"Mən vətənimi sevirəm"

Şəhidlərimiz Mübariz İbrahimov və Fərid Əhmədov anılıb

"Müasir İnkişaf" İctimai Birliyi, Bakı şəhər Gənclər və İdman baş idarəsi və Azərbaycan Memarlıq və İnşaat Universitetinin birgə təşkil etdiyi "Mən vətənimi sevirəm" adlı iki hissədən ibarət tədbir keçirilib. Azərbaycanın Milli Qəhrəmanı Mübariz İbrahimovun xatirəsinə həsr olunan tədbirdə çıxış edən Bakı şəhər Gənclər və İdman baş idarəsinin rəisi Raqif Abbasov torpaq, vətən uğrunda şəhid olan və hər bir azərbaycanlıya nümunə olan Milli Qəhrəmanımız Mübariz İbrahimovun və Fərid Əhmədovun əziz xatirələrinin yad edilməsindən məmnunluq hissi duyduğunu bildirib. O qeyd edib ki, Azərbaycan gəncliyi əhalinin əksəriyyətini təşkil edir: "Gənclərimiz ali təhsil ocaqlarında, müxtəlif dövlət və qeyri-hökumət təşkilatlarında, ölkəmizin hüdudlarından kənarda azərbaycançılığı təbliğ edir, dövlətimizi dünyada tanıtmağa çalışırlar. Dövlətimiz tolerantlığı, dözümlülüyü, azərbaycançılıq ideyasının təbliği ilə yanaşı, iqtisadi və digər sahələrdə əldə etdiyi nailiyyətləri ilə tanınır. Bütün görülən işlər yalnız gələcək nəsillərin firəvan yaşamasına, ölkəmizin daha da güclənməsinə yönəlib".

Raqif Abbasov deyib ki, Xocalı, Ağdam, Şuşa, Laçın və digər işğal altında olan torpaqlarımız azad edilənə qədər mübarizə aparmalıyıq. Yalnız belə olan halda biz öz torpaqlarımıza qayıda biləcəyik. Azərbaycan gəncliyinin böyük qüvvə olduğunu vurğulayan natiq onu da qeyd edib ki, Azərbaycan bayrağı daim Qarabağda dalğalanmalı və bunun üçün də gənclərimiz əllərindən gələni etməlidirlər. Hamımızın vətəndaş olaraq borcumuzdur ki, şəhidlərimizi yad edək.

"Müasir İnkişaf" İctimai Birliyinin sədri Mübariz Aşırlı bu kimi tədbirlərin keçrilməsinin vacib olduğunu vurğulayıb. M.Aşırlı onu da qeyd edib ki, biz çalışmalıyıq ki, hünərli oğul və qızlarımızın göstərdikləri qəhrəmanlıqlar unudulmasın: "Ümumiyyətlə, Azərbaycan Respublikası vətəndaşlarının vətənpərvər ruhda böyüməsinə, onların birmənalı şəkildə vətənpərvər olaraq yetişməsinə çalışmalıyıq".

Azərbaycan Memarlıq və İnşaat Universitetinin Tələbə Gənclər Təşkilatının sədri Səadət İmanova bildirib ki, tədbirin keçrilməsində əsas məqsəd gənclərdə vətənpərvərlik ruhunun yüksəldilməsinə xidmət etməkdir: "Belə tədbirlərimiz mümkün qədər çox olmalıdır. Vətən hamınındır və hər kəs vətənini sevməlidir".

Sonda tədbirin bədii hissəsi başlayıb. Vətənpərvər mahnıların mahir ifaçısı Şəmistan Əlizamanlı, əməkdar artist Nuriyyə Hüseynova, "Savalan" qrupunun solisti Novruz Novruzlu, şair Xəyal Rza və sairə sənətçilər vətənpərvər ruhda musiqi nömrələrini səsləndiriblər.

Pərvin İsmayılova

Həftə içi.- 2010.- 17 dekabr.- S. 7.