Oxucunu bir araya gətirən “Gəzən kitabxana“  

 

10 min yazılı, 5 min elektron nəşrdən ibarət kitablar 15 regionda yayılacaq

 

Kitab bilik xəzinəsidir. Bu bilik xəzinəsinə baş vuran hər kəs nitqin və dünyagörüşün inkişaf etdirilməsində kitabın, mütaliənin böyük əhəmiyyəti olduğunu anlayır. Bu günlərdə Gənclər və İdman Nazirliyi və Azərbaycan Tələbə Gənclər Təşkilatları İttifaqının (ATGTİ) dəstəyi ilə maraqlı layihənin təqdimatı olub. "Gəzən kitabxana" layihəsi Dünya İqtisadi Forumunun Qlobal Gənclər Birliyinin "Cənubi Qafqaz və Mərkəzi Asiya 2020-ci ilə baxış" mövzusunda Bakıda keçirilən beynəlxalq forumun rəsmi açılışı zamanı təqdim olunub.

"Həftə içi" layihənin özəllikləri ilə maraqlanıb. Məlum olub ki, "Gəzən kitabxana"nın əsas məqsədi gənclərin kitab oxumağa həvəsini artırmaqdır. Tələbələrin, xüsusən də region gənclərinin istəyi ilə reallaşdırılan bu layihənin ideyası da elə gənc tələbələrdən gəlib. Kitablar isə tələbələr arasında aparılan sorğu əsasında seçilib. Seçimdə həm də ən oxunaqlı və tələbata uyğun kitablar nəzərə alınıb.

Layihənin ən maraqlı tərəflərindən biri odur ki, "Gəzən kitabxana"dakı kitabların əksəriyyəti pulla alınıb. Səyyar kitabxanada yer alan kitabların bir qismi isə ATGTİ-yə hədiyyə olunanlardır. Kitabxanada həm Azərbaycan, həm də dünya klassiklərinin eyni adlı əsərlərindən bir neçə nüsxə mövcuddur. Eyni zamanda kitabxanada Azərbaycan dilində yazılan xarici ədəbiyyatlar yer alıb. Bir sözlə, səyyar kitabxananın səliqə ilə hazırlanmış rəfləri arasından istənilən maraq dairəsinə uyğun kitab tapmaq mümkündür.

 

Kitabxana 15 regionu "gəzəcək"

 

ATGTİ-nin icraçı direktoru İradə Dadaşova "Həftə içi"nin əməkdaşı ilə söhbətində deyib ki, Bakıda keçirilən beynəlxalq forumdakı təqdimatdan sonra "Gəzən kitabxana" layihəsi böyük marağa səbəb olub. Onun fikrincə, layihənin icrasından sonra kitab oxumağa marağı olan gənclərin işi daha da asanlaşacaq. Bu layihə 1 il davam edəcək və ilkin olaraq ölkəmizin 15 regionunu əhatə edəcək. 10 min kitab və 5 min elektron nəşrin olduğu kitabxana səyyar fəaliyyət göstərəcək və kitabsevərlər nəşrləri pulsuz əldə edəcəklər. Həmsöhbətimiz qeyd edib ki, hansısa bir sənəd qoymaqla kitabı əldə etmək mümkün olacaq. Ancaq kitab 10 gün müddətində qaytarılmalıdır: "Həmin müddətdə gənclər gəlib bu imkandan istifadə edə bilərlər. Belə ki, onlar müvafiq bir sənəd qoyacaqlar və kitabları götürəcəklər. 10 gün sonra isə kitabı qaytaracaqlar. Çünki 15 gündən sonra kitabxana növbəti rayona getməlidir. Ancaq oxucu sayı və marağından asılı olaraq vaxt artırıla bilər".

 

"Qapımız hər kəsə açıqdır"

 

İradə Dadaşova onu da əlavə edib ki, kitabxanada 3 dildə nəşrlər var və 8 bölmə fəaliyyət göstərir. Onun sözlərinə görə, "Gəzən kitabxana"da elmi və bədii ədəbiyyat, həm də tədrislə bağlı kitablar var. Azərbaycan, rus və ingilis dillərində olan bədii ədəbiyyatları həm də onlayn yükləmək mümkün olacaq. Belə ki, "Gəzən kitabxana"da yaradılmış xüsusi proqramda nəşrlərin elektron kataloqu yerləşdirilib. Odur ki, kitabları elektron variantda əldə etmək istəyənlərə də belə bir imkan yaradılacaq. Bundan başqa, səyyar kitabxanaya surətçıxaran aparat qoyulub və istəyənlər kitabın surətini çıxarıb əldə edə biləcəklər.

Kitablardan tək gənclər deyil, orta və yaşlı nəslin nümayəndələri də yararlana biləcəklər. ATGTİ-nin icraçı direktoru bildirir ki, bu kitabxananın təşəbbüskarları gənclər olsa da, onun imkanlarından bəhrələnmək istəyənlərə yaş məhdudiyyəti qoyulmayacaq: "Qapımız hər kəsə açıqdır, kitab oxumaq istəyən istənilən şəxsə şərait yaradacayıq. Səyyar kitabxanada hətta kiril əlifbası ilə yazılan kitablar da var. Beləliklə, latın qrafikası ilə oxumağa çətinlik çəkənlər həmin kitablardan istifadə edə biləcəklər".

Qeyd edək ki, "Gəzən kitabxana"nın ilk səfəri aprelin sonunda Gəncə şəhərinə olacaq. Hər bir rayon və şəhərə getməzdən əvvəl həmin regionların mərkəzi yerlərində məlumatlandırıcı plakatlar asılacaq. Layihənin sonunda hansı regionda və hansı kitaba daha çox maraq olduğu müəyyənləşdiriləcək.

 

 

Atif Sarıxanlı

 

Həftə içi.- 2013.- 16 aprel.- S.8.