Fəxriyyə Xələfova ətir istehsalına başladı.

Lakin bu iş onu modadan ayırmayacaq

"Mənə müxtəlif tədbirlərdə və təqdimat mərasimlərində iştirak etmək üçün maraqlı dəvətlər gəlir. Bu dəvətlərin əksəriyyəti Amerikadandır. Buna görə sevinirəm ki, Fəxriyyə Xələfovanı tanıyır və qəbul edirlər. Amma etiraf edim ki, hələ brendimi, reklamımı ifadəli şəkildə təqdim etməmişəm. İnşallah geyim və ətriyyat istehsalçısı kimi təqdim ediləndə, reklama ehtiyac olacaq. Hazırda reklam işləri ilə məşğul olmağa hazırlaşıram. İndi ətriyyat üzərində işləyirəm. Düşündüm ki, ətriyyatın özü ilə yanaşı, gözəl də reklamı olmalıdır. Yaxın günlərdə şəkillər çəkdirəcəm. İlk ətriyyatımın reklam sifəti özüm olacam", -Bu sözləri əməkdar incəsənət xadimi, modelyer Fəxriyyə Xələfova söyləyib.

Modelyerin sözlərinə görə, ətrin adı "Nuray" olacaq: "Nuray mənim bu dünyada ən çox sevdiyim qadındır. Ancaq onun kimliyini hələlik açıqlamayacam, qoy, bu sirr olaraq qalsın. Nuray özümdən sonra əhval-ruhiyyəsini qəbul etdiyim bir insandır. Bilirsiniz ki, moda aləminin insanları yalnız əhval-ruhiyyə ilə yaşayır. Nurayın kimliyini isə təqdimat mərasimində görəcəksiniz".

Moda işləri ilə bağlı bir çox ölkənin podiumlarını gəzən Fəxriyyə Xələfova ətriyyatının qoxusunun da uzaq ölkələrdən gəlməsini arzulayır. Bunun üçün məlumat toplayan modelyer əldə etdiklərini bizimlə bölüşdü: "Çox istəyirəm ki, bu ətriyyat Azərbaycandan kənarda da yayılsın. Bunun üçün mən beynəlxalq ətriyyat strategiyasını yaxşıca öyrənmişəm. Bir ildir ancaq ətriyyat məsələsi ilə məşğulam. Onu istehsal etməyə çox insanın maddi imkanı çatar. Amma ətriyyat buraxılışında çoxlu uğursuz faktlar mövcuddur. Hər ətriyyat uğurlu alınmır. Uğursuzdursa, bu, həmin investisiyanın və istehsalçının adının batması deməkdir. Şanslıyam ki, məni ətir icad edən insanların sırasına daxil ediblər. Mən xaricdə məsləhətləşmələr aparmışdım, demişdilər ki, "sən ciddi düşün, bu işə bu qədər vaxt, vəsait ayıracaqsan". Soruşurdular ki, "bu işin uğurlu olacağına əminsən". Mən dedim ki, "hansı testlərdən keçmək lazımdırsa, keçim, siz də baxın". Mən bu testlərdən keçdim və dedilər ki, məndə bu iş alınır".

Fəxriyyə xanım ətriyyat istehsal etmək üçün insanın hansı keyfiyyətlərə malik olmasından da danışdı. Onun fikrincə, öncə insanın həssaslığı olmalıdır: "Ətirlərə, rənglərə, hətta dəyişən havaya da həssasam. Bilirəm ki, insanlar nəyi istəyəcəklər. Bəzən deyirlər ki, insanlar üçün gözəl ətriyyat yaradanda, hansısa arzularını onlara bəxş edirsən. Əslində, bu çox qeyri-adi prosesdir. Əgər belə olmasaydı, dünyada onminlərlə ətir olardı. Amma statistikaya görə, dünyada cəmi 50-60 çeşiddə ətir var. Mən ətirlərin həm çiçək istiqamətini, həm kimyəvi tərkibini öyrənmişəm. O qarışığı tapana qədər üç ay laboratoriyadan çıxmamalısan. Ətriyyat işində özümü tamamilə tapmışam. Bu iş məni modadan ayırmayacaq. Ona görə ki, modanın içində ola-ola bu işi görürəm".

AYXAN

Ekspress.- 2009.- 9 iyul.- S. 10.