"Müxalifəti böhrandan heç nə çıxara bilməz"

Mübariz Qurbanlı: "Bu düşərgədəkilərin hansı ad altında birləşməklərindən asılı olmayaraq, nəticə olmayacaq"

Seçki Məcəlləsinə əlavə və dəyişikliklərlə bağlı təkliflər daim siyasi partiyaların diqqət mərkəzində olub. Xüsusilə də müxalifət partiyaları zaman-zaman bu qanuna müxtəlif dəyişikliklərin edilməsi təşəbbüsü ilə çıxış ediblər. Parlamentin ötən iclaslarının birində isə Yeni Azərbaycan Partiyasının təmsilçisi Siyavuş Novruzov belə bir təklif irəli sürüb. O, Konstitusiyaya edilən dəyişikliklərin Seçki Məcəlləsində də dəyişikliklər etmək zərurətini ortaya çıxardığını bildirib. Amma hakim partiyanın təmsilçiləri hələlik konkret olaraq hansı maddələrə dəyişiklik edilməsi ilə bağlı təkliflərini açıqlamayıblar. YAP icra katibinin müavini, deputat Mübariz Qurbanlı isə hələlik konkret təkliflərlə bağlı danışmağı tez hesab edir.

- Siyavuş Novruzov Seçki Məcəlləsinə əlavə və dəyişikliklər təklifi ilə çıxış edib. Bu təklifi necə qiymətləndirirsiniz?

- Milli Məclisin iclasında bələdiyyə seçkiləri ilə bağlı müddəalara müəyyən dəyişikliklərin edilməsi ilə bağlı fikirlər səsləndi və hesab edirəm ki, bu, normal təklifdir. Gələcəkdə buna baxılması təbii ki, nəzərdə tutula bilər. Bir təklif kimi səsləndirilib, amma indiki şəraitdə seçkilərə az qaldığı bir vaxtda bu, bəlkə də baş tuta bilməz. Bununla bərabər mən bu barədə indi dəqiq bir söz deyə bilmərəm.

- Hansı maddələrə dəyişikliklərin edilməsi nəzərdə tutulur?

- Dediyim kimi, burada söhbət yalnız bələdiyyələrlə bağlı məsələlərdən gedir. Bələdiyyələrdə namizədlər irəli sürülərkən kiçik bələdiyyələrdə də bələdiyyə üzvlərinin sayı məsələsi vardı. Söhbət ondan gedir ki, başqa ölkələrdə olduğu kimi kiçik bələdiyyələrdə üzvlərin sayı məsələsinə baxılsın və ola bilsin ki, kiçik kəndlərdə bələdiyyə üzvlərinin sayı yox, başqa bir forma seçilsin. Hər halda, bu ideyaca çox normaldır. Amma perspektivdə buna baxıla bilər.

- 2004-cü ildə bələdiyyə seçkilərini boykot edən müxalifət partiyaları bu dəfə seçkilərdə iştirak etmək istəklərini bəyan ediblər. Bununla bərabər onlar bir sıra dəyişikliklərin edilməsini, hakimiyyətlə dialoqu vacib sayırlar...

- YAP həmişə cəmiyyətdə dialoqun tərəfdarı kimi çıxış edib. Amma bu seçkidir. Kim istəsə iştirak edə və ya etməyə bilər. Sadəcə olaraq, müxalifətin bütün yerlər üzrə namizəd irəli sürməsi üçün potensialı yoxdur. Söhbət bundan gedir. Eyni zamanda potensialla yanaşı, elə namizəd olmalıdır ki, onun seçilmə imkanları mümkün olsun. Parlament seçkilərindən fərqli olaraq bələdiyyə seçkiləri daha mürəkkəbdir. Yerlərdə namizədləri daha yaxşı tanıdıqları üçün mübarizə də daha gərgin gedir. Biz namizəd irəli sürərkən, məhz bu amili əsas götürürük və nəzərə alırıq ki, həmin namizəd insanlar arasında daha yaxşı tanınır. Siyasi partiyaların rəhbərlərinə tövsiyə edirəm ki, öz namizədliklərini versinlər, görsünlər ki, heç olmasa bələdiyyə üzvü seçiləcəklər, ya yox. Çünki onlar böyük iddialarla yaşayırlar. Ona görə də ilk növbədə güclərini bələdiyyə seçkilərində sınamalıdırlar.

- İsrail prezidenti Şimon Peresin Azərbaycana nəzərdə tutulan səfəri İran tərəfindən kəskin etirazla qarşılanıb. Hətta bununla bağlı İran Silahlı Qüvvələrinin komandanı bəyanat da verdi. Bu mövqeni necə qiymətləndirirsiniz?

- Mən Azərbaycan-İran münasibətlərində bir soyuqluq görmürəm. Hər iki ölkə arasında əməkdaşlıq olub və biz bu əməkdaşlığı davam etdirməliyik. İran tərəfdən Azərbaycana nə dövlət başçısı, nə də Xarici İşlər Nazirliyi səviyyəsində hər hansı bəyanat verilməyib. Dövlətin əsas xətti bunlardır. Ona görə də hansısa bir dövlət xadiminin və ya generalın bəyanatı önəmli deyil.

- İranın "Səhər" telekanalında Azərbaycanın ünvanına təhdidlərin efirə verilməsi, rəsmi Tehranın Bakını cəzalandırmalı olduğu kimi bəyanatlar səsləndirir...

- İran tərəfi dəfələrdə "Səhər" kanalının müstəqil kanal olduğunu bəyan edib. Ona görə də Azərbaycanın müstəqil televiziya və radio kanalları da İranı tənqid edə bilər. O ki qaldı İranın Azərbaycanın cəzalandırması məsələsinə, indi XXI əsrdir, heç kim heç kimi cəzalandıra bilməz. Dünya qanunlarla idarə olunur, aparıcı ölkələr, beynəlxalq təşkilatlar var. Bu gün belə bir məsələdən danışmaq yersizdir. İnanmıram ki, kimsə kimisə cəzalandıra bilsin. Əgər kimsə öz gücünə görə başqa ölkəni cəzalandırmaq istəyirsə, o zaman gərək Amerika dünyanı işğal etsin. Azərbaycana təzyiq etmək üçün təzyiq imkanları olmalıdır. Sözlə təzyiq göstərmək mümkün deyil. Kimsə bizə söz deyəcəksə, biz də cavabını verəcəyik. O tərəfdə "Səhər" kanalı danışacaq, bizdə də danışan var.

- Dağlıq Qarabağ münaqişəsi mövzusunda iqtidar-müxalifət dialoqun keçirilməsi ilə bağlı təkliflər səslənir. Belə bir dialoqun keçirilməsi gözlənilirmi?

- YAP bütün cəmiyyət, siyasi qüvvələr, qeyri-hökumət təşkilatları üçün açıq təşkilatdır. Partiyanın qapısı dialoq üçün hər kəsə açıqdır. Biz indiyə qədər də müxtəlif mövzularda siyasi qüvvələrlə dialoq mühitində müzakirələr, mükalimələr, dəyirmi masalar keçirmişik. Bundan sonra da müxtəlif mövzularda tədbirlər keçirəcəyik, buraya da ayrı-ayrı siyasi partiyaları dəvət edəcəyik. Hesab edirik ki, Azərbaycan özü dialoq mühitində fəaliyyət göstərir, cəmiyyətdə dialoq mühiti var. Bəzi siyasi qüvvələr cəmiyyətdən kənarda - azlıqda qalaraq bu mühitdən kənarda olmaqlarını dialoqun olmaması kimi izah etməyə cəhd göstərirlər. Ancaq cəmiyyət dialoq mühitindədir, YAP da hər bir məsələ üzrə dialoqa hazırdır.

- Aparılacaq dialoqa müxalifətdə olan Müsavat, AXCP, ADP və digərlərinin də dəvəti mümkündürmü?

- Biz bir məsələni müzakirə edəndə bütün siyasi qüvvələri dəvət edirik və bizim müzakirələr açıq xarakterlidir. Dəvəti qəbul edib gələnlərlə istənilən mövzuda müzakirə aparırıq. Eyni zamanda, bizi dəvət edən istənilən siyasi qüvvənin keçirdiyi dəyirmi masada iştirak edərək mövqeyimizi açıqlayırıq. Hesab edirik ki, bu özü elə dialoq deməkdir.

- Müsavat Partiyasının başqanı İsa Qəmbər Azərbaycan Xalq Cəbhəsinin bərpa olunması təşəbbüsü ilə çıxış edib. Bu təklifi necə qiymətləndirirsiniz?

- Müxalifətin bəzi nümayəndələrinə baxıram və təəccüblənirəm ki, bu adamlar nə istəyirlər və nə deyirlər. Tutaq ki, hansısa birliyin adını Xalq Cəbhəsi, yaxud Müsavat qoydular. Ad dəyişməklə nə dəyişəcək ki? Əgər cəmiyyətdə sizin tərəfdarınız yoxdursa, təşkilatın adını nə qoyursan qoy, onun heç bir əhəmiyyəti olmayacaq. Təşkilatın başında kim durur-dursun, ona hansı müxalifətçi rəhbərlik edir-etsin, xalqın əgər hakimiyyətə, prezidentə, onun siyasətinə inamı varsa, həmin müxalifətçilər o təşkilatlarını nə adlandırsalar da, narazı kütlə əgər 5 faiz varsa, onu keçməyəcək. İstəyir adı Xalq Cəbhəsi olsun, yaxud Klassik Xalq Cəbhəsi, istəyir lap Bütöv Azərbaycan Xalq Cəbhəsi, Müsavat qoy, nə adlandırırsan adlandır, faizi artıra bilməyəcəklər.

- Bəziləri bildirir ki, belə bir addımın atılması müxalifəti böhrandan çıxara bilər...

- Müxalifəti düşdüyü böhrandan heç nə çıxara bilməz. Çünki bu müxalifət liderləri özləri də böhran içindədirlər və müxalifətçilik düşüncəsi özü də böhran içindədir. İsa Qəmbər bir daha özünə məxsus guya belə bir proqnoz verib ki, yaxın vaxtda xalq ayağa qalxacaq, nə isə olacaq... İsa Qəmbərə xatırladıram ki, 1993-cü ildən bu yana verdiyi proqnozları göz önünə gətirsin. Görsün ki, bu müddətdə verdiyi proqnozların hansı özünü doğruldub. Biri də doğrultmayıb və son fikirləri də özünü doğruldan deyil. Mənasız-mənasız proqnozlar verirlər.

- Ümumiyyətlə, Xalq Cəbhəsinin bərpa oluna biləcəyini gözləyirsinizmi?

- Əvvəla, mən gözləmirəm ki, müxtəlif müxalifət partiyaları hansısa qurumda birləşsinlər. Digər tərəfdən isə lap birləşsələr də, bunun hansısa bir nəticə verəcəyini düşünmürəm. Dediyim kimi onlar 5 faizdən o tərəfə keçə bilməyəcəklər. Üçüncüsü isə bunlar dəfələrlə müxtəlif adlar altında birləşiblər. Bu birləşmələr bu vaxta kimi necə olubsa, indi atacaqları addımlar da onun davamı olacaq. Ona görə ki, bu şəxslər 1993-cü ildən bu yana Azərbaycan siyasətində eyni sözləri təkrar etməklə məşğuldurlar və xalq onlara inanmır.

Asim SƏFƏROV

Ekspress.- 2009.- 26-29 iyun.- S. 12