Mərhəmət və məhəbbət
pərvanəsi
26 avqust ölkəmizin birinci xanımı, YUNESKO və
İSESKO-nun xoşməramlı səfiri, Azərbaycanın
millət vəkili Mehriban xanım Əliyevanın doğum
günüdür
"Qadınlar bəşəriyyətin tərbiyəsinə
filosoflardan daha çox xidmət göstərmişlər".
Tofiq Fikrət, tanınmş türk şairi
Ölkəmizin birinci
xanımı, dövlət başçımızın
sevimli ömür-gün yoldaşı Mehriban xanımın
milli-mənəvi dəyərlərimizin, azərbaycançılığımızın
hərtərəfli yüksəlişi naminə göstərdiyi
mütərəqqi xidmətlərinin, nail olduğu
çoxsaylı uğurlarının şahidi olduqca iki əziz
insanın həzin xatirəsi tez-tez yaddaşımda
canlanır. Ürəklərdə əbədiyaşar bu
insanlar, könüllərdə həmişəlik məhəbbət
çırağı yandıran, yüzlərcə xəstənin
gözünə və həyatına nur bəxş edən,
xalqımızın alim qızı, akademik Zərifə
xanım Əliyeva və milli liderimiz, müsəlman-türk
dünyasının qürur mənbəyi olan Heydər Əliyev...
Zərifə xanım
xalqını canından artıq sevib ömrünün son
günlərinədək ona qayğısını, mərhəmətini
əsirgəmədiyi kimi, rəfiqələrinə, həmkarlarına
da ülvi münasibət bəsləyərdi. Keçmiş
ittifaqın istər tanınmış qadın oftalmoloq-alimləri,
istərsə də müxtəlif peşə sahibləri olan
ziyalı xanımlarla sıx ünsiyyət saxlayardı.
Onlarla məktublaşar, ailələrindən hal-əhval
tutar, pak, səmimi duyğularını, xoş
arzularını paylaşar, lazım gəldikdə bu insanlara
hər sahədə məsləhət və tövsiyələrini
bildirərdi.
Moskvada yaşayan həmkarı
professor O.P.Dobromislovaya yazdığı cavab məktublarındakı
tarixə dönmüş bu sətirləri kövrələ-kövrələ
xatırlayıram: "... İlham böyüdükcə
ciddiləşir. Hələlik onun bəyəndiyi qız
yoxdur və bu haqda fikirləşmir..."
Bir neçə il sonra:
"... Ailəmizdə sevindirici bir hadisə baş verib -
oğlumu evləndiririk. Gəlinimiz Tibb İnstitutunun ikinci
kursunda oxuyur..."
Əsrimizin ən
güclü dövlət və siyasi xadimlərindən biri -
Heydər Əliyevin Türkiyə jurnalisti İrfan
Ülküyə verdiyi müsahibəsindəki Moskva həyatından
bəzi məqamlar:
"....Həyat
yoldaşım məni başa düşən yüksəkmənəviyyatlı
bir adam idi. Onu çox sevirdim... Mənim həyatda ən
böyük, ən ağıllı arxam idi. 1985-ci ildə
Moskvada öldü... Onun vəfatından sonra infarkt
keçirib uzun müddət xəstəxanada yatdım. Zərifə
ölməmişdən bir az əvvəl uşaqları evləndirməkdə
çox təkid edirdi:
"Tez olsun bu
iş" deyirdi, sanki öləcəyini hiss etmişdi.
Oğlumuz İlhamı hələ 22 yaşı olanda evləndirdik.
Gəlinimizi də özü bəyəndi. Ölməmişdən
bir az əvvəl Bakıya gedib İlhamın indiki həyat
yoldaşını gördü, toyunu Moskvada etdik..."
Sonralar müxbirlərdən
birinin "Ərinizlə necə tanış olmusunuz?"
sualına Mehriban xanım cavab verir: "Respublika sarayında
(indiki Heydər Əliyev adına saray) bolqar müğənnisi
Lili İvanovanın qastrol konsertləri gedirdi. Həmin konsertdə
tanış olmuşuq..."
Alimlər və
ziyalılar ailəsində doğulub tərbiyə alan Mehriban
Arif qızı Paşayeva hələ uşaqlıqdan
kitablara, elmə olan marağı və fitri istedadı ilə
yaşıdlarından seçilir. 1982-ci ildə Bakıda 23
nömrəli orta məktəbi qızıl medalla bitirib, N.Nərimanov
adına Azərbaycan Dövlət Tibb İnstitutunun müalicə-profilaktika
fakültəsinə daxil olur.
Azərbaycan mətbuatının
parlaq siması, görkəmli jurnalist Nəsir İmanquliyevin
ailəsində dünyaya gəlib boya-başa çatan
anası - filologiya elmləri doktoru, professor Aida xanım
İmanquliyeva son dərəcə ağıllı, alicənab,
mehriban, səmimi, humanist bir xanım idi. Ərəb ədəbiyyatı
üzrə istedadlı mütəxəssis olan bu
bacarıqlı, əməksevər, gözəl və cazibədar
xanım ömrünün son illərində Azərbaycan Elmlər
Akademiyasının Şərqşünaslıq İnstitutuna
rəhbərlik edib. Mehriban xanımın sevimli atası Arif
Mir Cəlal oğlu Paşayev dünyaşöhrətli
alimdir. Beynəlxalq Nəqliyyat, Beynəlxalq Mühəndislik,
Beynəlxalq Ekoenergetika, Beynəlxalq Elmlər, Beynəlxalq
İnformasiya Akademiyalarının akademiki Arif Paşayev 300-ə
yaxın elmi əsərin, 15-dən artıq kitabın və
monoqrafiyanın müəllifidir. Alim 30-dan çox ixtiraya
görə müəlliflik şəhadətnaməsi
almış, çoxsaylı beynəlxalq mükafatlar, medallar
və diplomlarla təltif olunmuşdur. Arif müəllim
hazırda "Azərbaycan Hava Yolları" Dövlət
Konserni Milli Aviasiya Akademiyasının rektorudur.
Azərbaycan
xalqının ən munis və nəcib keyfiyyətlərindən
biri kimi uca tutulan ailəyə məhəbbət
duyğuları Paşayevlər ocağını da hər
zaman rövnəqləndirib. Ailəyə sevgi, ailə
üzvlərinə ehtiram münasibətləri daim yüksək
qiymətləndirilib. Bu nümunəvi ailə ənənələri
yazılmamış ən güclü qanunlar kimi nəsildən-nəslə
ötürülüb. Paşayevlər nəslinin
başçısı, Mehriban xanımın babası,
tanınmış yazıçı, ictimai xadim, professor Mir Cəlal
Paşayev deyərdi: "Zəmanəmdə tərəfimdən
xəlq olunmuş ən görkəmli əsər - mənim
ailəmdir". Genlərlə övladların ruhuna keçən
bu müqəddəs ənənə Mehriban xanımın qəlbində
də özünə yer tapır: "Ailə mənim
üçün hər şeydən əsasdır".
1982-ci ildə Zərifə
xanım Mehribanın valideynlərindən oğlu İlhamla
Mehribanın izdivacına razılıq alır. Gənclərə
xeyir-dua verilir. Adətə görə. şirniyyat süfrəsi
açılır. Masa arxasında iki ana, iki əzəmətli
qadın yeni qurulacaq ailə barədə şirin-şirin
söhbət edir. Zərifə xanım toyun vaxtını
uzatmamağı təklif edir. O, sanki ona ayrılmış
ömür payının şam kimi əriyib bitməkdə
olduğunu bütün duyğuları ilə hiss edir...
Sadə şəkildə,
cah-calalsız, təmtəraqsız, yalnız doğmaların
əhatəsində keçən toy mərasimi yeni, möhkəm
bir ailə ocağının təməlini qurur. Gəlin gəldiyi
gündən Mehriban xanım evdə, ailədə, qohumlar,
dostlar içində gülərüz bir mələk kimi
sevilir. İncə, ləyaqətli davranışı, mehriban
ünsiyyəti, xoş, səmimi kəlmələri, diqqətcilliyi,
ən müxtəlif mövzularla bağlı obyektiv fikirləri,
dərin kamalı ürəklərə xoş ovqat bəxş
edir. Burada məşhur atalar sözü yada düşür:
"Gəlin ocağa çəkər".
Açığını
deyim ki, qəbul olunmuş qaydaya görə, nitq mədəniyyətində
sözün hüquqi və mənəvi çəkisinə,
dərinliyinə yüksək qiymət vermək, təkrarçılığa
yol vermədən qısa, lakonik ifadələrlə
böyük fikirlər təcəssüm etdirmək hər
natiqə xas olan bacarıq deyil. Bu keyfiyyətlərin
hamısı Mehriban xanımda əksini tapıb. Fikir söyləyərkən
az kəlmələrlə böyük hədəflərə
toxunmaq, verilən suallara həm də diplomat çevikliyi ilə
hazırlıqlı şəkildə cavab vermək xanım Əliyevanın
Azərbaycan dilinin zəngin söz xəzinəsindən məharətlə,
həm də yerli-yerində istifadə etmək qabiliyyətini
də üzə çıxarır. Təbii ki, bu,
asanlıqla qazanılmır. Saysız-hesabsız mütaliələrə,
dünya mədəniyyəti və ədəbiyyatı ilə
mütəmadi tanış olub daim yenilikləri mənimsəməyə
söykənən bu bacarıq və istedad Mehriban
xanımın öz fədakar əməyi ilə
qazanılıb.
Ailə qurub Moskvaya
köçməyi ilə əlaqədar Mehriban xanım təhsilini
M.Seçenov adına 1-ci Moskva Tibb İnstitutunda davam etdirir.
1988-ci ildə həmin institutu fərqlənmə diplomu ilə
bitirir. 1988 - 92-ci illərdə Moskvada akademik Krasnovun rəhbərliyi
altında Göz Xəstəlikləri Elmi-Tədqiqat
İnstitutunda işləyir.
1985-ci ildə Əliyevlərin
nəvəsi -füsunkar Leyla dünyaya gəlir. Baba və nənələr
bu qaraqaş-qaragöz qızcığazı çox sevirlər.
Körpəyə ulu nənəsi, Zərifə xanımın
anası, İrəvan xanlarının nəslindən olan
Leyla xanımın adı verilir. Balaca Leyla böyüyəndən
sonra babasına gözəl şeirlər ithaf edir.
1987-ci ilin oktyabrında
SSRİ rəhbərliyində olan Heydər Əliyev müsəlman-türk
dünyasına qənim kəsilən Qorbaçovla işləməkdən
imtina etməyə məcbur olur. Həmin vaxtdan ailənin
çətin dövrü başlayır.
Mehriban Əliyeva:
"1987-ci ildən sonrakı dövr həqiqətən də
bizim ailəmiz üçün ən ağır dövr idi.
İlham özünü itirmədi və ailəsi ilə
uşaqlarının çətinlikləri hiss etməmələri
naminə əlindən gələni əsirgəmədi. O
zamanlar kifayət qədər böyük problemlərimiz var
idi və bizə demək olar ki, heç kim kömək
etmirdi. Yalnız onun sayəsində biz əziyyət çəkmədikg"
- Çox ağır
idi? - deyə bir neçə il əvvəl "Günay"
qəzetinin müxbiri İlham Əliyevdən soruşur.
- Ağır idi! - deyə
İlham Heydər oğlu tam səmimiyyətlə cavab verir. Mən
nəzarət altında yaşayırdım və nə
zamansa Bakıya qayıdacağımı təsəvvürümə
belə gətirə bilməzdim. Beləliklə, mən
bizneslə məşğul olmağa başladım
Amma hər şeyə rəğmən
o, yenə də Moskvanı tərk etməli olur. Lakin haraya?
"Azərbaycana qayıtmaq mümkün deyildi.
Çünki Bakıdan hədə-qorxu nidaları
eşidilirdi. O zaman mən Türkiyəyə yollandım. Məhz
oradan da Moskvadakı şirkətlərimə rəhbərlik
etməyə başladım..."
Tanrı öz
hökmünü illərə diktə edir. İlham Heydər
oğlu Əliyev Azərbaycanda prezident zirvəsinə
ucalır. Lakin zirvəyə aparan yollar
"sıldırımlı aşırımlar"dan
asanmı keçir?
Müstəqilliyinə
yenicə qovuşmuş, müharibə və keçid
dövrünün dəhşətləri, siyasi
burulğanlarla çarpışan xalqımızın
iqtisadiyyatı kimi, mədəniyyəti də təhlükə
qarşısında idi. Bu tənəzzül
insanlarımızın əsrlər boyu formalaşmış
milli dəyərlərinin məhvinə doğru gedirdi. Adamlar
mədəniyyət haqqında düşünmək
iqtidarında deyildilər. Ölkə səfalət içində
idi. Belə hallarda cəmiyyətin dadına çatan, xalqa
doğru yol göstərən mədəniyyətin özünün
də yardıma ehtiyacı vardı. Belə bir zamanda Mehriban
xanım "Azərbaycan mədəniyyətinin
dostları" Fondunu yaratdı. Nəsillərin miras
qoyduğu mədəni sərvəti qorumaq, yaşadıb və
inkişaf etdirmək, xalqların bir-birindən öyrənmək
ənənəsinə sadiq qalaraq onu zənginləşdirmək,
dünyanı, cəmiyyəti gözəlləşdirmək
kimi nəcib və ali məqsədlərə xidmət
göstərən fond və onun rəhbəri bu istiqamətdə
xeyli iş həyata keçirdi. "Azərbaycan- İRS"
jurnalı da o dövrdə təsis olundu. Jurnal bir neçə
dildə yayımlanaraq Azərbaycan mədəniyyətini,
irsimizi bütün dünyaya pərvazlandırdı.
2004-cü ildə
xalqına xidmət etmək üçün Mehriban
xanımın qarşısında yeni bir yol
açıldı: Heydər Əliyev Fondu yaradıldı.
Qayınatası - bəşəriyyətin böyük şəxsiyyəti
olan Heydər Əlirza oğlu Əliyevi doğma ata kimi sevən
Mehriban xanım fondun prezidenti olaraq Heydər Əliyev irsini
qoruyub-saxlamaqla yanaşı, öhdəsinə
ağlasığmaz işlər götürdü. Minlərlə
dağılmış məktəbin, tarixi memarlıq abidələrinin
təmiri, yeni məktəb binalarının, sağlamlıq
komplekslərinin tikintisi, xəstəxanaların, digər səhiyyə
ocaqlarının yenidən qurulması, ehtiyacı olan xəstələrin
ölkəmizdə və xaricdə müalicəsi, kimsəsiz
uşaqlara qayğı, diabet, talassemiya və digər xəstəliklərə
qarşı mübarizə, başqa saysız-hesabsız
problemlərin həlli. Nəhayət, çox çəkmir
ki, Mehriban xanımın ölkəmizdəki sülhsevər,
humanist məramları dünyanın nüfuzlu beynəlxalq təşkilatlarından
biri olan YUNESKO-nun diqqətini cəlb edir. Xanım Əliyeva bu
təşkilatın xoşməramlı səfiri təyin
edilir.
Eramızdan əvvəl
yaşamış Çin mütəfəkkiri Konfutsidən
soruşurlar ki, dünyada elə bir söz varmı ki,
bütün ömrün boyu onu özünə rəhbər
tuta biləsən? Konfutsi deyir: "Var, bu söz - mərhəmətdir".
Azərbaycan yazıçısı Məhəmməd
Tağı Sidqi əbəs yerə söyləməmişdir
ki, insan cəmiyyətdə yalnız hər kəsə
yaxşılıq etmək, abadlıq işləri görmək,
xalqla yaxşı rəftar etməklə yüksəlir.
Xanım Əliyeva hər kəsə yaxşılıq etməklə,
xalqla yaxşı rəftar etməklə bərabər,
genişmiqyaslı abadlıq işləri,
yaşıllaşdırma missiyası həyata keçirdi.
"Hərəmiz bir ağac əkək" amalını
qarşıya vacib bir məqsəd qoyub vətənimizi
gülüstana çevirmək yolunda milyonlarla ağac əkdirmək
işinə rəhbərlik etdi.
Bir gün yenə bir
aqildən soruşurlar ki, dəniz niyə böyükdür?
Cavab verir: "Çünki ən kiçicik çayı
belə özündən rədd etmir".
Mehriban xanımın
böyüklüyü həm də ondadır ki, o, ən
ucqar kəndimizdə belə yaşayan valideynsiz, kimsəsiz, əqli
və fiziki cəhətdən qüsurlu olan
balalarımızın, vətəndaşlarımızın,
dostlarımızın heç birini özündən
uzaqlaşdırmır. Əksinə, daha da özünə
yaxınlaşdırır, doğmalaşdırır, Azərbaycan
adlı məmləkətimizin mərhəmətli
qol-qanadlarını onların üzünə açır.
Elə bu səmimiyyətinə və alicənablığına
görə Mehriban xanım bu gün xalqımız
üçün sevimli el qızı, əziz bacı,
etibarlı dost, mərhəmətli xeyriyyəçi, Azərbaycan
həqiqətlərini yüksək tribunalardan dünyaya yayan
fəal ictimai xadim, qədim və müasir mədəniyyətimizin
dəyərli təəssübkeşi, zəhmətkeş
millət vəkili, həyatın ağır sınaqlarına
tuş gəlib həbsxanalara düşən, lakin etdiyi əməldən
peşman olub həqiqət yoluna qayıtmağa hazır olan
on minlərlə vətəndaşı doğmalarına
qaytaran ən ədalətli hakimdir. YUNESKO-nun sabiq baş
direktoru K.Masuura isə Mehriban xanımın xidmətlərini
qiymətəgəlməz hesab edib etiraf edir: "O, nəinki
Azərbaycanda, nəinki regionda, mən deyərdim ki, qlobal miqyasda
uğurlu şəkildə fəaliyyət göstərir".
Qlobal miqyasda uğurlu şəkildə fəaliyyət
göstərməyin heç də asan
olmadığını nəzərə alsaq, Mehriban
xanımın istəkli bacısı, əziz rəfiqəsi,
tanınmış alim, filologiya elmləri doktoru, professor Nərgiz
xanım Paşayevanın dediyi kimi, o, heç zaman çətinliklərə
təslim olmur.
XX əsr Azərbaycan ədəbiyyatının
tanınmış nümayəndəsi Mir Cəlal Paşayev
"Vətən yaraları" adlı əsərində
"Çahargah" muğamının qələbəyə
necə inam yaratmasından, vətənpərvərlik hisslərini
alovlandırmasından və qəhrəmanlığa
çağırış kimi səslənməsindən bəhs
edərək döyüşən əsgərin dili ilə
deyirdi: "... Bir "Çahargah" başla... İnan ki,
üstümə yüz topdan güllə yağsa da, mən
burada o "Çahargah"ın səsini eşidəcəyəm!.."
Əlbəttə, eyni
fikirləri digər muğamlarımız haqqında da
söyləmək mümkündür. Nadir sənət
nümunələri olan muğamlarımızın hər
birində xalqımızın fitri istedadı, tarixlər boyu
qoruyub inkişaf etdirdiyi milli mənliyi, ali musiqi təfəkkürü,
qüruru, şücaəti, düşmənlərə
qarşı apardığı qəhrəmanıq mübarizəsi
əks olunmuşdur ki, bu ilahi güc hər xalqa mənsub deyil
və dünya bu əzəmətli gücdən heyrətlənməkdə
haqlıdır.
Mehriban xanımın
sözləridir ki, muğam sənəti, muğam
bütün dövrlərdə məmləkətimizdə
yaşayıb, səslənib, duyulub və sevilib... Muğam mədəniyyətinin
yaşamasında nəsildən-nəslə, ustaddan-tələbəyə,
müəllimdən-şagirdə, ağsaqqaldan-gəncə
çatdırılan sənətkarlıq,
ifaçılıq sirləri əvəzsizdir. Bu sirləri
öyrənmək üçün canlı təmas, canlı
ünsiyyət lazımdır. Məhz bu canlı ənənə
əsrlər boyu bizim məşhur xanəndələrimiz və
ustadlarımız tərəfindən qorunub-saxlanılıb və
yaşadılıb...
Yeri gəlmişkən,
sevindirici hal kimi qeyd etmək istərdim ki, bu günlərdə
Kanadada 26 avqust tarixinin Beynəlxalq Azərbaycan Muğam
günü elan olunması Mehriban xanımın doğum
gününə ən gözəl töhfələrdən
biridir.
Çox keçmir ki,
Mehriban Əliyevanın məhsuldar əməyi 50-dən
artıq müsəlman dövlətinin təmsil olunduğu
beynəlxalq mədəni-humanitar qurum olan İslam Ölkələri
Elm, Təhsil və Mədəniyyət Təşkilatı -
İSESKO-nun şərəfli məramlarına da öz
yüksək töhfəsini bəxş etdiyi
üçün xanım bu mötəbər təşkilatın
xoşməramlı səfiri təyin olunur. Birinci xanım
İSESKO ölkələri ilə Azərbaycanın hərtərəfli
əlaqələrinin genişlənməsinə böyük
səylə xidmət göstərir. Bu dövlətlərdə
xanım Əliyevanı yaxşı tanıyır və
hörmət edirlər. Xanıma olan ehtiramın rəmzlərindən
biridir ki, Misirin Qalubiyyə vilayətində yeni
açılan zəngin məktəbə Mehriban Əliyevanın
adı verilmişdir.
Mehriban xanım Əliyeva
Azərbaycan Gimnastika Federasiyasının prezidenti kimi də bu
vəzifədə özünü gözəl təşkilatçı
kimi nümayiş etdirmiş, ölkə idmanının mənafeyi
və inkişafı naminə bacarığını əsirgəməmişdir.
Mehriban xanımın
gördüyü çoxsaylı işlər bir daha sübut
edir ki, o, vətənimizi ürəkdən sevir. Onun hər
bir bölgəsi, burada yaşayan xalqların özünəməxsus
adət-ənənələri, milli xüsusiyyətləri,
yurdumuzun ərazisində zaman-zaman mövcud olmuş dövlət
və sivilizasiyalar onu daim maraqlandırır. Odlar yurdumuzun qədim
keçmişinə, müasir mədəniyyətinə
böyük hörmətlə yanaşan ölkəmizin
birinci xanımı fondun zəhməti hesabına başa gələn
"Azərbaycan" nəşrinin təqdimat mərasimindəki
çıxışında bunu bir daha təsdiq edir: "Azərbaycanın
ərazisində əsrlər boyu çox qüdrətli
dövlət və sivilizasiyalar mövcud olub. Böyük
İpək Yolu bizim ölkəmizdən keçib və əlbəttə,
bütün bu mədəniyyətlər, bütün bu
sivilizasiyalar ölkəmizdə izini qoyub. Bu izlərlə, bu
naxışlarla istər memarlıq abidələrində, istər
tarixi və dini abidələrdə tanış olmaq
mümkündür. Eyni zamanda son illər Azərbaycanın
dünyada misli olmayan inkişafını, onun yeni mənzərələrini,
modern binaları, idman və konsert saraylarını, iş və
turizm mərkəzlərini, bir sözlə, ölkəmizin
müasir simasını da bu kitabda tapmaq
mümkündürg"
Onu da qeyd etmək istəyirəm
ki, elm yolunda da töhfələrini əsirgəməyən
Mehriban xanım mükəmməl araşdırmalara əsasən
dövrümüzün ən aktual məsələlərindən
biri - evtanaziya problemlərinə dair dissertasiya müdafiə
etmiş və fəlsəfə elmləri namizədi adına
layiq görülmüşdür.
Diplomatik protokolda
göstərildiyi kimi, Azərbaycan prezidentinin yanında -
birinci ledinin iştirakı labüddür.
"İzvestiya" qəzetinin müxbiri Oleq Sıqanovun Azərbaycanın
birinci xanımı ilə müsahibəsindən bəzi məqamları
təqdim edirəm:
- Səfərlər
zamanı protokola riayət etmək sizin üçün
çətinlik yaradırmı?
- Bildiyiniz kimi,
maraqlı insanlarla görüşlər bütün bu
uçuşları, reqlamenti kompensasiya edir. Bir qayda olaraq
prezidentləri görkəmli şəxsiyyətlər əhatə
edir. Onlar ölkənin maraqlı tərəflərini
nümayiş etdirirlər. Mən belə hesab edirəm ki, səfərə
çıxmağın özü də, insanlar və digər
xalqların mədəniyyəti ilə
tanışlığın özü də böyük
xoşbəxtlikdir.
- Prezident həyat
yoldaşı ilə birlikdə səfər edir və
prezidenti danışıqlar, görüşlər, siyasi tədbirlər
gözləyir. Bəs prezidentin həyat yoldaşının
necə, xüsusi proqramı olurmu?
- Bəli, elədir ki
var. Yalnız görüş mərasimini və digər
xüsusi təntənəli məqamları istisna etməklə
prezidentin xanımının ayrıca proqramı olur. Birinci
şəxsiyyətlərin xanımlarına ən maraqlı məqamları
göstərməyə çalışırlar. Bu,
paytaxtlarla tanışlıq üçün ən gözəl
imkandır. Hər şeyi görmək və dünyanın ən
əlamətdar və maraqlı yerlərinə tamaşa etmək
bir də Allah bilir nə zaman qismət olacaq? Fiziki baxımdan
bu çox dözülməzdir, uçuşlar yorucudur və
dəqiqəsinə kimi reqlamentə tabedir. Nə etmək
olar? Dözürük. Çünki hər zaman lazımi
qaydada olmalı və ölkəmizi ləyaqətlə təmsil
etməliyik...
2006-cı ilin 30 aprel
tarixində Əliyevlər və Ağalarovların həyatında
ən əziz və ən unudulmaz bir gün yaşanır.
Möhtəşəm "Gülüstan" sarayında iki
sevən gəncin xoşbəxtliyi naminə aramsız
xeyir-dualar səslənən toy büsatı qurulur. Ağ gəlinlik
paltarında daha füsunkar və ecazkar görünən gəlin
- Heydər Əliyev Fondunun Moskvada fəaliyyət göstərən
nümayəndəliyinin rəhbəri, Moskva Dövlət Beynəlxalq
Münasibətlər İnstitutunun tələbəsi və
bu dünyaşöhrətli ali məktəbdə fəaliyyət
göstərən Azərbaycan klubunun başçısı
sevimli Leyladır. Həmin Leyla ki, SSRİ xalq artisti, Rusiya
Dövlət Dumasının Mədəniyyət Komitəsinin
sədri İosif Kobzon Heydər Əliyevin adını
daşıyan fond haqqında filmə tamaşa edərkən və
onun gözəl nəvəsi Leyla xanımın fond
haqqında söylədiyi kəlmələri dinləyərkən
bəzi nazirlərin təcrübə yığmaq
üçün Heydər Əliyev Fonduna göndərilməsinin
vacibliyi barəsində düşünür...
Bəy - "Krokus"
şirkətinin maliyyə direktoru, Rusiyanın iri
sahibkarlarından biri Araz Ağalarovun oğlu, tanınmış
şəxsiyyət - Emin Ağalarovdur. Həmin Emin ki, onu
haqlı olaraq gənc nəslin ən istedadlı biznesmenlərindən
biri hesab edirlər. Mətbuat onu "Ticarət
imperiyasının varisi" adlandırır. O, bütün
bunlarla yanaşı, istedadlı müsiqiçi və məşhur
ifaçıdır. Həmin ifaçı ki, istər xarici,
istərsə də Moskva və Bakı səhnələrində
nümunəvi parlaq çıxışları ilə
milyonların sevimlisinə çevrilmişdir.
Sənət
ulduzlarının iştirak etdiyi toy mərasimi sona yetməkdədir.
Adətə görə, valideynlər bəylə gəlini
cütlük üçün ayrılmış avtomobilə
qədər "Vağzalı" müsiqisinin sədaları
altında yola salırlar. Ertəsi günün səhəri
toy karvanı hava limanına yollanır. Hava limanında yeni ailə
qurmuş, bir-birinə son dərəcə yaraşan bu
mehriban, gülərüz gəncləri "Boinq" tipli təyyarə
gözləyir və o, tezliklə istiqamətini Moskvaya - bəyin
ata ocağına doğru yönəldir.
Deyirlər, gedənin
ardınca su atmaq yolu aydınlığa aparan el adətidir.
Mehriban xanımın yanaqlarından axan büllur göz
yaşları da ciyərparası Leylanı ər evinə yola
salarkən ən yaxşı xeyir-dua olur. Bu xeyir-dua, müqəddəs
ana nəfəsi hələ qarşıda daha iki övladı
- Arzunu və Heydəri səadətə qovuşduracaq,
onların taleyinə, həyat yollarına nur çiləyəcək.
Artıq Əliyevlərin
və Ağalarovların ailə dünyasına bir cüt yeni
Tanrı payı qədəm qoyub: Əli və Mikayıl. Bu
gözəl balaların - əkiz qardaşların qədəmləri
mübarək olsun, xoşbəxt böyüyüb gələcəyimizin
layiqli övladları, xalqımızın fəxri olsunlar!
Hələ gənc ikən
nənəlik səadətinə qovuşan Mehriban xanım
bircə gün bu şirin-şəkər balaların səsini,
yenicə dil açan dadlı kəlmələrini eşitməsə,
rahatlıq tapmır. Bəli, ona rahatlıq verməyən bir
də hələ həyata keçməmiş
çoxsaylı layihələr, tədbirlər,
görüşlər, səfərlər, xalqımızı
və dövlətimizi sabahkı uğurlara, nailiyyətlərə,
qələbələrə aparan zəhmət və fədakarlıq
dolu yollardır...
Reyhan Mirzəzadə
Həftə içi.- 2010.- 24 avqust.- S. 3.