"Kəlbəcərin
təhsili prezidentin qayğısı sayəsində
öndədir"
Məhəmməd Bağırov: "Bir sıra
rayonda "Olimpiadaya hazırlıq mərkəzləri"
yaradılıb
Əməkdaşımızın
Kəlbəcər rayonunun sosial problemləri və
görülən işlərlə bağlı
yazıları davam edir. Ötən yazımızda da məlumat
vermişdik ki, 2010-2011-ci təhsil ilinin ali məktəblərə
qəbuluna görə bu rayonun təhsil sistemi ölkə
üzrə 9-cu yeri tutub. Bu, qaçqın həyatı
yaşayan bir rayonun, onun rəhbərliyinin gördüyü
uğurlu işlərin nəticəsidir. Kəlbəcər
rayon təhsil şöbəsinin müdiri Məhəmməd
Bağırov da əməkdaşımızla söhbətində
məhz bunları bir daha vurğuladı:
- Kəlbəcər
rayonundan məcburi didərgin düşən, hazırda
respublikanın ayrı-ayrı bölgələrində
müvəqqəti məskunlaşan kəlbəcərli
köçkün ailələrinin uşaqlarını təhsilə
cəlb etmək, müəllim və digər təhsil
işçilərini işlə təmin etmək məqsədi
ilə 2009-2010-cu dərs ilində 114 ümumtəhsil məktəbi
təşkil olunub ki, onların da 95-i orta, 19-u əsas məktəbdir.
Dərs ilinin əvvəlində 10 min 432 nəfər
şagird təhsilə cəlb olunub. Onlardan 1038 nəfəri
I, 799 nəfəri isə X siniflərə qəbul
olunanlardır. Bununla yanaşı 2010-cu ildə təhsilin
keyfiyyətinin yüksəldilməsi, istedadlı şagirdlərlə
aparılan iş, onların aşkar edilərək üzə
çıxarılması, məktəblərin maddi-tədris
bazasının möhkəmləndirilməsi sahəsində
müəyyən işlər görülüb ki, bu da əvvəlki
illərlə müqayisədə xeyli müsbət nəticənin
əldə olunmasına gətirib çıxarıb.
- Nə qədər çətin şərait olsa da,
xüsusi istedada malik olan uşaqlar zaman-zaman üzə
çıxmağı bacarıblar. Sizdə necə, həmin
uşaqlar üçün imkanlar yaradılıbmı?
- Azərbaycan
Respublikası Prezidentinin 17 aprel 2006-cı il, 1414 saylı sərəncamı
ilə təsdiq edilmiş "Xüsusi istedada malik
uşaqların (gənclərin) yaradıcılıq
potensialının inkişafı üzrə dövlət
proqramının (2009-2010)" icrası ilə bağlı Təhsil
Nazirliyinin fəaliyyət planına əsasən yerlərdə
riyazıyyat, fizika, kimya, biologiya fənləri üzrə
istedadlı şagirdlər arasında ən
istedadlılarını müəyyənləşdirmək məqsədilə,
2010-cu ilin mayında Bakı şəhərində
keçirilən təkrar seçimdə rayonu təmsil edən
56 saylı məktəbin IX sinif şagirdi Elçin Əlizadə,
117 saylı məktəbin X sinif şagirdi Qaçay Yusifov, 56
saylı məktəbin XI sinif şagirdi Tural Həsənzadə,
117 saylı məktəbin XI sinif şagirdi Vüqar
Kazımzadə, 56 saylı məktəbin X sinif şagirdi
Arazxan Əsgərxanov, 117 saylı məktəbin X sinif
şagirdi Həsənoğlu Altun, 56 saylı məktəbin X
sinif şagirdi İnal Əhmədov isə kimya fənnindən
yaxşı nəticələr göstəriblər.
- Bunun üçün yəqin ki, rayonda ilk olaraq fənn
olimpiadaları keçirilir...
- Elədir. Rayon üzrə
fənn olimpiadalarının məqsədyönlü və
sistemli hazırlanmasını təmin etmək məqsədilə,
rayonun ümumtəhsil məktəbləri daha çox yerləşən
Bakı, Gəncə şəhərlərində,
Göygöl, Goranboy, Bərdə, Yevlax, Tərtər
rayonlarında "Olimpiadaya hazırlıq mərkəzləri"
yaradılıb ki, bu mərkəzlərə səriştəli,
peşəkar və yüksək bacarığa malik olan
müəllimlər cəlb edilib. Rayonun məktəblərindən
2 nəfər Əliquliyev İsmayıl-Türkel və Lətifzadə
Şünasi fənn olimpiadasının respublika turunda
iştirak edib. 55 saylı məktəbin X sinif şagirdi Lətifzadə
Şünasi Rafiq oğlu ana dili fənni üzrə IV yeri
tutub.
- Təhsil sahəsində Kəlbəcər rayonunun
uğurları danılmazdır. Buraxılış və ali
məktəblərə qəbul imtahanlarında da şagirdləriniz
fəallıqları ilə fərqlənirlər...
- Ali məktəblərə
hazırlıqla bağlı sınaq imtahanları təşkil
olunur. Müəllimlərimiz səylə
çalışırlar. Görülmüş
qabaqlayıcı tədbirin nəticəsidir ki,
buraxılış imtahanlarının nəticəsi bu il də
yüksək olub. 2010-cu ildə rayonun ümumtəhsil məktəblərində
XI sinif üzrə 666 nəfər, IX sinif üzrə 806 nəfər
mərkəzləşdirilmiş qaydada keçirilən
buraxılış imtahanında iştirak edib. XI sinif
şagirdlərindən 562 nəfər (84,4 %), IX sinif
şagirdlərindən isə 761 nəfər (94,4 %) müvəffəq
qiymət alaraq attestat və şəhadətnamə
alıblar. XI sinif məzunlarının 60 %-i yəni, 337 nəfəri
ali məktəblərə qəbul üçün sənəd
verib ki, onlardan da 145 nəfər ali məktəblərə qəbul
olunub. Həmçinin 500 və 600-dən yuxarı bal
toplayanların sayı 26 nəfər olub. Onlardan 7 nəfəri
600-dən artıq bal toplayıb.
- Məktəblərinizdə kurrikulumla bağlı
hansı tədbirlər görülüb?
- Rayonun ümumtəhsil
məktəblərinin I, II siniflərində işlər
"Azərbaycan Respublikasında ümumtəhsil
konsepsiyası (Milli Kurrikulum)"nın tələbləri
istiqamətində qurulub. Siniflərdə dərs aparan müəllimlər
kurslarda olublar. Eyni zamanda bütün I və II sinif şagirdləri
dərsliklərlə, orada dərs aparan müəllimlər
isə vəsaitlərlə tam təmin olunub. 2010-cu ildə də
rayonun I siniflərində dərs deyəcək olan müəllimlər
respublikanın ayrı-ayrı bölgələrində
kurslara cəlb olunublar. Həmçinin Heydər Əliyev
Fondunun təşəbbüsü ilə "Yeniləşən
Azərbaycana yeni məktəb" layihəsi çərçivəsində
rayonda da yeni məktəblər tikilib, əsaslı və cari
təmir işləri aparılıb. 2010-cu ildə 31 və
102, 19, 126, 30 saylı məktəblər üçün yeni
məktəb binası tikilib və 78, 9, 123, 79, 29, 89, 98
saylı məktəblərdə təmir işləri
aparılıb. Rayonun bütün məktəbləri pulsuz
disklər və bədii kitablarla təmin olunub. Eyni zamanda məktəblərdə
metodiki iş canlandırılıb, rayonun ümumtəhsil məktəbləri
daha çox olan şəhər və rayonlarda, Bakı, Mingəçevir,
Gəncə, Bərdə, Tərtər, Goranboy, Göygöl,
Yevlaxda metodiki mərkəzin dayaq məntəqələri
yaradılıb. Həmin məntəqələrə rayonun
qabaqcıl müəllimləri dəvət olunublar. 2010-cu ildə
120 nəfərdən çox müəllim və rəhbər
işçi ixtisasartırma kurslarından keçib.
- Regionlarda ixtisas müəllimlərinə yaranan
ehtiyac yəqin ki, sizin məktəblərdə də
özünü göstərir. Bu problemi necə aradan
qaldırırsınız?
- 2009/2010-cu dərs ilində
məktəblərdə ixtisas müəllimlərinə olan
ehtiyac əvvəlcədən müəyyənləşdirildi.
Bununla bağlı Təhsil Nazirliyinə məlumat göndərildi.
Ötən dərs ilində 8 nəfər təyinatla, 28 nəfər
isə azad təyinatla gələn gənc mütəxəssis
Təhsil Nazirliyinin razılığı ilə ehtiyac olan məktəblərdə
ixtisasları üzrə işlə təmin olunublar. Bununla
yanaşı məktəblərlə yaxından əlaqə
saxlamaq məqsədi ilə hər ayın axırıncı
həftəsinin 2-ci günü mütəmadi olaraq
direktorların seminarı təşkil olunur. Seminarda məktəblə
bağlı son yeniliklər direktorlarla müzakirə edilir və
onlara çatdırılır.
- Ötən il məcburi köçkün ailələrinin
yaşayış yerlərinin dəyişdirilməsi ilə
bağlı yəqin ki, təhsil sahəsində də bir
sıra çətinlik yarandı. Bu çətinlikləri
necə aradan qaldırdınız?
- İlk olaraq qeyd etmək
istərdim ki, yaşayış yerlərinin dəyişməsi
ilə bağlı şagird kontingenti aşağı
düşdü. Bu problemi aradan qaldırmaq üçün
37, 53, 114, 122 saylı məktəblərin yeri dəyişdirilərək
məcburi köçkün ailələrinin daha sıx məskunlaşdıqları
yaşayış məntəqələrinə
köçürüldü. Hazırda rayon üzrə əvvəlki
ildə olduğu kimi, 114 ümumtəhsil məktəbi fəaliyyət
göstərir ki, onların da 18-i ümumi orta, 96-sı tam
orta məktəblərdir. Bu il məktəblərdə
ümumilikdə təhsilə 10 min 93 nəfər şagird cəlb
olunub. Onlardan 1096 nəfəri birinci, 665 nəfəri isə X
sinifə qəbul olunanlardır.
- Məktəblərdə bu günə kimi yenidənqurma
və təmir işləri ilə bağlı hansı tədbirlər
görülüb?
- Əvvəlki illərlə
müqayisədə cari ildə məktəblərin yeni
binalarla və əlavə sinif otaqları ilə təmin
olunmasında, yenidənqurma və təmir işlərinin
aparılmasında, ümumiyyətlə məktəblərin
maddi-texniki bazasının möhkəmləndirilməsində
nəzərəçarpacaq irəliləyişlər olub. Belə
ki, prezident cənab İlham Əliyevin və onun xanımı
millət vəkili, İSESKO və YUNESKO-nun xoşməramlı
səfiri, Heydər Əliyev Fondunun prezidenti Mehriban xanım Əliyevanın
qayğısı sayəsində bu günlərdə rayonun
30, 19 və 126 saylı məktəbləri üçün
yeni inşa edilən və hər cür avadanlıqlar təmin
olunan məktəb binalarının açılış mərasimi
keçirilərək, istifadəyə verilib. Çox
sevindirici haldır ki, 30 saylı məktəbin
açılış mərasimində ölkə prezidenti
İlham Əliyev şəxsən özü iştirak edib. Xüsusilə
qeyd etmək istərdim ki, bu son 2 ildə
üçüncü belə ürək açan hadisədir.
Bildirmək istərdim ki, hörmətli deputatımız cənab
Cavid Qurbanovun köməkliyi də bizlərə az deyil. Onun
köməkliyi sayəsində 115 saylı məktəb
üçün 5 əlavə sinif otağı tikilib, 117, 123
saylı məktəblərdə əsaslı təmir işləri
aparılıb.
2010/2011-ci dərs ili
üçün sinif jurnalları, şəxsi işlər və
məktəbli kitabçaları alınıb məktəblərə
çatdırılıb. 400 ədəd parta, 14 ədəd
şkaf alınaraq məktəblərə verilib, bütün
məktəblər kifayət qədər dəftərxana ləvazimatı
ilə təmin olunub. 79 saylı məktəb
üçün yeni əlavə 2 sinif otağı tikilib, 9,
88, 89 saylı məktəblərdə cari təmir işləri
aparılıb, məktəblərin qış
mövsümünə hazırlığı ilə əlaqədar
yığıncaq üçün vəsait ayrılaraq məktəblərin
tələbatına uyğun bölünüb. Rayonumuzda,
xüsusilə də təhsilimizdə yaradılmış bu
sağlam mühit və inkişaf üçün
deputatımız, hörmətli Cavid müəllimə,
RİH başçısı Vidadi müəllimə minnətdarıq
və əmin etmək istəyirik ki, Kəlbəcər rayon
çoxsaylı təhsil işçiləri ölkə
prezidenti cənab İlham Əliyevin apardığı daxili və
xarici siyasəti daim dəstəkləyəcək, dövlətimizin
və dövlətçiliyimizin inkişafı və tərəqqisi
naminə Rayon İcra Hakimiyyətinin ətrafında sıx
birləşərək, ölkədə aparılan siyasi və
quruculuq işlərində həmişə olduğu kimi,
bundan sonra da fəal iştirak edəcək.
Pərvin İsmayılova
Həftə içi.- 2011.- 2 mart.- S. 6.