Prezident İlham Əliyev: "İqtisadiyyatımız uğurla inkişaf edir

Türkiyə ilə tranzit problemi Azərbaycan qazının Avropaya tam gücü ilə nəqlinə mane olur

Azərbaycan prezidenti İlham Əliyevin sədrliyi ilə oktyabrın 16-da Nazirlər Kabinetinin 2009-cu ilin doqquz ayının sosial-iqtisadi inkişafının yekunlarına həsr olunmuş geniş iclası keçirilib.

Dövlət başçısı bildirib ki, bu ilin 9 ayında Azərbaycan iqtisadiyyatı uğurla inkişaf edib. Dünyada maliyyə böhranının, ölkələrin əksəriyyətində iqtisadi tənəzzülün yaşandığı bir vaxtda Azərbaycan iqtisadiyyatında müsbət meyllər müşahidə olunmaqda davam edir. Prezident vurğulayıb ki, Azərbaycan öz iqtisadi siyasətini apararkən "daxili resurslarına əsaslanır" və belə olan halda Azərbaycan iqtisadiyyatı istənilən vəziyyətdən çıxa bilər.

Bu ilin 9 ayında ölkədə ÜDM 6,1 faiz, sənaye istehsalı 5 faiz artıb. Kənd təsərrüfatında da 3 faiz artım qeydə alınıb, bu il ilk dəfə Azərbaycanda rekord səviyyədə - 3 milyon ton taxıl istehsal edilib (AzərTAc).

Ölkədə makroiqtisadi vəziyyət sabit qalıb, inflyasiya 2,1 faiz təşkil edib. Bu da onu göstərir ki, qlobal maliyyə böhranının Azərbaycan vətəndaşlarının həyatına təsiri minimal olub. Manat öz sabitliyini qoruyub, 9 ayda əhalinin pul gəlirləri təxminən 10 faiz, orta aylıq əmək haqqı 15 faiz artıb. İndi Azərbaycanın valyuta ehtiyatları 19 milyard dollardır. Hazırda 50 min ailə ünvanlı sosial yardım alır və bu proqram ümumilikdə 700 min insanı əhatə edir.

"Biz tam əminik ki, yürütdüyümüz siyasət Azərbaycan xalqının mənafeyinə xidmət edir", - deyə prezident bəyan edib və bunun ən gözəl örnəyinin 9 ayın yekunlarında da əks olunduğunu bildirib. Dövlət başçısı Azərbaycanda neft gəlirlərinin qeyri-neft sektorunun inkişafına yönəldildiyini diqqətə çatdıraraq deyib ki, görülən tədbirlər sayəsində ölkədə yoxsulluğun səviyyəsi aşağı düşüb. 2003-cü ildən bəri Azərbaycanda 824 min yeni iş yeri açılıb.

Daha sonra iclasda iqtisadi inkişaf, təhsil, nəqliyyat, sənaye və energetika naziri çıxış ediblər.

Prezident İlham Əliyev yekun nitqində bildirib ki, iqtisadi inkişaf tempi saxlanılmalıdır. 2003-2008-ci illərdəki iqtisadi inkişafın gələcək üçün gözəl zəmin yaratdığını deyən dövlət başçısı əmin olduğunu bildirib ki, uğurlu iqtisadi göstəricilər 2010-cu ildə də davamlı xarakterini saxlayacaq. "Bizim fəaliyyətimiz beynəlxalq təşkilatlar tərəfindən də qiymətləndirilir. Belə olmasaydı, Dünya Bankı Azərbaycanı 2008-ci ildə ən islahatçı ölkə kimi tanımazdı", - deyən prezident Dünya İqtisadi Forumunun ölkəmizi rəqabət qabiliyyətliliyinə görə dünyada 51-ci, MDB-də isə 1-ci ölkə elan etdiyini diqqətə çatdırıb.

Dövlət başçısı qeyd edib ki, gələn ilin dövlət büdcəsi balanslaşdırılmış səviyyədə tərtib olunub, neftin 1 barelinin qiyməti büdcədə 45 dollar müəyyən edilib. Prezident vurğulayıb ki, indi Azərbaycan özünü enerji ilə tam təchiz etməklə bərabər artıq digər ölkələrə də elektrik enerjisi ixrac edir. Gələn ilin əvvəlindən isə alternativ enerji mənbələrinin yaradılması diqqətdə saxlanılacaq.

Azərbaycan qazının enerji təhlükəsizliyi məsələlərində daha mühüm rol oynayacağını, bölgə ölkələrinin Azərbaycanın enerji resurslarına ehtiyacının olduğunu bildirən dövlət başçısı qeyd edib ki, Türkiyə ilə qaz sahəsində tranzit məsələlərinin hələ də həll edilməməsi Azərbaycan qazının Avropaya tam gücü ilə nəqlinə mane olur: "Gələn ildən Azərbaycan qazı Rusiyaya ixrac ediləcək və perspektivdə İrana da qaz ixracı həyata keçirilə bilər".

Dövlət başçısı 9 ayın yekunlarından razı qaldığını və xalqın milli maraqlarının təmin olunması üçün işlərin gələcəkdə də davam etdirilməsinin vacibliyini vurğulayıb. Müşavirədə prezident 2010-cu ilin ölkəmizdə "Ekologiya ili" elan edilməsi təşəbbüsü ilə çıxış edib.

A.Xəlil

Ekspress.- 2009.- 17-19 oktyabr.- S. 3.