrəmanlının
iradına "hər bir televiziyanın öz siyasəti
var" deməklə kifayətləndi. Püşkatma
Komissiyasının rəhbəri Azər Tağıyev isə
İTV rəhbərliyinin mövqeyindən
çıxış etdi: "İTV rəhbərliyi bildirdi
ki, vaxtı 18.15-dən başqa vaxta dəyişmək
mümkün deyil. Onlar bildirirlər ki, saat 20.30-dan sonra efirə
gedən verilişlər üçün öhdəliklər
götürüblər. Bir də ki, efir vaxtına təkcə
"Respublikaçılar" və "Qarabağ və
Respublika Uğrunda Hərəkat" təşviqat
qrupları etiraz edib. Qalanları razıdır".
MSK üzvü Akif
Qurbanov isə təəssüflə bildirdi ki, MSK təşviqat
qruplarına daha geniş vaxt verməkdənsə, vaxtı
daha geniş məhdudlaşdırır. Onun sözlərinə
görə, beynəlxalq təşkilatlar, səfirlər
çağırış edirlər ki, debatlara daha geniş
imkan verilsin: "Belə olan halda MSK-nın bu mövqeyi təəssüf
doğurur".
Qurbanov onu da qeyd etdi ki,
prezident seçkilərində 7 namizədin iştirak etdiyi
halda onlara 6 saat vaxt ayrılmasına baxmayaraq, indi 9 təşviqat
qrupuna 3 saat vaxt ayrılır. "Bu, müqayisəyə gəlməzdir",
- deyən MSK üzvü İTV rəhbərliyinin
mövqeyinin qanuna zidd olduğunu da diqqətə
çatdırdı: "İTV özəl qurum deyil. O,
dövlətdən maliyyələşir. Seçki Məcəlləsinin
27.2 maddəsində göstərilir ki, pulsuz efir vaxtı daha
geniş auditoriyanın olduğu vaxt ayrılır. Bu vaxt da
axşam saat 8-11 arası dövrdə olur. Axşam saat 9-da da
İTV-də teleserial gedir. Başa düşmürəm,
İTV teleserial üçün kimin qarşısında
öhdəlik götürüb? Ona görə də İTV
açıq-aşkar qanunu pozur".
A.Qurbanov MSK və
İTV-nin daha bir qanunu pozduğunu da qeyd etdi. MSK üzvü
bildirdi ki, qanunda təbliğat-təşviqatın dəyirmi
masa şəklində keçirilməsi göstərilməyib:
"Təşviqat qrupları ona verilən pulsuz vaxtdan istifadə
edərək çıxış da edə bilər, rolik də
verə bilər".M.Pənahov isə A.Qurbanovun dediklərinin
böyük hissəsi ilə
razılaşdığını dedi: "Amma 9 qrupdan 7-si dəyirmi
masa ilə razılaşır. Hər kəs öz fikrini deyə
bilər, amma, çoxluğun fikri qəbul olunur".
A.Qurbanov isə bununla
razılaşmadı: "Qanunun tələbi var".
Lakin M.Pənahov isə
dediyindən dönmədi və MSK-nın qərarını
qanundan yüksək tutdu. "Biz buna təbii
yanaşmalıyıq. Mənə elə gəlir ki,
MSK-nın qərarı yüksək dəyərləndirilməlidir"
- M.Pənahov dedi.
MSK üzvü Oqtay
Hümbətov da efir vaxtının bölgüsü ilə
razılaşmadı. O, televiziya üçün ayrılan
vaxtın radioya, radioya ayrılan vaxtın isə televizyaya
verilməsinin doğru olduğunu dedi: "Axşam saat 8-dən
10-a kimi heç kim evdə radioya qulaq asmır. O vaxt hamı
televiziyaya baxır. Camaat radioya yolda maşında, marşrutda
gedəndə qulaq asır. İTV-də
"Sarçı"dan sonra "Xəyanət"
serialı gedir. İndi bizə daha vacib olan Konstitusiya
lazımdır, yoxsa, "Xəyanət"ə baxmaq"?
M.Pənahov isə
mövqeyindən dönmədi: "Belə
razılaşıb, belə də olmalıdır".
Daha sonra püşkatma keçirildi. Püşkatmanın nəticəsinə görə, dəyirmi masa zamanı aparıcıdan sağda "Zəka", "Vətəndaş Cəmiyyəti", "Qarabağ və Respublika Uğrunda Hərəkat" və "Hüquq və Demokratiya", solda "Tərəqqi", "Davamlı İnkişaf Naminə", "Respublikaçılar" və "Şəhər", aparıcı ilə üzbəüz isə "Yeni Azərbaycan" təşviqat qruplarının nümayəndələri oturacaqlar. Çıxışların ardıcıllığı isə belədir:
1."Zəka"; 2."Tərəqqi"; 3."Vətəndaş Cəmiyyəti"; 4."Davamlı İnkişaf Naminə"; 5."Qarabağ və Respublika Uğrunda Hərəkat"; 6."Respublikaçılar"; 7."Hüquq və Demokratiya"; 8."Şəhər"; 9."Yeni Azərbaycan".
Beləliklə, M.Pənahov bildirdi ki, İctimai radioda fevralın 18-dən, İTV-də isə fevralın 21-dən dəyirmi masalara start veriləcək. Dünəndənsə ölkənin hər yerində təbliğat-təşviqat mərhələsi başlayıb. Hər bir təşviqat qrupuna isə 23 min manat vəsait ayrılacaq. Təbliğat-təşviqat kampaniyası səsverməyə 24 saat qalmış - martın 17-si saat 8.00-da dayandırılacaq. Qeyd edək ki, püşkatmanın nəticəsi və vaxt bölgüsü səsə qoyularkən A.Qurbanovla A.Qəhrəmanlı məsələnin əleyhinə səs verdilər.
"Respublikaçılar"ın səlahiyyətli nümayəndəsi Gülağa Aslanlı isə bildirdi ki, İTV-nin mövqeyi referenduma hörmətsizlikdir: "MSK təəssüf ki, bunu qəbul elədi. Mənim sizə sözüm yoxdur. Eşq olsun, sizə"!
"Yeni Azərbaycan"ın nümayəndəsi,
deputat Siyavuş Novruzov isə efir vaxtının yaxşı vaxt olduğunu dedi: "Şənbə günü
hamı evdə olur, həmin vaxt camaatın dəyirmi masaya baxmaq imkanı var... Kim razı deyilsə,
getsin pullu efir vaxtından da istifadə eləsin".
M.Pənahov isə vaxtla bağlı məsələyə daha
maraqlı arqument gətirdi: "Açıq
danışaq, indi məhərrəmlik də
qurtarır. Saat 8-dən sonra evdə
olmayacaqsınız. Yeyib-içməyə, toylara gedəcəksiniz.
Elə yaxşı vaxtdır ki, saat 6-dan 8-ə kimi dəyirmi masaya baxıb sonra toya gedəsiniz".
A.Qurbanov isə yarızarafat, yarıciddi dedi ki, "müxalifətin pulu yoxdur toya getməyə".
Aqil Aslan
Ekspress.- 2009.- 19 fevral.- S. 12.