Brilliant Dadaşova 50 yaşını qeyd etdi

 

"Mənim ən sevdiyim mövsüm payızdır, çünki bu mövsümdə doğulmuşam. Mən tamamilə işə bağlı insanam. Hətta öz ad günümdə belə işlə məşğul oluram. Bu gün səsyazma studiyasında aranjmançı bəstəkarlarla görüşəcəyəm. Sonra qızlar Ruxa, Cəmilə mənimlə bir gündə doğulmuş türkiyəli mətbuat katibimlə birgə evdə ad günümüzü qeyd edəcəyik. Cəmilə bu gün dadlı plov hazırlayacağına söz verib. Bu gün idman pəhrizi unudub, doyunca plov yeyəcəyəm".

APA-nın məlumatına görə, bunu yaydığı açıqlamada dünən 50 yaşını qeyd edən xalq artisti Brilliant Dadaşova deyib.

Hazırda Türkiyədə olan elə ad gününü qardaş ölkədə qeyd edən xalq artisti ad günündə çox kövrəldiyini qeyd edib: "Mənim doğum günüm özüm ailə üzvlərim üçün adi gün deyil. Ancaq ənənəvi olaraq bu günü adi qaydada qeyd edirəm. Bu zamana kimi geniş təntənəli ad günü keçirməmişəm. Bu da onunla bağlıdır ki, mən hələ öz yaradıcılığımı tam açmamışam. İşləmək, yeni nəğmələr yazmaq, kliplər çəkdirmək hissi məni heç zaman tərk etmir. Bəlkə hansısa bir gün böyük təntənəli ad günü keçirəcəyəm, ancaq o bu gün deyil. Həmin gün, mən sizi əmin edirəm ki, çox möhtəşəm bayram olacaq. Planlaşdırıram ki, belə bir ad gününü oğlum universiteti bitirəndən sonra qeyd edim. Ad günümdə həmişə kədərlənirəm. Mən çox erkən yaşlarımda anamı itirmişəm, hər ad günümdə onu gözləmişəm. Hamı mənə deyirdi ki, anan Moskvadadır bu yaxınlarda qayıdacaq... Atamın mənə verdiyi hədiyyələrə gəldikdə, üzərində allı-güllü hərflər yazılmış ləçəyi xatırlayıram. Həmin hədiyyəni təqdim edəndə, atam mənə dedi: "Qızım, sənin bacılarına üzərində güllər əks olunmuş ləçəklər verdim, sənə isə məhz üzərində hərflər olanı verirəm. Bunu təsadüfən etmirəm, mən bilirəm ki, sən ağıllısan mən səninlə fəxr edəcəyəm". Bu sözləri mən heç zaman unutmaram".

B.Dadaşova bu gün tanımadığı adamlardan 100-lərlə təbrik ismarıcları aldığını da əlavə edib: "Siz təsəvvür etməzsiniz bu qədər xoş haldır. Mən Türkiyə vaxtı ilə səhər saat 10-dan təbriklər almağa başlamışam. Bakıda artıq saat 12 idi. Bilirsiniz, biri var səni tanıdığın insan təbrik edə, biri var heç zaman görmədiyin, tanımadığın insanlar sənə ürək sözlərini yazıb təbrik etsinlər. Bu çox şeydən xəbər verir, ilk növbədə mənim yaradıcılığıma olan məhəbbətdən. Bu, məhəbbətdən böyük bir şeydir. Bu insanlar mənim musiqimlə, yaradıcılığımla yaşayır onların məhəbbəti onlar üçün yaratmağa mənə böyük qüvvə verir, onların məhəbbəti məni qanadlandırır. Səmimi təbrik məhəbbətə görə hamıya təşəkkür edirəm".

 

 

Ayxan

 

Ekspress.- 2009.- 16 sentyabr.- S. 10.