Xocalı faciəsi insanlıq tarixində qara ləkədir

Türkiyə parlamentində soyqırımdan danışdılar

Dünən Türkiyə Böyük Millət Məclisində Xocalı soyqırımının ildönümü ilə bağlı bəzi millət vəkillərinin çıxışı olub.

Azərbaycan-Türkiyə parlamentlərarası dostluq qrupunun sədri, Ədalət və İnkişaf Partiyasının (AKP) üzvü Mustafa Kabakçı Xocalı soyqırımı barədə danışıb. Dediyinə görə, Azərbaycan torpaqlarının işğalına son qoyulması, qaçqınların öz yurdlarına dönməsi üçün cəhdlərini davam etdirəcəklər və bu məsələni gündəmdə saxlayacaqlar.

M.Kabakçıdan sonra Milliyyətçi Hərəkat Partiyasından (MHP) Şenol Bal söz alıb. Ş.Bal Xocalı faciəsini insanlıq tarixində qara ləkə adlandırıb (APA). Qeyri-rəsmi məlumatlara əsasən Xocalıda 1300 dinc sakinin qətlə yetirildiyini açıqlayan Bal deyib ki, ortada ciddi dəlil-sübutların olmasına baxmayaraq, soyqırımın tanınması və cinayətkarların məsuliyyətə cəlb olunması istiqamətində heç bir addım atılmayıb.

Ş.Bal Azərbaycan türklərinə qarşı soyqırımın əslində 200 ildir davam etdiyini vurğulayıb.

Ş.Baldan sonra MHP-dən olan daha bir millət vəkili, türk cümhuriyyətləri ilə əlaqələr üzrə sabiq dövlət naziri Rəşad Doğru söz alıb. O, 26 fevralın Türkiyədə "Soyqırım günü" elan olunması ilə bağlı 1 il əvvəl qanun layihəsi hazırladığını xatırladıb. R.Doğru layihənin müzakirəyə çıxarılaraq qəbul olunmasını istəyib.

Cümhuriyyət Xalq Partiyasından (CHP) Fərid Mövlud Aslanoğlu da Xocalıda həlak olan azərbaycanlıların xatirəsinə hörmətini ifadə edərək CHP millət vəkili Canan Arıtmanın bu gün bu mövzuda parlamentdə çıxış edəcəyini deyib.

Ekspress.- 2009.- 26 fevral.- S. 8.