Beynəlxalq ictimaiyyət Azərbaycanın tərəfindədir

"Dağlıq Qarabağ münaqişəsi ilə bağlı beynəlxalq ictimai rəy Azərbaycanın tərəfindədir" - bu fikirləri Rusiya Dövlət Dumasının MDB işləri üzrə komitə sədri Aleksey Ostrovski səsləndirib. Onun sözlərinə görə, bütün dünya, o cümlədən Rusiya Federasiyası da Azərbaycanın ərazi bütövlüyünü dəstəkləyir. Ostrovski onu da bildirib ki, beynəlxalq ictimaiyyət bu ölkənin yurisdiksiyasına daxil olan rayonların işğal olunması faktını qəbul edir". Komitə sədri deyib ki, tez-tez Bakı və İrəvanda orur: "Hər iki ölkədə Rusiyanın bu münaqişəni həll etməli olduğu sözlərini eşidirəm. Lakin Rusiya bu münaqişəni təkbaşına həll edə bilməz. Yol xəritəsi var, prezident Dmitri Medvedyev Azərbaycan və Ermənistan prezidentləri ilə görüşür. Bu problemin həlli qarşısında əsas maneə Ermənistan və Azərbaycan cəmiyyətinin əhvali-ruhiyyəsidir..."

"...Dağlıq Qarabağ məsələsi artıq Azərbaycan - Ermənistan münasibətlərinin çərçivəsindən kənara çıxıb, lakin hər iki tərəf siyasi iradə nümayiş etdirməyənə qədər münaqişə həll olunmamış qalacaq". Onun sözlərinə görə, Ermənistan - Azərbaycan münaqişəsinin həllində maraqlı olan Rusiyadan başqa heç kim Dağlıq Qarabağ problemini nizamlamağa cəhd göstərmir, belə ki, hər iki tərəf Moskvanın strateji tərəfdaşlarıdır. İrəvan və Bakı özləri bunu istəmədikcə Rusiya bu münaqişəni həll edə bilməz. "Rusiya aktiv şəkildə münaqişə tərəflərini barışdırmağa çalışır. Rusiya rəhbəri Bakı və İrəvanı barışdırmağa səy göstərir və bunu Azərbaycan və Ermənistan prezidentlərinin Rusiya tərəfinin təşəbbüsü ilə keçirilən görüşləri sübut edir. Aleksey Ostrovski ATƏT-in Minsk Qrupunun formatının dəyişdirilməsinə lüzum görmədiyini bildirib: "Fikrimcə, bu, qəbul oluna biləcək formatdır". Ostrovski təəssüflə qeyd edib ki, problemin nizamlanması üçün maneə iki ölkənin ictimaiyyətidir. "Ermənistan daxilindəki nüfuzlu qüvvələr heç vaxt işğal olunmuş ərazilərin və Dağlıq Qarabağın qaytarılmasına razı olmayacaqlar. Öz növbəsində, Bakı da heç vaxt güzəştə getməyəcək". Komitə sədri Dövlət Dumasının deputatı, MDB və soydaşların işi üzrə komitənin sədr müavini Konstantin Zatulinin Azərbaycan əleyhinə səsləndirdiyi fikirlərə də münasibət bildirib: "O mənim iradəmdən asılı olmayaraq komitədə müavinimdir. Zatulin maraqlı tərəf olduğunu kifayət qədər açıq-aşkar göstərir". Komitə sədri vurğulayıb ki, Dövlət Dumasında kvota prinsipi var və Zatulin bu vəzifəni onun istəyindən asılı olmayaraq tutub: "Mən ondan fərqli olaraq onun sözlərinə qiymət verməyəcəyəm. Azərbaycan tərəfinə Zatulinin mövqeyi xoş deyilsə, qoy "Vahid Rusiya" partiyasına müraciət edərək soruşsunlar: nə üçün partiyanızda münaqişəli vəziyyətdə konkret olaraq kiminsə tərəfini saxlayan insan oturur".

Azad

Həftə içi.- 2010.- 24 sentyabr.- S. 1, 3.