Mahnı Teatrı yəhudilərə veriləcək?

Kazım Qasımov: "Buna inanmıram"

Qəzetimizin ötən saylarının birində Azərbaycandakı dağ yəhudilərinin Rəşid Behbudov adına Mahnı Teatrının binasına göz dikməsi barədə məlumat yaymışdıq. Xatırladaq ki, yazıda yəhudilərin keçmişdə sinaqoq olmuş adıçəkilən teatrın binasının onlara geri qaytarılması istəklərindən söz açılırdı.

Qeyd edək ki, bu məsələ Dağ yəhudiləri icmasının rəhbəri Semyon İxiilov və Yəhudi Evinin direktoru Şaul Davıdovun Bakı Şəhər İcra Hakimiyyətinin başçısı Hacıbala Abutalıbovla görüşündə müzakirə mövzusu olub. İnşa ediləcək Qış parkının ərazisinə düşdüyü üçün paytaxtdakı sinaqoqun sökülməsi ehtimalı ilə bağlı dağ yəhudiləri icmaya yeni yer istəyiblər. Və problemin həlli yollarından biri kimi sovet hakimiyyəti zamanı müsadirə edilmiş və hazırda R.Behbudov adına Mahnı Teatrının yerləşdiyi tarixi sinaqoq binasının geri qaytarılması variantı irəli sürülüb.

Maraqlıdır, adıçəkilən teatrın rəhbərliyinin bu məsələyə münasibəti necədir? Rəşid Behbudov adına Mahnı Teatrının direktoru Kazım Qasımov "Ekspress"in əməkdaşı ilə söhbətində bu məsələnin hələ 5 il bundan əvvəl də gündəmə gəldiyini xatırladıb. Dediyinə görə, 2004-cü ildə də bununla bağlı məsələ qaldırılsa da, o vaxtdan heç nə dəyişməyib: "Bu bina 20 ildən artıqdır ki, Rəşid Behbudov adına Mahnı Teatrına verilib və burada əsaslı təmir aparılıb. İndi də çox gözəl fəaliyyət göstərir və öz həcminə görə ən çox tamaşaçı qəbul edən teatrlardan biridir".

Binanın dağ yəhudilərinə qaytarılmasına gəlincə, teatrın direktoru bu məsələnin vaxtaşırı qaldırıldığını deyərək, binanın yəhudilərə veriləcəyinə inanmır: "Çünki dediyim kimi, 2004-cü ildən bu məsələ qaldırılıb və heç bir nəticə verməyib".

K.Qasımovun sözlərinə görə, Azərbaycanda hər zaman yəhudilərə lazımı diqqət göstərilib və lazım olsa, bu məsələdə də onlara nə isə təklif olunacaq.

"Bina yəhudilərə verilsə, hansı addımları atacaqsınız" sualına isə K.Qasımov, "binanın yəhudilərə verilməsi reallaşarsa, o zaman öz münasibətimi bildirərəm. Hələlik isə bu məsələyə inanmıram", - deyə cavab verib.

Aytən NƏBİYEVA

Ekspress.- 2009.- 9 iyul.- S. 8.