Peyğəmbərimizin
müridi - Veysəl Qərani
İslam dünyasının hər
yerindən müqəddəs ziyarətgahı görməyə
zəvvarlar gəlir
Veysəl Qərani
ocağını çoxdandır ziyarət etmək istəyirdik,
amma hansısa səbəblər imkan vermirdi. Buna baxmayaraq,
mayın ilk günlərində bu istəyimizi
reallaşdırdıq. Uçulub-dağılmış
yarı torpaq, yarı daşlı yolla uzun sürən
yolçuluqdan sonra nəhayət ki, Ağdaş rayonunun
Güneyində yerləşən Xınalı (Qaxay) kəndi
ərazisindəki böyük bir məzarlığa
çatdıq. Kəndin ətrafında salınmış məzarlığın
həm içi, həm də ətrafı digər yerli qəbiristanlıqlardan
xeyli təmiz və səliqəli idi. Girəcəkdə bir
neçə bina – kiçik məscid, bulaq və ziyarətə
gələnlərin dincəlməsi üçün
yardımçı tikililər vardı. Veysəl Qəraninin
məzar – türbəsi isə qəbiristanlığın mərkəzində
yerləşirdi. İnsanların bu müqəddəs
ocağa rahat gedib-gəlməsi üçün isə
giriş qapısından türbənin kandarınadək ensiz
cığıra daş plitələr döşənmişdi.
Göylərlə təmasda olan məzar
Evliyanın
ikiotaqlı türbəsi dördkünc formada,
üstüaçıq alçaq divarlardan ibarətdir.
Otaqlardan birində içəridə – ortada Veysəl Qəraninin
məzarı yerləşir. Onun baş tərəfində isə
onunla eyni vaxtda şəhid olmuş üç naməlum
adamın məzarı var. Hansı ki, onlardan da biri
çökdüyündən ancaq sinədaşından hiss
olunur. Veysəl Qəraninin sinədaşı adi daşdan olsa
da, başdaşı təmiz ağ mərmərdən yonulub.
Amma uzun müddət ziyarətə gələn insanlar
tütyə kimi başdaşından qırıntılar
qoparıb apardıqlarından onun yarısı yoxdur.
Döşəməyə kafel döşənib və üzəri
xalı-palazlarla örtülüb. Bu yerdə döşəmədəki
barmaq girə biləcəyi qədər dar bir deşiyi
göstərən hacı Məzahir bildirdi ki, orada (qəbrin
içində – V.T) yeddiqardaş ilanlar yaşayır. Nazik və
qara ilanlar tez-tez oradan çıxaraq məzarın ətrafında
özlərini günə verirlər və yenə də yerlərinə
qayıdırlar. Hətta divarların üstündə də
çox vaxt ilanları görmək mümkündür, amma
heç vaxt onlar ziyarətə gələnlərə xətər
yetirmirlər. Hacı onu da qeyd etdi ki, dəfələrlə
türbənin üstünü günbəzlə
bağlayıblar, amma səhər gəlib görüblər
ki, dam örtüyü kənara atılıb. Yəni məzar
bir növ göylərlə açıq təması sevir…
Qonşu
otağa da baş çəkdik. İçəri ortalıq
çökəklik idi və üzərini ot-alaq
basmışdı. Hacı Məzahir bildirdi ki, bura «Şəhidlər
məkanı» adlanır. Çünki bura qazılarkən
çox sayda insan sümükləri çıxıb və
toplu məzar olduğunu düşünərək
sümükləri yenidən torpağa basdırıblar.
Türbənin qarşısında isə cərgəylə
son 312 il ərzində ziyarətgaha xidmət göstərən
12 nəslin rəhmətə getmiş nümayəndələrinin
məzarları yerləşir. Yeri gəlmişkən, bu qəbirlərdən
ən qədimi İsmayıl Allahverdi oğlunun məxsusdur və
300 il əvvələ aiddir.
14 əsrin ilahi möcüzəsi
Kölgədə
başında ağ araqçın olan bir gənc 4-5 yeniyetməyə
ziyarətgahın kəramətindən
danışırdı. Biz də Bakıdan gəldiyimizi və
reportaj hazırlamaq istədiyimizi bildirdikdə, gənc
özünün nəsillikcə ziyarətgahın xidmətində
dayanmış sülalədən – Hacı Məzahirin
oğlu Xəyyam olduğunu desə də, bizə bu işdə
atasının kömək göstərə biləcəyini
bildirdi.
Hacı Məzahir
dedi ki, bu gün heç bir yazılı mənbə Veysəl
Qəraninin doğum tarixi barədə dəqiq bilgi vermir. Buna
baxmayaraq, onun 6-cı əsrin sonu, 7-ci əsrin əvvəllərində
Yəmənin Qərn kəndində yaşadığı məlumdur:
«Veysəl qərani anası ilə birlikdə yaşayıb.
Çox kasıb olub, kəndin dəvələrini otarar və
qazandığı az miqdarda pulla anası ilə birtəhər
dolanırmış. Ömrünü Allaha, İslama və
dinimizin banisi Məhəmməd Peyğəmbərə sevgiylə
keçirib. Hər zaman Peyğəmbəri görmək
ümidiylə yaşayıb, amma heç vaxt onunla
görüşə bilməyib».
Peyğəmbəri görmədən
qayıtdı
Bu yerdə
hacı Məzahir dini rəvayətlərdən birini nəql
edir. Bildirir ki, günlərində birində Veysəl Qərani
anasından Ərəbistana gedib Peyğəmbəri görmək
üçün icazə istəyir. Anası ona icazə verir,
amma tapşırır ki, birbaşa evinə getsin, orada
görsə əla, görə bilməsə geri – Yəmənə
qayıtsın: «Veysəl Qərani peyğəmbərliyin
9-10-cu illərində Məkkəyə gəlir və
soraqlaşıb Allah elçisinin evini tapır. Qapını
döydükdə qarşısına Peyğəmbərin
kiçik qızı Fatima çıxır və ondan kim
olduğunu soruşur. Veysəl Qərani də
özünü tanıdır və ona Peyğəmbəri
görmək üçün Yəməndən gəldiyini
deyir. Fatima atasının məsciddə olduğunu bildirdikdə
Veysəl Qərani «anam mənə yalnız evə gəlməyimi,
görə bilməsəm geri qayıtmağımı
tapşırıb» deyərək Yəmənə
qayıdır». Hacı Məzahir rəvayətin ardında
bildirdi ki, axşam Məhəmməd Peyğəmbər evə
gələndə xoş ovqat, ecazkar ətir duyur və
qızından onlara kimin gəldiyini soruşur. Fatima Yəməndən
Veysəl Qəraninin gəldiyini xəbər verəndə
Peyğəmbərimiz onun gözlərindən öpüb
«Eşq olsun o gözlərə ki, mənim görə bilmədiyim
bir müqəddəsi görüb» deyir.
Veysəl Qəraninin
kəramətlərindən biri də başqa rəvayətdə
belə nəql olunur: «Veysəl Qərani Peyğəmbərin
evində olarkən taxçadakı şüşə
qabın içində bir diş görür və onun niyə
orada saxlandığını Fatimadan soruşur. Fatima da deyir
ki, həmin düş peyğəmbərindir və Uhud
döyüşündə sındırılıb. Bunu
eşidən Veysəl Qərani Yəmənə qayıdan
kimi ağzındakı dişlərin hamısını
sökdürür ki, əgər Allahın elçisinin
dişi sındırılıbsa, onun da ağzında dişlərini
saxlamağa haqqı yoxdur…».
Allahın elçisi əbasını
göndərdi…
Tarixdən
də məlumdur ki, Veysəl Qərani Peyğəmbəri görməsə
də, Allahın elçisi onun varlığından və
böyük Yaradanın nəzərlərində uca
olduğundan hali idi. Hətta Məhəmməd Peyğəmbərin
ömrünün sonlarında öz əbasını əmisi
oğlu və kürəkəni həzrət Əliyə və
həzrət Ömərə verərək aparıb Veysəl
Qəraniyə çatdırmalarını tapşırır.
«Həmin iki müqəddəs əshabə də
tapşırıq üzrə Yəmənə gəlir və
Qəranini namaz qılarkən tapırlar. Namazı bitirən
kimi özlərini tanıtdırıb Peyğəmbərin hədiyyəsini
ona verirlər. Veysəl Qərani də əbanı onlardan
alıb qonşu otağa keçir və uzun müddət
ordan qayıtmır. Bunu görən həzrət Əli ilə
həzrət Ömər qonşu otağa keçəndə
onun dizüstə çöküb Allaha
yalvardığını, həmin əbanın Peyğəmbərin
ona bağışladığını eşitməyincə
geyməyəcəyini deyir. Bu an qeybdən ona səs gəlir
ki, geyinsin…» deyən hacı Məzahir əlavə edir ki, Veysəl
qərani görməyə-görməyə Peyğəmbərlə
bu qədər bağlı olan yeganə müqəddəs
şəxsiyyətdir.
«Allah onun andını yerinə yetirir»
Müqəddəs hədislərdə Allahın rəsulu Veysəl Qəraninin tabein dövrünün böyüklərindən olduğunu
bildirib, həzrət Ömərə və digər səhabələrə
onun haqqında bəzi tövsiyələrini
verib: “Üveys bir şey barəsində
Allaha and içərsə,
şübhəsiz ki,
Allah onun andını
yerinə yetirər, duasını qəbul edər. Duası qəbul olan bir zat olduğuna
görə əgər
özünüzə dua
və bağışlanma
etdirə bilərsinizsə,
etdirin” (Müslim, Fəzail əs-Səhabə,
224). Yalnız Peyğəmbərin
vəfatından sonra Mədinəyə gəlib
çata bilən Üveysi axtarıb tapan həzrət Ömər Allahın rəsulunun sözlərini
ona çatdırıb
və özü üçün dua etdirmişdi.
Həzrət Ömərin onun haqqında belə dediyi nəql olunur: “Mən Allahın rəsulunun belə buyurduğunu eşitmişəm:
“Şübhəsiz ki,
tabeinlərin ən xeyirlisi Üveys adlı bir kəsdir.
Onun bir anası var, alaca xəstəliyi keçirib. Ona rast gəlsəniz sizin üçün bağışlanma diləməsini
istəyin!”.
Şəfa verir, bəxt
açır…
Hacı Məzahirin dediklərinə görə,
Veysəl Qəraninin Azərbaycana gəlməsi
barədə iki fərziyyə mövcuddur.
Birincisi, «Allahın dostları» kitabında göstərildiyi kimi, Hicrətin 30-cu ilində (Miladi 650-ci illər) həzrət Əlinin başçılıgı ilə
ərəblər İslamı
yaymaq üçün
Azərbaycana gəliblər,
Tuqay meşələri
yaxınlığındakı Suffin şəhəri ərazisində eyni adla tanınan döyüş baş verib. Bu ərazi Zərdabın indiki Yuxarı Seyidlər kəndinin yerində olan Yasər şəhərinin bir hissəsidir. Deyilənlərə
görə peyğəmbərimizin
müridi Veysəl Qərani də 657-ci ildə burada şəhid olub. Digər fərziyyəyə
görə isə Veysəl Qərani Azərbaycana İslam dinini təbliğ etmək məqsədilə
gəlib və heç bir müharibədə iştirak
etməyib. Bu barədə
Əhməd bin Ənbalın
qeydlərindən də
oxuyuruq. O, Veysəl Qəraninin xəstəlikdən
öldüyünü yazır.
Amma türk mənşəli Mustafa Necati
isə evliyanın qılıc zərbəsindən
həlak olduğunu bildirir.
Hacı Məzahir onu da bildirdi
ki, psixi və ürəkkeçmə
xəstəlikləri olanlar
burada həmişə
şəfa tapıblar.
Eyni zamanda, yaşı ötmüş
qızlar bura bəxtlərinin açılması
arzusuyla gələndə
istəklərinə çatırlar.
Hacı Məzahir sonda onu da
bildirdi ki, 1992-ci ildə ziyarətgaha ərəb ölkələrindən
nümayəndə heyəti
gəlib. Helikopterlə
əraziyə gələn
qonaqlar söhbət əsnasında bildiriblər
ki, vətənlərində
olarkən buranın keçilməz meşələr
olduğunu eşidiblərmiş,
amma indi tam əksini görürlər.
Hətta Yəməndən
olan qonaqlardan biri ağlayaraq bildirib ki, bu
gün ölkəsində
Veysəl Qəraninin adına məktəblər,
mədrəsələr və
sair var, amma əsl məbəd
buradadır. Yeri gəlmişkən, hacı
Məzahir dedi ki, ziyarətgaha Azərbaycanın hər yerindən və qonşu ölkələrdən,
eləcə də Səudiyyə Ərəbistanı,
Yəmən, İordaniya,
Suriya və sair kimi ərəb
dövlətlərindən zəvvarlar gəlməkdədir.
Vüsal Tağıbəyli
Həftə içi.- 2013.- 11-13 may.-
S.4.