"Aydınlar" qeydiyyata alındı

Qulamhüseyn Əlibəyli: "Ola bilər parlament seçkiləri ərəfəsində müxalifətyönlü partiyalarla blok yaradaq"

Ötən il prezident seçkiləri ərəfəsində yaradılan Aydınlar Partiyasının qeydiyyatsızlığına son qoyuldu. Belə ki, bələdiyyə seçkiləri öncəsi "Aydınlar" qeydiyyata alındı. Bununla da Azərbaycanda dövlət qeydiyyatına alınmış partiyaların sayı 54-ə çatdı. Aydınlar Partiyasının sədri Qulamhüseyn Əlibəyli "Ekspress"ə müsahibəsində partiyanın bundan sonra atacağı addımlardan danışıb.

- Azərbaycanda yeni bir partiyanın dövlət qeydiyyatına alınmasını müsbət bir addım kimi qiymətləndirirəm. Bu proses təxminən bir ilə qədər davam etdi. Azərbaycanda partiyaların dövlət qeydiyyatına alınması təkcə hüquqi yox, həm də siyasi məsələdir. Hakimiyyət özü müəyyənləşdirir ki, hansı partiyanı qeydiyyata almaq lazımdır. Bu vaxta qədər olan təcrübə də bunu göstərir. Bu baxımdan hesab edirəm ki, bu vaxta qədər hakimiyyət Aydınlar Partiyasının mövqeyini dəqiq müəyyənləşdirməmişdi, indi görünür belə hesab edirlər ki, bizim partiyanın seçdiyi yol, qarşısına qoyduğu məqsəddə qeyri-qanuni heç nə yoxdur. Gec də olsa Azərbaycan hakimiyyəti qəbul olunan qanunların icrasını həyata keçirdi.

- Qeydiyyat probleminin həlli partiyanın fəaliyyətində ciddi dönüş yaradacaqmı? Bundan sonrakı planlarınız nədən ibarətdir?

- Çalışacağıq ki, birinci növbədə təşkilati işlərimizi başa çatdıraq. Azərbaycanın əksər hissələrində yerli təşkilatlarımızı qurmağa çalışacağıq. Növbəti parlament seçkilərinə start verilənə kimi Azərbaycanın bütün rayonlarını və bütün seçki dairələrini əhatə edən təşkilati bir struktura malik olmaq niyyətindəyik. Digər tərəfdən, bələdiyyə seçkiləri ilə bağlı təbliğat işimiz güclənəcək, partiya olaraq bu işimizi quracağıq. Baxmayaraq ki, üzvlərimiz namizədliklərini fərdi qaydada irəli sürüblər, biz bu işi aparacağıq. Bələdiyyəyə 100-ə qədər namizədimiz var. Partiyanın fəalları rayonlara ezam olunacaqlar və onlar yerlərdə təbliğat işini aparacaqlar.

- Qəzetimizə müsahibənizdə bildirmişdiniz ki, bələdiyyə seçkilərinə kimi partiya qeydiyyata alınsa, o zaman namizədlərinizin partiya adından irəli sürülməsinə çalışacaqsınız. İndiki halda bu mümkündürmü?

- Çox təəssüf ki, artıq qanunla müəyyən olunmuş müddət başa çatıb, namizədlər də bitərəf kimi qeydə alınıblar. Artıq onların adlarını seçki bülletenlərinə partiya adından daxil etmək mümkün deyil. Buna baxmayaraq, biz onların təbliğatını partiyanın nümayəndəsi kimi aparacağıq.

- Partiyanın emblemi və digər rəmzləri hazırlanıbmı?

- Artıq partiyanın emblemini qəbul etmişik. Bu, qurultayda həyata keçirilib. Amma qeydiyyatdan sonra bəzi texniki məsələlər var - blank hazırlamaq, möhürün hazırlanması, Nizamnamənin notariusa təsdiq olunub rayon təşkilatlarına göndərilməsi və digər proseduralar həyata keçiriləcək.

- Sizin partiyanın emblemi necədir və mənası nədir?

- Bizim çox sadə emblemimiz var. İşıq verən dairə fonunda partiyanın adı yazılıb. Bu, aydınlığa çıxmaq mənasını verir.

- Partiyanın siyasi kursu necə olacaq, qeydiyyatdan sonra siyasi kursda dəyişiklik gözlənilirmi?

- Biz siyasi kursumuzu elan etmişik ki, fəaliyyətimizin əsas forması olaraq seçkilərdə iştiraka üstünlük veririk. Digər formalardan - kütləvi aksiyalar və digərlərindən də imtina etmirik. Bələdiyyə seçkilərində iştirak məsələsi yekunlaşandan sonra növbəti il keçiriləcək parlament seçkilərində iştirak etmək formasını müəyyənləşdirəcəyik. Bu sahədə ilkin olaraq digər siyasi partiyalarla əməkdaşlığa hazır olduğumuzu bildiririk. Dağlıq Qarabağ problemi ilə bağlı bir sıra tədbirlərdə, xüsusilə Demokratiya Uğrunda İttifaqın keçirdiyi tədbirlərdə iştirak edirik. Onlarla faktiki olaraq əməkdaşlıq edirik. Amma digər siyasi partiyalarla əməkdaşlığımız yoxdur. Və yaxud biz bloklaşmaya üstünlük vermirik və bundan imtina edirik. Ola bilsin ki, parlament seçkiləri ərəfəsində müxalifətyönlü partiyalarla hansısa blok yaradaq və seçkilərdə birgə iştirak edək.

- DUİ ilə artıq əməkdaşlıq razılaşması olubmu?

- Qeyd etdiyim kimi, bu, faktiki əməkdaşlıqdır. Yəni, onların tədbirlərinə qatılırıq, həmçinin qərarların qəbulunda da iştirak edirik.

- DUİ-yə rəsmi olaraq üzv olmaq fikriniz varmı?

- Hələlik hər hansı birliyə üzv olmaq fikrimiz yoxdur. Biz siyasi bloklaşma prosesində iştirak etmək istəmirik. İndiki məqamda biz siyasi qurumlarla ikitərəfli əməkdaşlıq etməyi əhəmiyyətli sayırıq. Daha doğrusu, konkret məsələ ətrafında əməkdaşlığa üstünlük veririk.

- Bloklara üzv olmamağınızın səbəbi nədir?

- Partiyamız hələ təşkilatlanma mərhələsindədir. Təşkilatlanma işini tam başa çatdıraq, ondan sonra müəyyənləşdirəcəyik ki, təkbaşına fəaliyyət göstərəcəyik, yoxsa hansısa ittifaq daxilində. Sadəcə olaraq biz partiya maraqlarına görə təkbaşına fəaliyyət göstərməyə üstünlük veririk.

- Partiyanın ölkənin bütün ərazisində təşkilatlarının olmasına çalışacağınızı bildirirsiniz. Sizcə, indiki şəraitdə bunu həyata keçirmək nə qədər mümkündür?

- Azərbaycanda seçkilərin necə keçirildiyi və yaxın gələcəkdə də necə keçiriləcəyi hamıya bəllidir. Yəni, seçkilərin hamısı tam şəkildə hakimiyyətin nəzarəti altında keçirilir. Digər siyasi partiyaların bu prosesdə iştirakı çətindir. Hazırda bələdiyyə seçkiləri ilə bağlı gedən proseslər də bunu sübut edir. Hansısa müxalifət partiyasının 1000-dən artıq namizədi varsa, onun cəmi 100-nü qeydə alırlar. Bir çox partiyalarda bu proses gedir. Müxalifətçilərə qarşı təqib və təzyiqlər, əsassız olaraq qeydə almaqdan imtinanı indiki reallıqda təbii qəbul edirik. Amma partiya olaraq seçkilərdə iştirak variantına üstünlük veririk. Bu baxımdan da ölkənin bütün ərazisində yerli təşkilatlarımızın olmasını vacib sayırıq.

- 2010-cu ildə keçiriləcək parlament seçkiləri ilə bağlı planlarınız nədən ibarətdir?

- Bütün seçki dairələrini əhatə etməyə çalışacağıq. Ən azından isə seçki dairələrinin əksəriyyətindən öz namizədlərimizlə çıxış etməyə çalışacağıq. Təbliğatımızı da tam olaraq həmin şəxslərin qalib gəlməsi üzərində quracağıq.

Asim Səfərov

Ekspress.- 2009.- 26 noyabr.- S. 12.