Planlı iqtisadiyyatdan liberallaşmaya
doğru
Dövlət müstəqilliyinin bərpasından
sonra Azərbaycanda demokratik dövlət quruculuğunun həyata
keçirilməsi və liberal bazar iqtisadiyyatının
formalaşdırılması obyektiv zərurətə
çevrildi. Lakin müstəqilliyin ilk illəri Azərbaycan
üçün ciddi sınaq dövrü olub. Belə ki,
müəssisələr arasında mövcud əlaqələrin
pozulması, o dövrdəki siyasi rəhbərliyin səriştəsizliyi,
Ermənistanın təcavüzü nəticəsində Azərbaycan
ərazisinin 20%-nin işğalı, 1 milyondan çox soydaşımızın
doğma yurdlarından didərgin düşməsi, ölkəmizin
iqtisadi, siyasi, informasiya blokadasına alınması ölkənin
sosial-iqtisadi həyatında xaosa gətirib
çıxardı.
Bu
dövrün iqtisadi mənzərəsi həmin illərin
makroiqtisadi göstəricilərində daha aydın
görünür. 1991-1994-cü illər ərzində ölkə
iqtisadiyyatında ÜDM hər il orta hesabla 16,5% azalıb. Tənəzzül
meyili sənayedə xüsusilə kəskin xarakter aldı,
1985-ci ilə nisbətən sənaye istehsalının həcmi
1993-cü ildə 50%-ə qədər azaldı. 1991-ci ildən
etibarən inflyasiya səviyyəsi dəfələrlə,
büdcə kəsirinin ÜDM-yə nisbəti 13%-ə qədər
artıb, 1992-1994-cü illərdə xarici ticarət
dövriyyəsinin həcmi isə 42% azalıb.
Yalnız
ümummilli lider Heydər Əliyev yenidən hakimiyyətə
qayıtdıqdan sonra ölkədə siyasi sabitlik bərqərar
oldu, atəşkəs əldə edildi, irimiqyaslı iqtisadi
islahatlara başlanıldı. Bunun nəticəsində
ölkədə maliyyə vəziyyəti sabitləşdi,
iqtisadiyyata cəlb olunan investisiyaların həcmi ildən-ilə
artdı, xalqın həyat səviyyəsi
yaxşılaşmağa başladı.
1994-cü
ildə dünyanın aparıcı neft şirkətləri
ilə “Əsrin müqaviləsi” imzalandı və bununla da
ölkənin enerji təhlükəsizliyinin möhkəm təməli
qoyuldu. Eyni zamanda, planlı iqtisadi sistemdən liberal bazar
iqtisadiyyatına keçid üçün neft sektoru ilə
yanaşı, digər sahələrdə də genişmiqyaslı
islahatlara başlanıldı. Belə ki, bazar iqtisadiyyatına
uyğun qanunvericiliyin, büdcə, vergi, bank sistemlərinin
formalaşdırılması, aqrar islahatlarının həyata
keçirilməsi, dövlət əmlakının özəlləşdirilməsi,
sahibkarlığın inkişafı üçün əlverişli
biznes mühitinin yaradılması nəticəsində bazar
iqtisadiyyatına keçidin əsası qoyuldu və
sahibkarlıq sinfi formalaşdı.
Beləliklə,
ümummilli liderin hakimiyyəti illəri ərzində ÜDM
90,1%, dövlət büdcəsinin gəlirləri 3 dəfə,
ölkənin valyuta ehtiyatları 85 dəfə, sənaye məhsulunun
həcmi 25,2%, kənd təsərrüfatı
istehsalının həcmi 53,9%, xarici ticarət dövriyyəsi
4 dəfə, orta aylıq real əməkhaqqı 5,1 dəfə
artdı, inflyasiya səviyyəsi 2-3%-ə qədər
endirildi. Əldə olunmuş nailiyyətlər sonrakı illərdə
ölkə iqtisadiyyatının davamlı və dinamik
inkişafı üçün möhkəm zəmin
yaradıb.
Azərbaycan
Prezidenti İlham Əliyev tərəfindən aparılan
sosial-iqtisadi siyasət nəticəsində
qazanılmış uğurlar daha da möhkəmləndirilib,
bu dövrdə makroiqtisadi sabitlik qorunub saxlanılıb, iqtisadiyyatın
diversifikasiyası, qeyri-neft sahələrinin, regionların
inkişafı sürətlənib, strateji valyuta
ehtiyatlarının səmərəli istifadəsi təmin
olunub, milli valyutanın sabitliyi, bank sisteminin
etibarlılığı artırılıb,
sahibkarlığa dövlət dəstəyi gücləndirilib,
əhalinin sosial rifahı davamlı olaraq
yaxşılaşıb.
Bu məqsədlərə
nail olmaq üçün regionların sosial-iqtisadi
inkişafı, yoxsulluğun azaldılması və davamlı
inkişaf, əhalinin ərzaq məhsulları ilə
etibarlı təminatı və bir sıra sahəvi Dövlət
Proqramları qəbul edilib və uğurla icra olunur.
Kənd təsərrüfatı
məhsullarının istehsalının
stimullaşdırılması, rəqabət qabiliyyətinin
artırılması, əhalinin ərzaq məhsullarına
olan tələbatının yerli istehsal hesabına ödənilməsi
və ixracının genişləndirilməsi məqsədilə
subsidiyaların və vergi güzəştlərinin verilməsi,
lizinq xidmətlərinin genişləndirilməsi kimi kompleks
dövlət dəstəyi aqrar sektorun inkişafına
müsbət təsir göstərib və ərzaq təhlükəsizliyi
təmin edilib. Ölkənin regionlarında mövcud olan
iqtisadi potensialdan tam və səmərəli istifadə
olunması, sosial-iqtisadi vəziyyətin
yaxşılaşdırılması və iqtisadiyyatın
tarazlı inkişafının təmin edilməsi infrastruktur
sahələrinin bərpası və genişləndirilməsinə,
yeni istehsal və emal müəssisələrinin, təhsil, səhiyyə,
idman-sağlamlıq, mədəniyyət obyektlərinin istifadəyə
verilməsinə səbəb olub. Sahibkarlığın
davamlı inkişafı, biznes və investisiya mühitinin
yaxşılaşdırılması, daxili və xarici
investisiyaların cəlb edilməsi, qeyri-neft sektorunun dinamik
inkişafı nəticəsində özəl sektorun ölkə
iqtisadiyyatında payı 80%-dən çox olub.
Vergi
yükünün azaldılması və vergi
prosedurlarının asanlaşdırılması, dövlət
qeydiyyatında və Azərbaycanın dövlət sərhədinin
buraxılış məntəqələrində “bir pəncərə”
prinsipinin tədbiqi, sahibkarlıq subyektlərinə güzəştli
kreditlərin verilməsi özəl sektorun
inkişafını daha da sürətləndirib.
Sahibkarlığa Kömək Milli Fondu vasitəsilə
investisiya layihələrinin güzəştli qaydada kreditləşdirilməsinin
daha effektiv mexanizminin yaradılması sahibkarların maliyyə
mənbələrinə çıxış
imkanlarını asanlaşdırıb.
Azərbaycanın
sürətli iqtisadi inkişafında kənd təsərrüfatının,
onun əsas hərəkətverici qüvvəsi olan özəl
sektorun, kiçik və orta sahibkarlığın rolu
böyükdür. Son ildə investisiyaların böyük əksəriyyəti
özəl sektorlar tərəfindən qoyulan daxili
investisiyalardır. Bu həm də onu göstərir ki, Azərbaycan
dövlətinin gücü artıb, özəl sektor ölkəmizdə
gedən uğurlu proseslərdən bəhrələnir.
Məlumdur
ki, sahibkarlığın inkişafına mane olan amillərdən
biri də korrupsiya və rüşvətxorluğa
qarşı mübarizəni gücləndirmək və
sahibkarlıq subyektlərində əsassız yoxlamaların
qarşısı almaqdır ki, bu istiqamətdə də
prezident İlham Əliyevin təşəbbüsü və
tapşırığı ilə ciddi tədbirlər həyata
keçirilir. Azərbaycanda sahibkarlığın
inkişafı iqtisadi siyasətin prioritet istiqamətlərindəndir.
Bu istiqamətdə ardıcıl olaraq dövlət-sahibkar
münasibətlərinin inkişaf etdirilməsi, biznes
mühitinə dair qanunvericiliyin və inzibati prosedurların təkmilləşdirilməsi,
sahibkarlığa dövlət dəstəyi mexanizmlərinin
genişləndirilməsi, maarifləndirmə, sahibkarların
işgüzar əlaqələrinin inkişafı və
müxtəlif növ xidmətlərin göstərilməsi
kimi kompleks tədbirlər həyata keçirilir.
Ötən
illər ərzində sahibkarlıq fəaliyyətini tənzimləyən
prosedur və qaydalar liberallaşdırılıb, idxalda
rüsumların maksimal həddi 15% həcmində müəyyənləşdirilib.
Eyni zamanda, sahibkarların vergi yükü azaldılıb, o
cümlədən, mənfəət vergisinin dərəcəsi
22%-dən, fiziki şəxslərin gəlir vergisi isə 35%-dən
20%-ə endirilib, sadələşdirilmiş verginin hər
kvartalda bir dəfə ödənilməsi təmin edilib,
elektron vergi hesab-fakturalarının tətbiqinə
başlanılıb, elektron xidmətlərin tətbiqi
genişləndirilib, kənd təsərrüfatı məhsullarının
istehsalçıları 2014-cü ilədək torpaq vergisindən
başqa, bütün növ vergilərdən azad olunub.
Həyata
keçirilmiş məqsədyönlü tədbirlər nəticəsində
özəl sektorun ölkənin sosial-iqtisadi inkişafında
və ÜDM istehsalında xüsusi çəkisi artıb.
Bu gün ÜDM-nin həcmində özəl sektorun payı
80%-dən çoxdur.
Qeyd etmək
lazımdır ki, ötən illər ərzində dövlət
başçısı tərəfindən imzalanmış
bir sıra fərman və sərəncamlar
sahibkarlığın inkişafında əhəmiyyətli
rol oynayıb. Belə ki, Azərbaycan prezidentinin “Müəyyən
sahibkarlıq fəaliyyəti növləri ilə məşğul
olmaq üçün tələb edilən xüsusi
razılıq (lisenziya) və icazə sistemi ilə
bağlı bəzi məsələlər haqqında” Fərmanı
da sahibkarlığın daha da inkişaf etdirilməsi istiqamətində
atılan növbəti addım olmaqla, özəl bölmənin
inkişafına dövlət dəstəyinin daha bir təzahürüdür.
Əvvəlki illərdə ölkə qanunvericiliyində
edilmiş dəyişikliklərə əsasən,
lisenziyalaşdırma sisteminin sadələşdirilməsi və
təkmilləşdirilməsi məqsədilə mövcud
olan sistemin optimallaşdırılması istiqamətində
bir sıra tәdbirlәr həyata keçirilib. Belə ki,
lisenziyaların sayı kəskin azaldılıb,
lisenziyalaşdırma ilə bağlı prosedurlar, onun
alınması üçün tələb olunan sənədlərin
sayı aşağı salınıb. Təkcə bu ilin
ötən dövrü ərzində Sahibkarlığa
Kömək Milli Fondu tərəfindən Bakıda fəaliyyət
göstərən sahibkarların 923 investisiya layihəsinin
maliyyələşdirilməsinə 97,8 milyon manat güzəştli
kredit verilib, bu kreditlər hesabına 3200-ə yaxın yeni
iş yeri yaradılacaq. Aran iqtisadi rayonunda fəaliyyət
göstərən sahibkarlıq subyektlərinin 5470-dən
çox investisiya layihəsinin maliyyələşdirilməsinə
275,9 milyon manat güzəştli kreditlər verilib.
Qarşıda
duran vəzifələr isə 2013-2023-cü illərdə Azərbaycanın
inkişaf etmiş ölkələr sırasına
çıxarılması və əhalimizin yüksək gəlirli
topluma çevrilməsi, qeyri-neft sektorunun, özəl bölmənin,
sahibkarlığın hərtərəfli inkişafı sayəsində
ümumi daxili məhsulun 2 dəfə artırılmasından
ibarətdir. Həmçinin dövlət və özəl
qurumların birgə fəaliyyəti üzrə yeni
strategiyanın hazırlanması, ən müasir
texnologiyaları tətbiq etməklə iqtisadiyyatın modernləşdirilməsi,
elm və innovasiyalara əsaslanan cəmiyyət quruculuğu,
hüquqi dövlətçilik prinsiplərinin, insan hüquq
və azadlıqlarının tam bərqərar edilməsi
dövlətin qarşıya qoyduğu başlıca hədəflərdir.
Faktlar onu
deməyə əsas verir ki, bu gün Azərbaycanda
güclü sahibkarlar sinfi formalaşıb. Sahibkarlığa
dövlət dəstəyi isə getdikcə genişlənir.
Bunun müqabilində dövlət də, insanlar da
sahibkarlardan aparılan işlərin keyfiyyətli
görülməsinə, istehsalın həcminin və keyfiyyətinin
dünya standartlarına uyğun olmasına daha böyük
ümidlər bəsləyir.
Atif Eyvazov
Yazı “Avromed” şirkətinin dəstəyi
ilə “Xalq qəzeti” və “Kaspi” qəzetlərinin
ümummilli lider Heydər Əliyevin 90 illik yubileyi münasibətilə
keçirdiyi “Azərbaycan Respublikasında
sahibkarlığının inkişafı” adlı müsabiqəyə
təqdim olunur.
Həftə
içi.- 2013.- 25 aprel.- S.7.