İKT layihələri gələn

aydan maliyyələşdiriləcək

Bununla bağlı İnformasiya Texnologiyalarının İnkişafı Dövlət Fonduna 40-dək iddiaçı müraciət edib

Hazırda Azərbaycanda informasiya-kommunikasiya texnologiyaları (İKT) sahəsi dövlət üçün əsas prioritetlərdən sayılır. Elə bu səbəbdəndir ki, ölkəmizdə İKT sahəsində fəaliyyətin stimullaşdırılması məqsədilə 2012-ci ildə dövlət başçısının sərəncamı ilə İnformasiya Texnologiyalarının İnkişafı Dövlət Fondu yaradılıb.

Artıq sözügedən qurum qrant və investisiya layihələrinin qəbuluna başlayıb. Bu məqsədlə Fonda 2014-cü ilin dövlət büdcəsindən 5 milyon manat vəsait ayrılıb.

Rabitə və Yüksək Texnologiyalar Nazirliyi tabeliyində İnformasiya Texnologiyalarının İnkişafı Dövlət Fondunun icraçı direktorunun müavini

Azər Bayramovun "ICTnews" xəbər xidmətinə verdiyi məlumata əsasən, layihələrin qəbulu may ayınadək davam edəcək: "Aprelin 2-dən bu günədək "www.ictfund.gov.az" saytının "e-qrant" bölməsində 40-dək qrant iddiaçı qeydiyyatdan keçib. Qrant layihələrinin qəbulu mayın 2-də başa çatacaq və bundan sonra onların ekspertlər tərəfindən qiymətləndirilməsi prosesi həyata keçiriləcək".

Azər Bayramov vurğulayıb ki, müsabiqənin qalibləri təxminən iyun ayında məlum olacaq. Onun sözlərinə görə, layihələrə 10 min manatdan 300 min manatadək vəsait ayrılması nəzərdə tutulub: “Müəlliflər üçün VÖEN layihənin qəbul olunduğu təsdiq edildikdən sonra açılacaq ki, müəllif xərclərə və problemlərə məruz qalmasınlar».

Bəs, görəsən, fond layihələri hansı kriteriyalar əsasında seçəcək? Ümumiyyətlə, bu qurumun investisiya lvayihələrinə dəstəyi davamlı olacaqmı?

Məsələ ilə bağlı fikirlərini bölüşən Azərbaycan İnternet Forumunun Prezidenti, İnformasiya Texnologiyalarının İnkişafı Dövlət Fondunun Müşahidə Şurasının üzvü Osman Gündüz bildirib ki, fonddan maliyyə dəstəyi almaq üçün «Startup»çılar və İKT sektorunda fəaliyyət göstərən iş adamları təkliflərini mövcud qaydalara uyğun olaraq Fonda (www.ictfund.gov.az) təqdim etməlidirlər.

O, həmçinin deyib ki, İKT sahəsində fəaliyyət göstərən sahibkarlıq subyektləri güzəştli kreditlərdən yararlanmaq üçün müvəkkil banklara müraciət edə bilərlər: «Müvəkkil banklar isə “Paşa Bank” ASC, “Bank Respublika” ASC, “Dəmir Bank” ASC, “Bank BTB” ASC və “Rabitə Bank” ASC-dir. Qeyd edək ki, kreditlərə tətbiq olunan illik faiz dərəcəsi 5 faizdir və kreditlər 10 ilədək müddətə verilir».

Güzəştli kreditlər 10 ilədək veriləcək

Mövcud qaydalara da toxunan ekspert vurğulayıb ki, sahibkarlıq subyektlərinə fondun vəsaitləri konkret həcmdə təklif olunacaq. Osman Gündüz bildirib ki, «Kiçikhəcmli kreditlərin həcmi 10000 manatdan 50 000 manatadək, ortahəcmli kreditlər 50 001 manatdan 500 000 manatadək və böyükhəcmli kreditlər 500 001 manatdan 5 000 000 manatadək dəyərindədir. Qaydalara əsasən, hər bir sahibkarlıq subyektinin fondun vəsaitləri hesabına aldığı güzəştli kreditin, o cümlədən, bir investisiya layihəsi üzrə maksimum həddi 5 000000 manatdan artıq ola bilməz.

Fondun güzəştli kreditlərinin müddətlərinə gəlincə, kiçikhəcmli kreditlər üçün 3 ilədək, ortahəcmli kreditlər üçün 5 ilədək, böyükhəcmli kreditlər üçün10 ilədək nəzərdə tutulub. Fondun kreditlərinin illik faiz dərəcəsi 1 faiz müəyyən edilir. Müvəkkil kredit təşkilatlarının Fondun kreditlərinə tətbiq etdiyi illik faiz dərəcəsinin ən yüksək həddinin cəmi kredit məbləğinin 5 faizindən artıq olmamalıdır. Osman Gündüz deyib ki, müvafiq qaydalara əsasən, fondun müvafiq bölməsi və daimi ekspertləri tərəfindən hər layihə üzrə müvafiq sənədlər toplusu hazırlanır: «Layihələrin maliyyələşdirilməsi fondla müsabiqənin layihə rəhbəri arasında bağlanmış müqavilə əsasında həyata keçirilir. Layihənin xərclər smetası, biznes planı və praktiki nəticələrinin istifadəsi ilə bağlı xüsusi öhdəlikləri nəzərdə tutan müvafiq sənədlər müqaviləyə əlavə olunur. Layihələr üzrə qrantlar kiçik, orta və böyük həcmli olmaqla, 36 ay müddətinədək ayrılır. Bir layihə üzrə qrant maliyyələşdirilməsinin həcmi 300 000 manatdan çox olmamalıdır. Sahibkarlıq subyektlərinə fondun vəsaitlərindən hansı həcmdə qrant vəsaitlərinin ayrılmasına gəlincə, kiçikhəcmli qrantlar 10 000 manatdan 100 000 manatadək, ortahəcmli qrantlar 100 001 manatdan 200 000 manatadək, böyükhəcmli qrantların həcmi 200 001 manatdan 300 000 manatadək nəzərdə tutulub».

Maliyyələşdirmə 3 mərhələdə aparılacaq

Osman Gündüz vurğulayıb ki, layihənin maliyyələşdirilməsi üç mərhələdə həyata keçiriləcək Onun sözlərinə görə, 12 ay müddəti əhatə edən birinci mərhələdə ilkin maliyyələşdirilmə aparılır. Bu mərhələdə layihənin biznes-planına uyğun olaraq işlərin təşkilinə qrantın ümumi məbləğinin 20 faizi ayrılır. 12-24 ay müddəti əhatə edən ikinci mərhələdə maliyyələşdirilmənin davam etdirilməsinə dair qərar ilkin mərhələnin nəticələrinə uyğun olaraq qəbul edilir. Layihənin ilkin mərhələsinin nəticələri layihənin biznes-planında qeyd olunan proqnoz göstəricilərinə müvafiq olaraq qənaətbəxş hesab edildiyi təqdirdə, layihənin aralıq maliyyələşdirilməsinə qrantın ümumi məbləğinin 30 faizi ayrılır.

Xatırladaq ki, 24-36 ay müddəti əhatə edən sonuncu mərhələdə müvafiq prosedura uyğun olaraq, layihənin son maliyyələşdirilməsinə qrantın ümumi məbləğinin qalan 50 faizi ayrılır. Bu mərhələdə layihənin kommersiyalaşdırılması məqsədi ilə layihəyə digər investorların vəsaitlərinin cəlb olunması əsas şərt hesab edilir. Osman Gündüz bildirib ki, vəsaitlərin təyinatı üzrə istifadəsinə nəzarət etmək məqsədilə fond maliyyələşdirdiyi sahibkarlıq subyektlərində müstəqil monitorinqlər apara bilər: “Müsabiqə layihələrinin monitorinqini fondun müvafiq bölməsi və ya fondun sifarişinə əsasən müstəqil ekspertlər həyata keçirirlər».

«Startup»çıların dəstəyə ehtiyacı var

Məsələyə münasibət açıqlayan Azərbaycan İnternet Cəmiyyətinin sədri, İnformasiya Texnologiyalarının İnkişafı Dövlət Fondunun Müşahidə Şurasının üzvü Qalib Qurbanov isə Azərbaycanda ilk dəfə olaraq dövlət büdcəsindən İKT sektoruna dəstək verildiyini xatırladaraq deyib ki, bu addım ölkədə yüksək texnologiyaların daha da inkişaf etməsinə zəmin yaradacaq: «Hazırda Azərbaycanda İKT sektoru əsas prioritet sahələrdən sayılır. Bunun nəticəsidir ki, son illər bu sektora diqqət xüsusi olaraq artırılıb. Təbii ki, ölkədə İKT-yə Dövlət Dəstəyi Fondunun yaradılması bu diqqətin bariz nümunəsidir. Artıq Fond tamamilə formalaşdığından layihələrin qəbuluna başlayıb. Hesab edirik ki, qiymətləndiriləcək layihələr ən layiqli təkliflər olacaq. Amma düşünürəm ki, bu məsələdə seçim etmək elə də asan olmayacaq. Çünki indi İKT sektorunda olanların böyük əksəriyyəti gənclərdir və onların hər biri kreativ, fərqli düşüncəyə malikdir. Yəqin ki, təklif olunan layihələrin hər biri maraqlı, diqqətçəkən olacaq».

Qalib Qurbanov vurğulayıb ki, hazırda Azərbaycanda «Startup»çılar və İKT sektorunda fəaliyyət göstərən iş adamlarının dəstəyə ehtiyacı var. Fondun Müşahidə Şurasının üzvü deyir ki, hazırda ölkəmizdə uzun müddət biznes ənənələrinə malik iş adamları həhəlik İKT sektoruna maraq göstərmirlər: “İndi bu sahədə olanların əksəriyyəti gənclərdir ki, onların da ciddi vəsaiti yoxdur. Yəni, bu gün «Startup»çıların maliyyə dəstəyinə ehtiyacı var. Düzdür, indiyədək ayrı-ayrı özəl qurumlar tərəfindən müxtəlif İKT layihələri maliyyələşdirilib. Amma dövlətin verdiyi dəstək bu sahəyə marağı daha da artıracaq və İKT sektorunda əldə olunan gəlirlərin artmasına gətirib çıxaracaq».

Sevinc

Bu yazı Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyi əsasında hazırlanıb.

Həftə içi.- 2014.- 17 aprel.- S.6.