"Azərbaycan muğamı" hazırdı

Mədəniyyət və Turizm Nazirliyinin sifarişi ilə rejissor Emin Mirabdullayevin ekranlaşdırdığı "Azərbaycan muğamı" adlı sənədli filmin çəkilişləri yekunlaşıb.

"Yaddaş" sənədli filmlər studiyasında ərsəyə gətirilən filmin çəkilişləri Azərbaycanın müxtəlif rayonlarında aparılıb.

"Azərbaycan muğamı"nı Milli Konservatoriyanın müəllimi Şəhla Mahmudovanın ssenarisi əsasında ekranlaşdıran rejissor arxiv materiallarından da istifadə edib. Eyni zamanda, yazıçı Anarın muğam sənəti haqqında fikirləri, onun həyat yoldaşı Zemfira Səfərin xanəndə Cabbar Qaryağdıoğlu haqqında söhbətləri də filmdə öz əksini tapıb.

"Azərbaycan muğamı"nı xanəndələrin çıxışı ilə zənginləşdirən Emin Mirabdullayev xalq artistləri Əlibaba Məmmədov, Alim Qasımovun fikirlərindən də bəhrələnib. Həmçinin, gənc xanəndə Səbuhi İbayevin ifa etdiyi "Qarabağ şikəstəsi"ndən bir parça da sənədli filmdə yer alıb. Bəstəkar Eldar Mansurov, Heydər Əliyev Fondunun sektor müdiri Nadir Axundov da muğam haqqında fikirlərini bildirib.

Rejissorun bildirdiyinə görə, 20 dəqiqəlik film yaxın vaxtlarda təhvil veriləcək.

AYXAN

Ekspress.- 2009.- 20-22 iyun.- S. 12.