Ann Dersi jurnalistlərlə vidalaşdı: "Ömrümün sonuna qədər Azərbaycan xalqının dostu olacağam"

"Mən bu yay Bakını tərk edəcəyəm. Düşünürəm ki, mənim gedişim iyul ayına təsadüf edəcək... Mən Azərbaycanı onun xalqına, tarixinə, mədəniyyətinə və həmçinin, nail olduğu inkişafa olan dərin hörmət hissi ilə tərk edirəm... Amerikaya Bakıda xidmət etməkdən qürur duydum".

Azərbaycanda diplomatik missiyasını başa çatdırmaqda olan və prezident Barak Obamanın ABŞ-ın Litvadakı səfiri vəzifəsinə namizədliyini irəli sürdüyü xanım Ann Dersi dünən Azərbaycanın media əhli ilə vidalaşdı. Amerika səfirinin Badamdardakı iqamətgahında keçirilən mərasimdə bir qədər hüzn çaları vardı. Hər ayrılma, o "diplomatik" olsa belə, kədərlidir. Necə deyərlər, üzümüz-gözümüz xanım səfirə öyrəşmişdi. Ann Dersi yalnız indiyədək Azərbaycanda olan ABŞ səfirləri içərisində deyil, ümumiyyətlə, Bakıdakı bütün əcnəbi elçilər arasında jurnalistlərə ən yaxın, dost və həmdərd olan diplomat idi: başçılıq etdiyi səfirliyin qapıları mətbuat nümayəndələrinin üzünə həmişə açıq olar, hamımızla Azərbaycan türkcəsində danışmağa çalışar, xoş ovqatı ilə həmsöhbətinə optimizm aşılayar və təbii ki, heç bir sualımız cavabsız qalmazdı. Heç hiss etdirməzdi ki, superdövlətin böyük elçisidir...

Sadəlik, təvazökarlıq və yüksək minnətdarlıq duyğusu miss Dersini əksər həmkarlarından fərqləndirirdi. Mərasimdə azərbaycanca etdiyi çıxışındakı bir cümləyə diqqət yetirin: "Prezident Obamanın xidmətlərimi davam etdirmək üçün mənə başqa bir imkan verməsi mənim üçün böyük şərəfdir".

Xanım səfir çıxışını davam etdirərkən zarafatla yanımdakı həmkarıma pıçıldadım: ümid edək ki, ABŞ Senatı prezident Obamanın qərarını "süründürəcək" və Ann Dersinin Bakıdan gedişi uzanacaq.

Elə bu zaman səfir bildirdi ki, ABŞ sistemində prezident heç də bütün səlahiyyətlərə malik deyil: "Prezident Obama mənim təyin olunmağım barədə qərarını rəsmi qaydada Senata göndərdikdən sonra mən məhz Senatın təsdiqini gözləməli olacağam. Bu proseduraların dəqiq vaxtını demək çətindir, elə bu səbəbdən Azərbaycanı nə zaman tərk edəcəyimi tam dəqiqliklə deyə bilmərəm".

Gedişi ilə bağlı hisslərini qonaqları ilə bölüşən xanım səfirin vidalaşması diplomatcasına olduğu qədər, həm də səmimi, sıcaq və təsirli idi: "Birləşmiş Ştatlar illər boyu Azərbaycanın tərəfdaşı olacaq. Mən isə ömrümün sonuna qədər Azərbaycan xalqının dostu olacağam. Bu gözəl ölkə məni çox təsirləndirdi. Əmin ola bilərsiniz ki, gələcəkdə getdiyim hər bir yerdə Azərbaycan barədə danışacağam və hər zaman Azərbaycanın uğurlarına sevinəcəyəm".

Əlvida, miss Dersi! Sizə sakit Litvadakı diplomatik xidmətinizdə uğurlar arzulayırıq.

Z.Ziya

Ekspress.- 2009.- 11 iyun.- S. 2.