Sürücülər üçün sms məlumatlar

Yaxın vaxtlarda bu istiqamətdə xidmətlərin sayının artırılması nəzərdə tutulub

Azərbaycanda İKT-nin sürətlə inkişafı yavaş-yavaş sürücülərin də işini asanlaşdırır. Məsələn, artıq Bakıda yollarda tıxac probleminin aradan qaldırılması məqsədilə 7 “Park-manat" terminal quraşdırılıb. Bakı Şəhər İcra Hakimiyyətindən «Həftə içi»nə verilən məlumata görə, artıq terminallar paytaxtın mərkəzi küçələrində qurulub. İlin sonuna kimi isə Bakıya daha 1000 terminal gətiriləcək, bununla da paytaxtda tıxac problemi aradan qaldırılacaq:

«Burada maraqlı məqam həm də ondan ibarətdir ki, parka radar quraşdırılan yerlərdə qanunsuz avtomobil saxlamaq mümkün olmayacaq. Bu qurğular günəş enerjisi ilə işləyəcək. Yəni, artıq elektrik enerjisinə ehtiyac qalmayacaq. Yerləşdirilən "Park-manat"lardan sürücülər 1 saatı 1 manatdan nağd və ya eyni məbləği SMS vasitəsi ilə ödəyə bilərlər. Sürücülər “Park-manat”dan istifadə etmədiklərinə görə cərimələndikləri məbləği 1 saat ərzində ödəməzlərsə, onda cərimə ikiqat artacaq. Belə ki, “Park-manat”lar bir qədər kənar küçələrdə quraşdırılacaq. Orada xüsusi geyimli oğlan və qızlar xidmət edəcək. “Park-manat”lar pulla və kartla işləyəcək, yarım saatı 50 qəpik olacaq".

Bəs, görəsən, Azərbaycanda sürücülər üçün daha hansı sms xidmətləri nəzərdə tuturlur?

Qeyd edək ki, Azərbaycanda sürücülərin yol cərimələrinin ödənilməsinin asanlaşdırılması üçün də əlavə tədbirlər görüləcək. "Komtec" şirkətindən «Həftə içi»nə bildiriblər ki, bu ilin ortalarında Azərbaycanda yol hərəkəti qaydalarının pozulmasına görə cərimələri MilliÖn ödəniş terminalları vasitəsilə ödəmək mümkün olacaq.

Şirkətdən vurğulanıb ki, kommersiya tərkibli razılaşma artıq əldə olunub və hazırda layihənin texniki aspektlərinin həlli üzrə işlər aparılır.

MilliÖN ödəniş terminallarında, həmçinin bank kartlarından istifadə mümkün olacaq ki, bu da xidmətə görə ödəniş etmək üçün pulları avtomatik köçürməyə imkan yaradacaq.

Tıxaclar barədə məlumat

almaq mümkün olacaq

Yaxın aylarda həm də sürücülərin tıxacda qalmaq kimi probleminin olmayacağı gözlənilir. Belə ki, sürücülər təmirə görə bağlı və ya nəqliyyat vasitələrinin məhdudlaşdırıldığı yollar haqqında məlumatı mobil telefonlarına gələn SMS-lər vasitəsilə əldə edə biləcəklər. Yəni, sükan arxasında olan sürücü mobil telefonuna gələn bir SMS-lə bağlı yola üz tutmayıb, alternativ yollarla hərəkət etməli olacaq. Tətbiqi bir neçə aya planlaşdırılan bu sistem sürücülərə həm vaxt, həm də benzin baxımından qənaət etmək imkanı verəcək.

Onu da qeyd edək ki, yaradılan bu sistem sürücülərə yalnız yolların bağlı olması haqda məlumat verməyəcək. Sürücələrə onlara gələn SMS-lər vasitəsilə hansı yol hərəkəti qaydalarını pozduqları haqda məlumatı da əldə edə biləcəklər.

Respublika Baş Dövlət Yol Polisi İdarəsinin mətbuat xidmətinin rəhbəri Kamran Əliyev yeni sistemin sürücülərin xeyrinə hesablandığı qənaətindədir. O, qəzetimizə açıqlamasında bildirib ki, bu addım sürücülərin məsuliyyətini daha da artıracaq. Onun sözlərinə görə, hətta mobil telefonu olmayan sürücülər də bu məlumatlardan xəbərdar olmaq üçün mobil telefon almalı olacaq: «Bu sistemin işə düşməsi həm sürücülərin işini asanlaşdıracaq, həm də məsuliyyətini artıracaq ».

Cərimə protokolu elektron

qaydada tərtib olunacaq

Azərbaycanda yol polisi və sürücü təmaslarının minimuma endirilməsində də texnoloji yeniliklər köməyə çatacaq. Artıq bir sıra yeniliklərin tətbiq olunduğu bu sahədə 2014-cü ilin mart ayında İnzibati Xətalar Məcəlləsinə edilən dəyişikliklərlə daha bir neçə yenilik əlavə olunub. Burada mühüm yeniliklərdən biri ondan ibarətdir ki, qayda pozuntusunun nəzarət kamerası və ya radar vasitəsilə aşkar edilməsindən sonra həmin qayda pozuntusuna görə protokol yalnız elektron qaydada sürücünün iştirakı olmadan tərtib ediləcək. Yəni belə halda protokolun tərtib olunması üçün sürücünün DYP orqanına dəvət olunması, eləcə də sürücünün qaydanı pozduğu ərazidə saxlanılaraq bilavasitə DYP əməkdaşı tərəfindən protokol tərtib olunması birmənalı olaraq qadağan olunur. Bu yenilikdən sonra inzibati xətaların nəzarət kameraları və radarlar vasitəsilə aşkarlanaraq rəsmiləşdirilməsi yalnız mərkəzləşdirilmiş qaydada həyata keçiriləcək. Başqa sözlə, hətta DYP əməkdaşları müəyyən yol sahəsində mobil radarlar vasitəsilə hərəkət sürətini ölçsələr də, həmin yerdə sürücünü dayandıraraq onun barəsində protokol tərtib etmək qadağan olunur. Çünki yeni dəyişikliyə əsasən, bütün nəzarət kameraları və radar qurğuları Baş Dövlət Yol Polisi İdarəsinin Mərkəzi İnformasiya Sisteminə inteqrasiya olunmalıdır.

Məsələni mətbuata şərh edən yol hərəkəti üzrə ekspert Ərşad Hüseynov deyib ki, bu yeniliyin həm müsbət, həm də mənfi mənada maraqlı təcrübi nəticələri ola bilər: «Müsbət mənada onu gözləmək olar ki, sürücülərin yerində saxlanılması və DYP orqanına dəvət edilməsi qadağan ediləndən sonra sürücü və DYP əməkdaşı arasında sövdələşmələr minimuma endiriləcək. Yəni qayda pozuntusu avtomatik rejimdə aşkarlanacaq, daha sonra sürücünün iştirakı olmadan elektron protokol tərtib olunaraq rəsmiləşdiriləcək və sürücünün ünvanına göndəriləcək. Bu halda qayda pozuntusu rəsmi qeydiyyata düşdüyündən onun sonrakı gedişi, yəni cərimə tətbiqi haqqında qərar çıxarılması, müvafiq cərimə balının tətbiqi qaçılmaz olacaq. Başqa sözlə, sürücünün «Həsən əminin qohumu» olması, yaxud DYP əməkdaşına görüm-baxım etməsi işə yaramayacaq. Yeniliyin mənfi tərəflərinə gəlincə, nəzarət kameralarının və radarların faktiki işləmədiyi hallarda (məsələn, elektrik enerjisi kəsildikdə), yaxud informasiyanın qəbulu, ötürülməsi və emalı prosesində problemlər olduqda qayda pozuntuları diqqətdən kənarda qalacaq. Onu da qeyd edim ki, qayda pozuntusunun avtomatik qeydə alınması və elektron protokol tərtib olunması hələ cərimə tətbiqi barədə qərarın çıxarılması demək deyildir. Elektron protokollar İnzibati Xətalar Məcəlləsinin 410-1-ci maddəsində göstərilən qaydada və müddətlərdə sürücüyə göndəriləcək. Sürücü həmin protokolu və bildirişi aldıqdan sonra müvafiq DYP orqanına gələrək inzibati cərimənin tətbiqi barədə qərarın çıxarılması prosesində iştirak edə bilər. Lakin o, üzrlü səbəblər olmadan gəlmədikdə onun barəsində iştirakı olmadan cərimə tətbiqinə dair qərar çıxarılacaqdır. Həmin qərar çıxarıldıqdan sonra tanış olmaq, etirazlar olduqda şikayət vermək, etirazlar olmadıqda isə icra edilməsi (cərimənin ödənilməsi) üçün sürücüyə göndəriləcək».

Ekspert onu da vurğulayıb ki, bu dəyişikliyin gətirdiyi yeniliklərdən biri sürücülərin həm törətdikləri qayda pozuntuları barədə, həm də yolların müvəqqəti bağlanması və bu sahədə digər tədbirlərlə bağlı SMS vasitəsilə məlumatlandırılmasının nəzərdə tutulmasıdır: «Bu işin həyata keçirilməsi 3 orqana- DYP-yə; ASAN xidmətə və Nəqliyyatın İntellektual İdarəetmə Mərkəzinə həvalə olunub. Son yenilik eyni zamanda, ölkə prezidentinin 11 fevral 2014-cü il tarixli Fərmanı ilə ASAN xidmət mərkəzlərinin səlahiyyətinin genişləndirilməsinə dair göstərişinin icrasını da reallaşdıracaq. Həmin Fərmanda «ASAN ödəniş» sisteminin yaradılması nəzərdə tutulur. Bu sistem inzibati cərimə növündə inzibati tənbeh tətbiq edilməsi barədə qərarların və xüsusi texniki vasitələrin köməyi ilə aşkar olunan yol hərəkəti qaydaları əleyhinə olan inzibati xətaların törədilməsinin foto və ya video görüntülərinin vətəndaşların elektron ünvanlarına, mobil telefon nömrələrinə elektron qaydada göndərilməsini; inzibati cərimə növündə inzibati tənbeh tətbiq etmə haqqında qərarın icra müddətinə nəzarət edilməsini və müddətlərin bitməsi barədə məlumatlandırılmasını; inzibati cərimələrin mobil telefon aparatları vasitəsilə elektron qaydada ödənilməsini təmin etməlidir».

Sevinc

Bu yazı Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyi əsasında hazırlanıb.

Həftə içi.- 2014.- 13 may.- S.6.