Biletlərin onlayn satışı kütləviləşir

Elektron biletlərin satışında güzəştli şərtlər nəzərdə tutulmayıb

Son zamanlar Azərbaycanda beynəlxalq təcrübənin bir istiqaməti kimi tətbiq edilən yeniliklərdən biri də sərnişin biletlərinin onlayn satışı ilə əlaqədardır. Artıq Bakı Beynəlxalq Avtovağzal Kompleksində (BBAK), Azərbaycan Hava Yolları» QSC (AZAL) və «Azərbaycan Dəmir Yolları» QSC-də biletlərin elektron formada satışı xidməti təşkil edilib.

«AZAL»ın vətəndaşların təklif, ərizə və şikayətləri xidmətinin rəisi Məhərrəm Səfərli «Həftə içi»nə bildirir ki, elektron sərnişin bileti aviabiletin ənənəvi kağız blank əvəzinə təklif olunan elektron formasıdır və elektron formada aviaşirkətin məlumatlar bazasında etibarlı saxlanılır. Sərnişinə sərnişin adı, marşrut, tarif, ödəmə, satış ofisləri və sair, o cümlədən aviadaşıma barəsində müqavilə haqqında informasiyaya malik olan elektron aviabiletin qəbzi, yəni Passenger Itinerary Receipt verilir. Onun sözlərinə görə, elektron bilet elektron formada saxlanıldığına görə müştəri onu unutmaz və ya itirməz, onu oğurlaya bilməzlər: «Sərnişin başqa şəhərdə yaşayan öz qohumları və ya dostları üçün elektron bilet ala bilər. Onlara, şəxsiyyəti təsdiq edən sənədi təqdim etməklə onların uçuş hava limanında yalnız qeydiyyat prosedurasından keçmələri kifayət edəcək».

«AZAL»ın biletlərinin əksəriyyəti onlayn satılıb

Xatırladaq ki, hazırda «SW Travel»-in kassalarında və ya səlahiyyətli agentliklərin ofislərində və aviaşirkətin www.azal.az internet səhifəsində elektron bilet almaq mümkündür. İnternet səhifə elektron biletin əldə olunması üçün ən sürətli və əlverişli üsuldur. Məhərrəm Səfərlinin sözlərinə görə, aviabilet internet səhifədə sifariş edilir və haqqı ödənilir. Bunun üçün marşrut qəbzi əldə edilir və sərnişin bu qəbzlə və şəxsiyyəti təsdiq edən sənədlə birbaşa reysə - qeydiyyatdan keçmək üçün hava limanına gəlir. «SW Travel»-in kassalarında və ya səlahiyyətli agentliklərin ofislərində elektron bilet əldə edilərkən ödəniş həm VISA/Mastercard plastik bank kartları ilə, həm də nağd yolla həyata keçirilə bilər. İnternet səhifədə elektron bilet əldə edilərkən ödəniş VİSA plastik bank kartı vasitəsilə həyata keçirilir. Elektron bilet üzrə daşınmanı rəsmiləşdirərkən sərnişinə elektron biletin qəbzi və nağd və ya plastik bank ödəmə kartı ilə ödəniş edildikdə kassa-nəzarət texnikası vasitəsilə rəsmiləşdirilmiş xəzinə qəbzi verilir.

Məhərrəm Səfərli qeyd edir ki, elektron aviabiletin qəbzinə, kağız biletə oxşar olaraq, marşrut, daşınmanın forması, onun ödənişinin təfərrüatı, daşınmanın şərtləri və sair barəsində informasiya daxildir. O, müştərilərə elektron aviabiletin qəbzini bütün səyahət boyu özləri ilə gəzdirməyi məsləhət görür. Çünki elektron sərnişin bileti hava daşınmaları yerinə yetirilərkən sərnişinin və onun baqajının daşınması barədə müqavilənin təsdiqlənməsi üçün istifadə olunan sənəddir. Bundan əlavə, marşrut qəbzi hava limanına daxil olmadan öncə və yaxud pasport nəzarətindən və ya gömrük baxışından keçərkən, müştərinin «ora və geriyə» biletininin olmağının və ya səyahəti davam etdirməyinin sübutu kimi aviasiya təhlükəsizliyi xidmətinə təqdim etmək üçün lazım ola bilər.

Avtobus üçün 1 sərnişin 4 onlayn bilet sifariş edə bilər

BBAK-ın növbə rəisi Məhəmməd Abdullayev və qeyd edir ki, 2013-cü ildən etibarən adıçəkilən avtovağzal avtobuslarla sərnişindaşıma sahəsində əhaliyə göstərilən xidmət səviyyəsinin yaxşılaşdırılması məqsədilə şəhərlərarası və beynəlxalq istiqamətlər üzrə hərəkət edən müntəzəm reyslərə sərnişin biletlərinin onlayn rejmində internet vasitəsilə satışını təşkil edir. İnternet vasitəsilə sərnişin biletlərinin satışı reysin yola düşməsinə 10 gün qalmış başlayır. Onun dediyinə görə, onlayn rejmində sərnişin biletlərinin satışı zamanı istifadəçi 1 əməliyyatla ən çoxu 4 bilet sifariş edə bilər. Onlayn bilet satışı sistemilə sifarişlər hər gün səhər saat 7:00-dan 23:00-a qədər aparılır. Sistemdə proflaktik işlərlə əlaqədar hər gün saat 23:00-dan növbəti günün saat 07:00-a qədər internet vasitəsilə sifariş qəbul edilmir: «Biletlərin alınması üçün internet vasitəsilə sifariş vermiş və gediş haqqını plastik kartla ödəmiş istifadəçi, gediş biletini şəhərlərarası marşrutlarda reysin yola düşməsinə 30 dəqiqə, beynəlxalq marşrutlar üzrə isə reysin yola düşməsinə 1 saat qalanadək avtovağzalın bilet kassasına yaxınlaşaraq şəxsiyyətini təsdiq edən sənədi və yaxud sifariş blankını təqdim etməklə ala bilər. Şəhərlərarası marşrutlarda reysin yola düşməsinə 30 dəqiqədən az vaxt qaldıqda sifariş verilən yer digər sərnişinə təklif ediləcək və ödənilən məbləğdən qanuna müfafiq olaraq 25 faiz tutulmaqla 7 gündən 30 günədək sifariş verənin bank hesabına ödəniləcək».

Onlayn biletlərin satışında güzəştli tariflər yoxdur

Məhəmməd müəllim bildirir ki, onlayn rejimində sərnişin biletlərinin satışı zamanı güzəştli tariflər nəzərdə tutulmur. Ona görə də 5 yaşdan 10 yaşadək olan sərnişinlər üçün uşaq bileti alınır: «Uşaq bileti sərnişin biletinin qiymətinin 50 faizini təşkil edir. Valideynlərdən biri 5 yaşadək bir uşağını özü ilə pulsuz aparmaq hüququna malikdir. Sərnişin 5 yaşadək ikinci, üçüncü və sair uşaqlarını da özü ilə aparmaq istədiyi halda həmin uşaqların hər birinə uşaq bileti almalıdır. Uşaqlı sərnişinlər avtobusa minərkən uşağın doğum haqqında şəhadətnaməsini perron nəzarətçisinə təqdim etməlidir. 10 yaşı tamam olan uşaqlara gediş sənədi tam tariflə verilir».

Növbə rəisi qeyd edir ki, internet vasitəsilə şəhərlərarası və beynəlxalq istiqamətlər üzrə hərəkət edən müntəzəm reyslərə onlayn rejimində sərnişin biletlərinin alınması üçün əldə olunmuş sifariş blankı və ya sərnişinin şəxsiyyətini təsdiq edən sənədlər avtovağzaldakı bilet kassalarına təqdim olunur. Təqdim olunmuş sifariş blankı və ya sənədlərdəki məlumatlar kassir tərəfindən yoxlanıldıqdan sonra sərnişinə bilet verilir: «Şəhərlərarası marşrutlarda reysin yola düşməsinə 30 dəqiqə, beynəlxalq marşrutlar üzrə isə reysin yola düşməsinə 1 saat qalanadək internet vasitəsilə sifariş olunmuş biletlər avtovağzaldakı bilet kassalarında sənədləşdirilməlidir. Sərnişinin avtobusun minməsinə yalnız öz adına sənədləşdirilmiş biletlə icazə verilir. İnternet vasitəsilə sifariş olunmuş yerlərin başqasının adına dəyişdirilməsi hallarına yol verilmir».

Güzəştli bilet istəyənlər kassalara müraciət etməilidir

«Azərbaycan Dəmir Yolları» QSC-nin mətbuat katibliyinin rəisi Nadir Əzməmmədov isə deyir ki, xidmətin səviyyəsini yaxşılaşdırmaq məqsədilə fiziki şəxslərə plastik kartlardan istifadə etməklə internet vasitəsilə onlayn rejimində ölkədaxili və beynəlxalq istiqamətlərdə hərəkət edən sərnişin qatarlarına gediş sənədlərinin, yəni biletlərin alınması üçün xidmətlər təklif edib. Həmin satış qatarın yola düşməsinə 10 gün qalmış başlayır. Onun dediyinə görə, onlayn bilet satışı sistemində güzəştli tariflərlə biletlərin sənədləşməsi üçün sifarişləri ilə bağlı əməliyyat aparılmır. Bu kateqoriyadan olan istifadəçilər «Azərbaycan Dəmir Yolları»nın bilet kassalarına müraciət etməlidirlər. Şəhərətrafı istiqamətdə hərəkət edən elektrik qatarlarına da onlayn bilet satılmır: «İnternet vasitəsilə bilet sifarişləri hər gün səhər saat 07:00-dan 23:00-a qədər aparılır. Sistemdə profilaktik işlərlə əlaqədar hər gün saat 23:00-dan növbəti günün saat 07:00-dək onlayn rejimində sifariş qəbul edilmir. İnternet vasitəsilə bir əməliyyatla maksimum 4 bilet sifariş oluna bilər. Biletlərin alınması üçün internet vasitəsilə sifariş vermiş və gediş haqqını plastik kartla ödəmiş istifadəçi biletini 10 gün müddətində qatarın yola düşməsinə 1 saat qalanadək «Azərbaycan Dəmir Yolları»nın bilet kassasına yaxınlaşaraq şəxsiyyətini təsdiq edən sənədi və yaxud sifariş blankını təqdim etməklə ala bilər. İnternet vasitəsilə biletlər üçün sifarişlər sərnişin qatarlarının başlanğıc stansiyadan yola düşməsinə 2 saat qalmışadək aparılır».

Məlumatlar yoxlamaq lazımdır

İnternet vasitəsi biletlərin alınması üçün railway.gov.az saytının «Onlayn bilet» bölməsində qeydiyyatdan keçmək mütləqdir. Qeyiyyatdan keçərkən adı, soyadı, elektron ünvanı, əlaqə telefonunu, şəxsiyyət vəsiqəsinin (ümumvətəndaşlıq pasportunun) seriya və nömrəsini və sair məlumatları daxil etmək lazımdır.Bu zaman məlumatların dəqiqliyinə diqqət yetirilməlidir. Təhlükəsizlik kodu qeyd edilərkən xırda və iri şriftli hərflərin fərqinə də nəzər yetirmək vacibdir. Ölkədaxili qatarlara minik üçün sərnişin bileti şəxsiyyəti təsdiq edən sənəd (ümumvətəndaşlıq pasportu), uşaq tarifi ilə alınan bilet isə doğum haqqında şəhadətnamə və ya uşağın şəxsiyyətini təsdiq edən sənəd əsasında aparılır. Ölkədən kənara hərəkət edən sərnişin qatarlarına isə minik üçün biletlər yalnız ümümvətəndaşlıq pasportu əsasında mümkünləşir. İnternet vasitəsilə sifariş olunmuş yerlərin başqasının adına dəyişdirilməsi hallarına yol verilmir.

Təbriz Vəfalı

Bu yazı Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyi əsasında hazırlanıb.

Həftə içi.- 2014.- 7 mart.- S.7.