"Hər şeir yazana şair deməzlər"
Qələndər
Xaçınçaylı: "Ədəbiyyatda adamın
adamı olmalı deyil..."
"Arxamda dağlar dayanıb.
Onlar qoymazlar
Məni yıxılmağa..."
Bu
misraların selinə bürünüb, 1980-ci ildən Azərbaycan
mətbuatında çalışan, Azərbaycan
Yazıçılar və Jurnalistlər Birliyinin üzvü,
8 kitab müəllifi olan şair Qələndər
Xaçınçaylı ilə ad günü ərəfəsində
görüşdük. 15 apreldə qəlbi yurd
yanğısı ilə alışıb-yanan bu şairin
doğum günüdür. Amma söhbətə şairlikdən
danışmaqla başladıq:
- Şairlik Allah vergisidir. O, ilk
öncə sənin içində, qanında, ruhunda
olmalıdır. Bu da hər adama qismət olmayan ilahi bir
sevgidir. Sanki, ananın bətnində şair doğulursan. Əgər
bunlar yoxdursa, şairlikdən söhbət açıb,
danışmağına dəyməz. Yadımdadır, o
vaxtlar 2-ci sinifdə oxuyarkən, içimdə məni
çox şey narahat edirdi. Çox vaxt gecələr yuxum da ərşə
çəkilirdi. Elə bil məni dünyaya gətirən
Tanrısına qovuşdururdu. Nə bilim, bəlkə də o
Tanrının bir sevimli körpəsinə
çevrilmişdim. Elə o illərdən bəri,
insanları müqayisə etməyə başladım.
Kimisinin özünü göylə apardığını,
kimisinin də özünü sadə apardığını
görürdüm. Fikirləşirdim ki, hamı insandır.
İnsandan yüksək məxluq yoxdur. Həm də, hər
şeyin önündə sadəlik durur. Elə bu məqsədlə
də, ilk şeirim olan "Sadəlik"i yazdım. Elə o
vaxtdan qələm mənim üçün silah rolunu
oynadı. Yeri gəlmişkən qeyd edim ki, ədəbiyyat
çox çətin və şərəfli bir sənətdir.
O sənətin ağrılarına hər adam dözə
bilmir, onun yükünü hər adam çəkə bilmir.
Çünki, bu ruhla bədən arasında bir vəhdət
təşkil edir. Gərək o mənəviyyatı, o
varlığı görə biləsən. O ilahi
saflığı içə-içə, durula-durula təmizlənə
biləsən. Necə ki dağların təkindən
süzülüb axan bulaqlar kimi... Məhz buna görə də,
bu gün hər şeir yazan adamın özünü şair
adlandırması düzgün deyil. Bir sözlə, hər
şeir yazana şair deməzlər. Bundan başqa, hər
hansı bir şeir, qafiyə xətrinə sifariş ilə
yazılmalı deyil. Çünki şairin yazdığı
şeiri onun düşdüyü mühit, zaman yazmağa
vadar edir. Bir sözlə, şeir insanı özü
axtarıb tapır...
- Bir şair olaraq özünüz
haqqında nə düşünürsünüz?
-
Düzünü desəm, bu günə qədər
özüm haqqında heç vaxt düşünməmişəm
və heç bu gün də düşünmürəm. Bəlkə
də, bu mənim sadəlövhlüyümdən və həyata
təbii baxışımdan irəli gəlir. Bu gün təbliğatımın
zəif olmasının səbəbini də özümü
bu günə qədər şair kimi düşünməməyimdə
görürəm. Amma gərək biz özümüz
haqqında hər zaman düşünək. Mənim fikrimcə,
ilk növbədə şair cəmiyyətin gözündə
olmalı və insanların ürəyində sevilməlidir. Əgər
şairin oxucusu yoxdursa, mən belələrini şair hesab
etmirəm...
- Bu gün sizi yazmağa nə vadar
edir?
- Cəmiyyətimizdə
olan haqsızlıq və bərabərsizlikləri,
torpaqlarımızın bir hissəsinin gavur düşmən
tapdağı altında olmasını görmək və s.
bu kimi problemlər məni əsasən tənqidi mövzularda
çıxış etməyə məcbur edir...
- Yazmaq sizə çətin gəlmir
ki?
- Xeyr.
Çünki, insan yazmamışdan qabaq nə
yazacağını yaxşı-yaxşı düşünməlidir
və daha sonra yazmalıdır. Məhz belə olan halda, yazmaq
insana heç vaxt çətin gəlmir... Şairin şeiri
yaşıl bir yarpağa bənzəməli və hər
zaman yaşıl qalmalıdır...
- 1958-ci ildə dünyaya göz
açan Qələndər Xaçınçaylı
müasir oxucunun nəbzini tuta bilibmi?
-
Böyük qurumlar, vəzifəli şəxslər məni
bir o qədər tanımasa da, xalqım yetərincə
tanıyır. Əgər mən müasir oxucunun nəbzini
tutmasaydım, yəqin ki, mərasimlərdə, el şənliklərində
misralarıma tez-tez rast gəlmək də olmazdı.
Şairin hər bir şeiri müasirdir, yenidir, təzədir.
Bir sözlə şair, köhnəliklə yenilik arasında
bir körpü, vəhdət təşkil etməlidir. Onun
poeziyasında keçmişdən baxanda, gələcək
necə görünürsə, gələcəkdən boylanıb
arxaya baxanda da keçmiş o cürə görünməlidir...
- Bəzən elə hisslər olur
ki, o hisslərin qarşısında insanın sözü
tükənir. Yəqin belə günlər sizdən də
yan keçməyib...
- Söz
sonsuz bir kainata bənzəyir. Məncə, kainatın sonu
olmadığı üçün sözün də sonu yoxdur.
Məhz buna görə də, söz heç vaxt tükənmir.
Və heç vaxt da tükənməyəcək. Mühitindən,
zamanından asılı olmayaraq, şair hər zaman öz
sözünü deyib və deyəcək. Şairin
sözü sınmamalıdır. Sözünün
sınmasındansa, özünün sınması daha
yaxşıdır! Buna görə də şairlər dəryaz
kimi döyülüb itilənməlidir ki, yazdıqları da
kəsərli olsun.
- Qələndər müəllimi
yazdığı şeirlərin yaşama müddəti,
onların zamanın sınağından necə
çıxacağı narahat edirmi?
-
İnsan hər zaman narahat olmağı bacarmalıdır. Bu
yerdə Türk dünyasının unudulmaz və
böyük şairi B.Vahabzadənin bir sözünü
xatırlamaq yerinə düşərdi. O, həmişə
bizə üzünü tutub deyərdi ki, hər şeydən
razıyam, amma özümdən narazı. Elə məhz buna
görə də mənim şeirimin yaşama müddəti,
zamanın sınağından, ələnən xəlbirindən
necə keçəcəyi kimi məsələlər
oxucularımdan daha çox asılıdır...
- Nobel mükafatı laureatı, məşhur
yazıçı Qabriel Qarsia Markes deyərdi: "Bu gün hər
hansı bir şeirin böyük tirajla nəşri və
yaxud müxtəlif dillərə tərcüməsi hələ
əsas şərt deyil. Başlıcası odur ki, kitab bir nəsildən
digər nəslə keçə bilsin". O, bunu ədəbiyyatda
qalmaq ilə əlaqələndirirdi. Bu fikri
bölüşürsünüzmü?
-
Böyük tarixi şəxsiyyətin fikri də
böyükdür, dərin və məzmunludur. Bu baxımdan
yanaşsaq, bir az öncə qeyd etdiyim kimi, əgər
söhbət həqiqətən də ədəbiyyatdan gedirsə,
hər yazının özü bir tarixdir. Ədəbiyyat
insanın ifadə vasitəsi olmalı deyil. Ədəbiyyat
bütün dünya xalqlarınındır. Şairin vətəni
yoxdur, onun vətənində sərhəd, tikanlı məftillər
olmamalıdır. O yalnız və yalnız xalqının
sözünü deməlidir. Bir sözlə, şair, öz
fikrini deyil, öz prizmasından çıxıb dünyəviliyi
ifadə etməyi bacarmaldır. Dini, səmavi kitablar insanlara
xidmət elədiyi kimi, şairlərin də əsərləri
bu qəbildən olmalıdır. Ədəbiyyat həm də
insanı mənən saflaşdırır. Millətinə,
xalqına qarşı sevgi yaradır. Ədəbiyyatda
adamın adamı olmalı deyil..!
- Bu günə qədər hər
hansı bir şeiriniz olubmu ki, sonradan onu yazmağınıza
peşiman olmusunuz?
- Bu
gün kitabımın çap olunması üçün
sponsora ehtiyac duyulur. Özünüz də bilirsiniz ki, sponsor
tapmaq çox çətin bir işdir. Heç buna vaxt da
yoxdur. Belə olan halda, kitabının çap olunması
üçün hər hansı bir imkanlı adam haqqında
kitab yazmağa məcbur olursan...
- Qələndər
Xaçınçaylı ona yazıçı kimi ciddi təsir
göstərmiş kimlərinsə adını çəkə
bilərmi?
- Mən
bu günə qədər Səməd Vurğun, Məmməd
Araz, Fikrət Qoca, Rəsul Rza bulağından su
içmişəm. Şeirlərimin təbiiliyi də elə
bundan irəli gəlir. Bundan başqa, ədəbiyyatşünas,
tənqidçi-alim Qurban Bayramovun xidmətləri
danılmazıdır. Elə ilk şeirimi də xalq
yazıçısı Fikrət Qoca çap etdirib. Yeri gəlmişkən,
fürsətdən istifadə edib yuxarıda adlarını
sadaladığım hər bir kəsə-ölənlərə
rəhmət diləyir, qalanlara isə öz dərin təşəkkürlərimi
çatdırıram...
- Yeri gəlmişkən, bu gün
beş-on səhifəlik cızma-qarası olanlara daha çox
gündəmdə rast gəlmək olur. İstedadlılar isə
belələrinin kölgəsi altında qalır. Bunu nə
ilə əlaqələndirərdiniz?
- Bunun səbəbi
laqeydlik və biganəlikdir. Bu sahədə əsaslı
islahatlar aparılmalıdır. QHT və dövlətin bu sahəyə
marağı, qayğısı olmalıdır. Şairlərin
yaradıcılıq gecələri keçirilməlidir. Əvvəllər
bunlara tez-tez rast gəlmək olurdu. Amma təəssüflər
olsun ki, indi belə şeylər olmur. Şair öz yubileyini
keçirə bilmir. Çünki imkanı çatmır. Bu
da acınacaqlı bir vəziyyətdir. Şairlər
yazdıqları kitabları min bir əziyyət ilə
çap etdirirlər. Buna görə də dövlət nəşriyyatı
fəaliyyət göstərməlidir. Burada istedadlı
insanların yazdıqları kitablar təmənnasız
çap olunmalıdır. Bundan başqa, hər hansı bir
kitab çap olunan zaman, o mütləq tənqidçi
baxışından keçməlidir. Məncə, tənqidçi
rəyi olmadan hər hansı bir kitabı çap etdirmək
məqsədəuyğun deyil. Çox şükürlər
olsun ki, bu gün güclü tənqidçilərimiz var.
Bunlara misal olaraq, Qurban Bayramovu, Vaqif Yusiflini göstərmək
istərdim. Ümumiyyətlə, bu gün balans çox
pozulub. Ədəbiyyata qayğı çox aşağı səviyyədədir...
- Özünüzü nə vaxtsa
dünyanın ən məşhur yazıçısı kimi
görmək istərdiniz? Yoxsa, məşhurluq başa bəladır..?
- Bu
sualınıza öz yazdığım şeir ilə cavab
vermək istərdim:
Pulum yoxdur, kürsülərə mən
çıxam,
Efirlərdə boş yalanlar uyduram.
Yaltaqlanıb neçəsinə
yıxılam
Belələri zaman bir-bir siləcək!
Maskalanıb el içində gəzmərəm,
Yıxılanı tapdalayıb əzmərəm,
Haqsızlığa göz yummaram,
dözmərəm!
Şöhrətimi tarix özü
verəcək...
Cəfər Mənsimi
Həftə içi.- 2011.- 12 aprel.-
S. 7.