“Milli musiqinin elementləri caza başqa rəng qatır”

Türkiyəli klassik musiqi ifaçısı Oya Ergün bu gün keçirəcəyi konsert öncəsi Hafta-ichi.az-a müsahibə verib. İfaçı konsert hazırlıqları və gələcək planları barədə danışıb.

- Konsert hazırlıqları neçə müddətdir davam edir?

Oya Ergün:

- Martın 7-də başqa bir konsert var idi. Ona görə də həmin vaxta qədər onun üçün hazırlaşırdıq. Martın 7-dən başlayaraq isə bu günkü konsert üçün məşqlərə başladıq. Mənim pianistim Franz köhnə dostumdur. Amsterdamdakı konservatoriyada oxuyan illərdən bir-birimizi tanıyırıq. O mənim necə müğənni olduğumu, mən də onun necə pianist olduğunu bilirəm, ona görə də hazırlaşmağımız asan oldu.

- Neçə saatlıq konsert planlaşdırırsız?

- On beş-on altı mahnımız var. Konsert bir saat yarım olacaq.

- Bundan sonra harada konsertləriniz olacaq?

- Gələn həftə Parisdə, aprel ayında isə 3 konsertimiz olacaq. Mayda isə həm Amsterdamda, həm Almaniyada, 3 dənə isə Bakıda konsertimiz var. İyunda da konsert planlaşdırırıq, iyul və avqust aylarında isə hələlik konsert yoxdur. Amma səfirlik hər hansısa tədbir keçirərsə, orada iştirak edə bilərik. Növbəti mövsüm də çalışacağıq ki, hər ay iki konsert verək.

- Bakıda yaşayırsınız, ona görə də müşahidə imkanınız daha yaxşıdır. Azərbaycanda cazın durumunu necə qiymətləndirirsiz?

- Mən əslində opera müğənnisiyəm, amma cazı da öyrəndim. Bakı cazda çox gözəldir. Çoxdan tanıdığım musiqiçilərinizdən Vaqif Mustafazadəni tanıyıram. Onun qızı Əzizə Mustafazadəyə heyranam, çox gözəl ifaçıdır. Mənə elə gəlir ki, Azərbaycanda caz daha da inkişaf edəcək.

- Türkiyəli müğənninin azərbaycanlı ifaçıları izləməyi, burada konsertlər verməyi ölkələr arasında əlaqələrə təsirsiz ötüşmür...

- Azərbaycanla Türkiyənin ortaq mədəniyyəti var. Sadəcə Türkiyə daha böyükdür və ona görə də orada müxtəlif növ musiqilər görmək olur. Amma Azərbaycan da musiqi baxımından istedadlı insanlarla dolu olan yerdir. Hamı musiqiyə dəyər verir. Ona görə də gələcəkdə Azərbaycanın musiqi sahəsində daha çox işlər görəcəyinə inanıram.

- Gələcəkdə azərbaycanlı caz ifaçıları ilə birlikdə konsertlər, yaxud duetlər planlaşdırırsız?

- Ola bilər. Hələ ki, belə bir təklif gəlməyib, amma biz belə təkliflərə müsbət baxırıq. Çünki mən caz ifa etməyi çox sevirəm. Ölkədə də cazın vəziyyəti çox yaxşıdır. Gələn aylarda Türkiyədə və başqa ölkələrdə konsertlərim olacaq. Amma istəyərəm ki, Azərbaycanda da olsun.

- Azərbaycanlı caz ifaçılarından kimləri tanıyırsız?

- Keçən il Bakıya yeni gələndə Tünzalə Ağayeva ilə konsertimiz olmuşdu. Amma o konsert daha çox pop yönümlü idi. Sonradan isə caz ifaçısı Ruslan Hüseynovla tanış oldum. Çoxdan tanıdıqlarımdan isə Əzizə Mustafazadənin adını çəkə bilərəm. İnsanın milli musiqisinin elementləri caza başqa rəng qatır. Bu baxımdan Əzizə Mustafazadənin azərbaycanlı olması onun musiqilərinə başqa rəng qatır. Çünki qulağında daha çox ritm var, şərq musiqisinin ritmlərindən də istifadə edir. Bu da onun bütün dünyada tanınmağına və sevilməyinə şərait yaradır.

Pianist Franz von Chossy:

- Konsert hazırlıqları necə keçdi?

- Biz notları bir-birimizə e-maillə göndərdik. Hərə özü hazırlaşdı, sonra isə dünən məşq elədik, bu gün yenə olacaq.

- Azərbaycana ilk gəlişinizdir?

- Bu, ikinci gəlişimdir. Bir dəfə də oktyabrda konsertə görə gəlmişəm.

- Təəssüratlarınız necədir?

- Çox gözəldir. İnsanlar çox mehribandır. Bir problem var, o da yollardakı tıxacdır, amma gözəldir.

- Azərbaycanda yenidən konsert verməyi planlaşdırırsız?

- Hazırda belə bir planımız yoxdur, amma mən istəyərəm ki, yenidən gəlim.

Fatimə Kərimli

Həftə içi.- 2013.- 19-27 mart.- S.8.