İnhisara qarşı mübarizə güclənəcək

Prezident İlham Əliyev qəti tapşırıqlar verdi

Prezident İlham Əliyev 2011-ci ilin birinci rübünün sosial-iqtisadi inkişafının yekunlarına həsr olunmuş iclasda ölkə iqtisadiyyatının uğurla inkişaf etdiyini, sosial məsələlərin öz həllini tapdığını qeyd edib. Prezident istehlak qiymətlərinə nəzarət olunduğunu bildirərək, daim monitorinq aparıldığını, bundan sonra da bu məsələlərlə məşğul olunacağını diqqətə çatdırıb:

"İnhisarçılığa qarşı mübarizəni daha da gücləndirməliyik. Həm idxalda, həm də daxili istehsalda inhisarçılığa qarşı mübarizə daha da güclü aparılmalıdır. Bəzi hallarda inhisarçılıq deyəndə daha çox idxalla bağlı olan məsələlər yada düşür. Ancaq son hadisələr, xüsusilə Novruz bayramı ərəfəsində müşahidə olunan mənzərə onu göstərir ki, daxildə istehsal olunan malların qiymətlərinin süni şəkildə qaldırılması halları baş vermişdir. Biz dərhal operativ şəkildə lazımi tədbirləri gördük. Süni şəkildə artırılan qiymətlərin tənzimlənməsi üçün lazımi addımları atdıq. Ancaq həm idxalla, həm də daxili istehsalla bağlı inhisarçılığa yol verilməməlidir. Azərbaycanın bazarı demək olar ki, kifayət qədər məhduddur. Əgər hansısa bir böyük istehsalçı yaranırsa, biz istəyirik, maraqlıyıq ki, həm orta və kiçik sahibkarlıq artsın, həm böyük şirkətlərimiz olsun və onlar da güclənsin, dövlət tərəfindən verilən dəstək, siyasi, iqtisadi dəstək artıq böyük şirkətlərin yaranmasına xidmət göstərir, ancaq, eyni zamanda, böyük şirkət istər-istəməz inhisarçıya çevrilir, bəzi hallarda öz maraqlarının təmin olunması üçün qəbuledilməz addımlar atır. Belə olan halda inhisarçılığa qarşı mübarizə həm idxalda, həm daxili istehsalda daha da güclü olmalıdır və elə etməliyik ki, xoşagəlməz hallara yol verilməsin".

Ölkə başçısı korrupsiya və rüşvətxorluğa qarşı mübarizənin gücləndirilməsinin müsbət nəticələr verdiyini xususilə vurğulayıb və bu siyasətin davam etdiriləcəyini deyib: "Bu, bizim şüurlu seçimimizdir və görülən tədbirlər xalq tərəfindən yüksək qiymətləndirilir. Biz burada bir neçə amili nəzərə almalıyıq. Bu mübarizə genişmiqyaslı və çoxşaxəli olmalıdır. Əlbəttə ki, inzibati tədbirlər gücləndirilməlidir, cəza tədbirləri bundan sonra da tətbiq olunacaqdır, ictimai nəzarət daha da güclü olmalıdır. Mən həmişə insanlarla təmasda olan zaman müraciət edirəm ki, xoşagəlməz hallar haqqında məlumatlar versinlər. Azərbaycanda ümumiyyətlə, bütün sahələrdə ictimai nəzarət daha da güclü olmalıdır. İslahatların dərinləşməsi prosesi getməlidir. Bu da antikorrupsiya tədbirlərinin arasında mühüm əhəmiyyətə malik olan sahədir. Sağlam rəqabət təmin edilməlidir. Qeyri-sağlam rəqabət aradan qaldırılmalıdır. Bütün sahələrdə şəffaflıq təmin edilməlidir".

"Müsbət nəticələr özünü göstərməkdədir"

Ölkədə korrupsiya və rüşvətxorluğa qarşı aparılan mübarizənin əhalinin sosial müdafiəsinin daha da güclənməsinə stimul verdiyini, müsbət nəticələrini ictimaiyyət nümayəndələri də vurğulayır, görülən işlərin əhalinin sosial rifahının yaxşılaşdırılmasına istiqamətləndiyini qeyd edirlər. İqtisadçı, sabiq millət vəkili Nazim Məmmədovun sözlərinə görə, rüşvətxorluqla mübarizə qısa zamana sığan və nəticələrini tez göstərən bir proses olmasa da, müsbət nəticələr özünü göstərməkdədir: "Bu baxımdan, başlanğıcı müsbət qiymətləndirirəm və hesab edirəm ki, ölkə başçısının gözlədiyi də müsbət nəticələrin davamlı olmasıdır. Hamı cənab prezidentin fəaliyyətini, insanlara münasibətini görür və cəmiyyət aidiyyəti qurumların rəhbərlərindən də bu münasibəti görmək istəyir. Ölkə başçısı çıxışlarında bəyan edir ki, hər kəs inhisarçılıq, korrupsiya və rüşvətxorluqla mübarizə aparmalıdır. Aidiyyəti qurumların da üzərinə düşən vəzifə prezidentin tapşırıqlarını yerinə yetirmək, ictimaiyyətlə sıx münasibətdə olmaqdır. Xalqı qaneedəcək addımlar atılmalıdır".

İqtisadçının sözlərinə görə, aparılan mübarizə tədbirlərinin genişmiqyaslı effekti özünü çox gözlətməyəcək və yaxın müddətdə bunu xalqımız hiss edəcək: "Çünki həyata keçirilən mübarizə tədbirləri heç də bəyanat və kampaniya xarakterli deyil. Çünki bu məsələni analiz etdikdə görürük ki, son günlər bir çox sahələrdə əsaslı dönüş müşahidə olunmaqdadır. Cənab prezidentin qarşıya qoyduğu ən böyük məqsədlərdən biri də insanları əsassız xərclərdən, qanunsuz ödənişlərdən azad etməkdir. Bu isə birtərəfli olmamalıdır, cəmiyyət özü maraqlı olmalıdır ki, qaydalara riayət etsinlər. İqtisadi fəallığı artırmaq, haqsız rəqabəti aradan qaldırmaq, problemləri sivil qaydada həll etmək üçün konkret addımlar atılmalıdır və bunun üçün artıq ölkə başçısı səviyyəsində siyasi iradə ortalığa qoyulub. Buna isə yalnız və yalnız dəstək olmaq lazımdır".

"Bu mübarizə qətidir"

Milli Məclisin Sosial siyasət komitəsinin sədr müavini Musa Quliyev Azərbaycanda korrupsiya və rüşvətxorluğa qarşı mübarizənin həmişə olduğunu deyir: "Hazırda isə korrupsiyaya qarşı mübarizə ilə bağlı qanunlar qəbul olunub, eləcə də, müvafiq dövlət komissiyası fəaliyyət göstərir. Bu istiqamətdə həyata keçirilən kompleks tədbirlərdə əsl günahkarlar öz layiqli cəzalarını almalıdırlar. Yəni, ölkəmizin ümumi iqtisadi inkişafına, sosial islahatlara, bir sözlə, fəaliyyət sahələrinin hər bir bölməsində davam etdirilən dinamik işlərə kölgə salan, bu islahatları ləngidən və açıq şəkildə ölkəmizin imicinə ciddi xələl gətirən strukturların işçilərini cəza gözləyir və belə də olmalıdır. Korrupsiya ilə mübarizə ümumdövlət siyasəti olmaqla, cəmiyyətin bütün təbəqələrini və üzvlərini əhatə etməlidir. Ölkə ictimaiyyətinin bütün üzvləri, vətəndaşlar mütəşəkkil və fəal şəkildə bu neqativ hallara qarşı ciddi mübarizə aparmalıdır. İctimai fəallıq nə qədər yüksək və güclü, dinamik olsa, korrupsiya ilə mübarizə tədbirlərində o qədər effektiv nəticələr əldə etmək mümkündür. Ona görə də bütün vətəndaşlar dövlətin strateji məqsədlərindən olan korrupsiyaya qarşı sistemli tədbirlərin həyata keçirilməsində yaxından iştirak etməlidir. Unutmaq olmaz ki, bu tədbirlərin sistemliliyi dövlətin güclü milli iqtisadi təhlükəsizlik şəbəkəsinin yaradılmasına və sosial tərəqqiyə dərin əsaslar yaradır".

Millət vəkilinin fikrincə, bu mübarizə və onun müsbət nəticələri xüsusilə əhalinin sosial müdafiəsinin daha da güclənməsinə stimul verir: "Çox böyük imkanlar açıla bilər ki, bəzi məhsulların, o cümlədən, ərzaq məhsullarının qiymətləri aşağı düşsün. Görülən bu işlər insanların dövlətə inamını daha da gücləndirir. Fikrimcə, bu mübarizə qətidir, bundan sonra cəmiyyətdə korrupsiya və rüşvət olmayacaq".

Naibə

Həftə içi.- 2011.- 15 aprel.- S. 5.