BDU 90 illiyini qeyd etdi

Prezident Bakı Dövlət Universitetinin fəxri doktoru oldu

Dünən Şərqin və Azərbaycanın ilk ali məktəbi olan Bakı Dövlət Universitetinin (BDU) 90 illik yubileyinə həsr olunmuş təntənəli mərasim keçirildi. Mərasimdə Azərbaycan prezidenti İlham Əliyev və xanımı Mehriban Əliyeva da iştirak edirdilər.

Universitetin akt zalında keçirilən yubiley mərasimi BDU-nun tələbə xorunun ifasında universitetin himninin oxunuşu ilə açıldı. Prezident İ.Əliyev mərasimdəki çıxışında BDU-nun ölkənin həyatında oynadığı roldan, tarixi xidmətlərindən danışaraq vurğuladı ki, bu ali təhsil müəssisəsi Azərbaycan dövləti və xalqı üçün yüksəkixtisaslı milli kadrlar hazırlayıb.

BDU-nun 90 illik yubileyinin dövlət səviyyəsində qeyd olunduğunu bildirən universitetin rektoru, akademik Abel Məhərrəmov Azərbaycan Xalq Cümhuriyyətinin yadigarı olan Bakı Dövlət Universitetinin 90 ilə yaxın fəaliyyəti dövründə Azərbaycanın ilk ali təhsil ocağı kimi ölkə həyatının bütün sahələrinə güclü təsir edərək təhsilin, elmin, mədəniyyətin inkişafı sahəsində əvəzsiz xidmətlər göstərdiyini vurğuladı: "BDU 1919-cu il sentyabrın 1-də Azərbaycan Xalq Cümhuriyyəti parlamenti tərəfindən təsis edilib. Bu gün BDU-nun kollektivi universitetin yaranmasında əməyi olan o nurlu insanları yad edir. BDU-nun keçdiyi şərəfli tarixi yol Azərbaycan təhsilinin, elminin və mədəniyyətinin inkişafı yoludur".

A.Məhərrəmovun sözlərinə görə, BDU klassik universitetdir və bu universitetin digər ali məktəblərin yaranmasında da tarixi rolu olub: "Respublikada ali məktəb sisteminin yaradılmasında baza rolunu oynayan universitet bu gün də ali məktəblərin flaqmanıdır".

Rektor habelə bildirdi ki, universitetin Elmi Şurası prezident İlham Əliyevə BDU-nun fəxri doktoru adının verilməsi haqqında qərar qəbul edib. Sonra İlham Əliyevə fəxri doktorluq mantiyası təqdim olundu.

Tədbirdə Moskva Dövlət Universitetinin, Türkiyənin Atatürk Universitetinin, Tiflis Dövlət Universitetinin, Tehran Universitetinin və Qazaxıstanın Lev Qumilyov adına Avrasiya Milli Universitetinin rektorları, eləcə də Azərbaycanın ali məktəb rektorları çıxış edərək təbriklərini çatdırdılar. Mərasimdə dünyanın bir sıra universitetlərindən 70 nəfər qonaq iştirak edirdi.

A.Məhərrəmov tədbirin sonunda çıxış edərək prezident İlham Əliyevin və xanımının yubiley tədbirinə qatılmasını əlamətdar hadisə kimi dəyərləndirdi və qeyd etdi ki, bu, Azərbaycan elminə, təhsilinə olan böyük diqqət və qayğıdır.

"Bu gündən etibarən BDU 100 illiyinə start verdi. Mən əminəm ki, universitetin 100 illiyini daha təntənəli şəkildə qeyd edəcəyik", - deyə rektor sonda bildirdi.

Xatırladaq ki, 1918-ci il mayın 28-də istiqlal bəyannaməsini qəbul edən Azərbaycan Xalq Cümhuriyyətinin parlamenti 1919-cu il sentyabrın 1-də Bakı Dövlət Universitetinin təsis edilməsi haqqında qanun qəbul edib. Universitetin təsis edilməsində cümhuriyyətin banisi Məhəmməd Əmin Rəsulzadənin böyük rolu olub. BDU-nun ilk rektoru isə professor Vasili Razumovski olub.

Təsdiq edilən qanuna əsasən tarix-filologiya, fizika-riyaziyyat və tibb fakültələrinin təməli qoyulub. Noyabrın 15-də isə tarixçilər - N.A.Dubrovski və L.A.Ziminin mühazirələri ilə ilk dərs günü başlanıb. 1920-ci il aprelin 28-də bolşevik Rusiyasının Azərbaycanı işğal etməsinə və Azərbaycanda sovet hakimiyyətinin qurulmasına baxmayaraq BDU fəaliyyətini davam etdirib. Lakin 1930-cu ildə Xalq Komissarları Soveti universitetin bağlanması barədə qərar verib. Bununla da Universitetin pedaqoji fakültəsi Ali Pedaqoji İnstituta, tibb fakültəsi Azərbaycan Tibb İnstitutuna, iqtisad fakültəsi Ticarət-Kooperativ İnstitutuna, hüquq fakültəsi isə Sovet Quruculuğu və Hüquq İnstitutuna çevrilib. Digər fakültələr isə müvafiq institutlara verilib. Nəhayət, Azərbaycan Dövlət Universiteti 25 may 1934-cü ildə yenidən bərpa edilib və bu günə qədər fəaliyyətini davam etdirməkdədir.

Cəmi 3 fakültə ilə fəaliyyətə başlayan BDU-da hazırda 16 fakültə, 121 kafedra, 2 elmi-tədqiqat institutu, 4 elmi-tədqiqat mərkəzi, 1 elmi-tədqiqat hissəsi, 20 elmi-tədqiqat laboratoriyası fəaliyyət göstərir.

Dövlət başçısının fərmanı ilə noyabrın 1-də BDU-nun 107 nəfər əməkdaşı 90 illik yubileylə əlaqədar təltif olunub. Prezidentin sərəncamları ilə Azərbaycanda təhsilin və elmin inkişafındakı böyük xidmətlərinə görə Fuad Qasımzadə "İstiqlal" ordeni ilə, Vasim Məmmədəliyev isə "Şərəf" ordeni ilə təltif ediliblər.

Prezidentin başqa bir sərəncamı ilə BDU-nun 14 əməkdaşı "Şöhrət" ordeni ilə təltif edilib:

Babazadə Vasif

Əhmədli Cəmil

Əliyev İsmayıl

Əliyeva Rəfiqə

Göyçaylı Şövqi

Hacıyev Aqil

Hacıyev Tofiq

Qasımov Nemət

Məhərrəmov Abel

Namazov Qara

Nəcəfov İsmət

Rüstəmov İzzət

Vəliyev Tofiq

Yaqubov Məhəmməd

Universitetin bir qrup işçisinə isə "Tərəqqi" medalı, "Əməkdar müəllim", "Əməkdar elm xadimi", "Əməkdar jurnalist", "Əməkdar Hüquqşünas" və "Əməkdar Mühəndis" adları verilib.

Prezident həmçinin Azərbaycanda təhsilin və elmin inkişafında böyük xidmətləri olan bir qrup şəxsə Azərbaycan Prezidentinin fərdi təqaüdlərinin verilməsi barədə də sənəd imzalayıb:

Bayramov Əkbər

Əsədullayev Seyfulla

Əsgərov Bəhram

Məlikova Məsumə

Mustafayev Qara

Mütəllimov Təhsin

Namazov Qəmbər

Aqil ASLAN

Ekspress.- 2009.- 3 noyabr.- S. 2; 9.