Brayza səfir kimi ilk dəfə danışdı

"Qarabağ münaqişəsinin dinc və ədalətli həlli yollarının axtarılması səfir kimi mənim üçün prioritet məsələ olacaq"

"Qarabağ münaqişəsinin dinc və ədalətli həlli yollarının axtarılması səfir kimi mənim üçün prioritet məsələ olacaq" - bu fikirləri səlahiyyətlərinə başlamaq üçün bu həftə Bakıya gələcək Birləşmiş Ştatların Azərbaycandakı yeni səfiri Metyu Brayza ABŞ - Azərbaycan Ticarət Palatasının (USACC) onun şərəfinə verdiyi ziyafətdə deyib.

USACC-ın rəsmi saytının yaydığı məlumata görə, diplomat vurğulayıb ki, Azərbaycan və ABŞ arasında münasibətlərin genişləndirilməsini daim diqqətdə saxlayacaq. Metyu Brayza bildirib ki, ABŞ-ın 18 aydır səfir göndərmədiyi Azərbaycana getməyi çox arzulayır: " Azərbaycanın çox geniş imkanları var və əməkdaşlıq istiqamətləri təkcə neft-qaz sektoru ilə məhdudlaşa bilməz". Tədbirdə palatanın nümayəndələri, səfir Brayza və onun ailə üzvləri, həmçinin Azərbaycanın Vaşinqtondakı səfirliyinin əməkdaşları iştirak ediblər. ABŞ-ın Azərbaycandakı yeni səfirinin andiçmə mərasimi ötən həftə dövlət departamentində keçirilib. Obama hakimiyyətinin ölkəmizlə münasibətlərə verdiyi əhəmiyyəti nümayiş etdirərək andiçmə mərasimində dövlət katibi Hillari Klinton şəxsən iştirak edib. Ötən ilin mayında Metyu Brayzanın Bakıya səfir namizədliyini irəli sürən prezident Barak Obama senatın qərarını gözləmədən bir ay əvvəl "tətil təyinatı" səlahiyyətindən istifadə edərək onu vəzifəsinə təsdiqləyib. ABŞ-ın Azərbaycandakı səfiri vəzifəsi bir il yarım idi ki, vakant qalırdı.

Məsələ yenidən Ermənistan mətbuatının diqqət mərkəzinə düşüb. Onlar Brayzanın andiçmə mərasimində dövlət katibinin şəxsən iştirak etməsinin ciddi narahatlıq yaratdığını qeyd edirlər. "Bizim lobbi qrupları bu məsələyə o qədər də fikir vermədi. Əksinə, 1 il müddətində Brayza ilə məşğul olmayacaqları üçün rahatlayıblar", - deyə Ermənistan mətbuatı ABŞ-dakı diaspor qurumlarını ciddi tənqid edib. Obamanın onun namizədliyinin təsdiqlənməsi ilə bağlı yenidən senata müraciət etməsi isə Amerika Erməni Milli Komitəsini özündən çıxarıb. "Amerika erməniləri növbəti dəfə Barak Obama barədə xəyal qırıqlığına uğrayıblar. Seçki kampaniyası zamanı verdiyi sözlərin heç birini tutmayan Ağ ev rəhbəri senatorların etirazlarına baxmayaraq, bu dəfə yenidən tətil müddətində təyin etdiyi səfirlərin təsdiqlənməsi üçün senata təzyiqlər göstərir", - deyə AEMK-nin bəyanatında vurğulanır. Lakin Amerika erməniləri yenidən Brayzanın Azərbaycana səfir təyin olunmaması üçün senatdakı ermənipərəst senatorların Obamanın əksinə gedəcəyinə böyük ümid bəsləyirlər. "Brayzanın təyinatında prezidentin inadkarlıq göstərməsi ondan xəbər verir ki, "maraqların münaqişəsi", namizədin Azərbaycan hakimiyyəti ilə şübhəli əlaqələri Obamanı heç də narahat etmir. Biz erməni seçicilərini Obamanın qərarının qarşısının alınması üçün senatorlara çağırış etmələrini istəyirik", - deyə Amerika ermənilərinin ən böyük diaspor təşkilatının bəyanatında vurğulanır.

Azad

Həftə içi.- 2011.- 3 fevral.- S. 2.