Nazir teatr rəhbərləri ilə görüşdü

İyulun 9-da Azərbaycan Dövlət Gənc Tamaşaçılar Teatrında mədəniyyət və turizm naziri Əbülfəs Qarayev Azərbaycan teatrlarının rəhbərləri və rejissorları ilə görüşüb.

Prezident İlham Əliyevin mədəniyyət sahəsinə, o cümlədən teatrlara diqqət və qayğısından danışan nazir son illərdə bir neçə teatr binasının dövlət tərəfindən müasir zövqlə və yüksək səviyyədə əsaslı təmir olunduğunu diqqətə çatdırıb. Teatrların fəaliyyətinin yaxşılaşdırılması üçün dövlət büdcəsindən ayrılan vəsaitin artım dinamikası barədə məlumat verən Ə.Qarayev bildirib ki, son illərdə yeni tamaşaların hazırlanmasına yönəldilən maliyyə vəsaiti də xeyli çoxalıb.

Bununla bərabər, nazir vurğulayıb ki, Azərbaycanda teatr sənətinin daha da inkişaf etdirilməsi üçün teatrların xarici əlaqələri genişləndirilməlidir.

Görüşdə prezidentin 2009-cu il 18 may tarixli sərəncamı ilə təsdiq edilmiş "Azərbaycan teatrı 2009-2019-cu illərdə" Dövlət Proqramından irəli gələn məsələlər barədə fikir mübadiləsi aparılıb. Proqramın məqsəd və vəzifələri haqqında görüş iştirakçılarına ətraflı məlumat verilib.

Azərbaycanın tanınmış mədəniyyət və incəsənət xadimləri, teatrların rəhbərləri çıxış edərək, belə bir proqramın təsdiq edilməsinin dövlətin bu sahəyə böyük diqqət və qayğısının əyani təzahürü olduğunu, teatrların inkişafına təkan verəcəyini bildiriblər.

Ayxan

Ekspress.- 2009.- 10 iyul.- S. 10.