Vaxtsızotu

SAGLAM OLUN!

Vaxtsızotu - müalicəvi bitkidir. Zəhərlənmək qorxusu olduğu üçün həkimlə məsləhətləşmədən onu qəbul etmək olmaz. Məhəmməd Möminə görə vaxtsızotunun soğanağı 7 il öz müalicəvi təsirini saxlayır. Onlar bəlğəmgətirici keyfiyyətə malikdir, irini çəkir, sarılığa və dalaq xəstəliyinə xeyirlidir. Vaxtsızotu soğanağının əzvayla kompresi işias (oturaq sinirinin iltihabı) xəstəliyində sınaqdan keçirilib. Vaxtsızotu şirəsi və ya həlimi revmatizmə çox xeyirlidir. Vaxtsızotunun həlimindən zəfəran və çiy yumurtadan edilmiş kompres sümük travmalarında xeyirlidir və şişləri sovurur. Vaxtsızotu həlimindən və qoyunun köhnə piyindən tampon babisil xəstəliyində sınaqdan çıxıb. Vaxtsızotu köklərindən hazırlanan toz xoranı qurudur. "Töhfətül-möminin" (1669 il) əsərinə əsasən, vaxtsızotunu daxilə qəbul etdikdə mədəyə, ciyərə zərərdir və qıcolma yaradır". İbn Sina yazır ki, vaxtsızotu mədəni zəiflədir. Xaricdən istifadə olunduqda köhnə (xroniki) xoralara, yel (podaqra), əzələlərdə ağrı kimi xəstəliklərdə xeyirlidir. Zəhərlidir. "Tibbnamə"də vaxtsızotu "səvrincan" kimi adlanır, revmatizmə qarşı və yarasağaldan vasitə kimi yad edilir. Bu əsərə əsasən: "Vaxtsızotu həlimi üz sinirinin iflicində, ümumi iflicdə, əsəb xəstəliklərində xeyirlidir. Əgər vaxtsızotu şirəsinin kompresini ağrıyan ayaqlara qoysan, ağrı dəf olar. Sınaqdan keçib".

Həftə içi.- 2010.- 23-25 oktyabr.- S. 8.